Read Angami Naga Samuel Kerieu 24 Bible Online

Samuel Kerieu 24 - Angami Naga bible

Samuel Kerieu 24

¹Siro Saul-e Filistinmia whuo tuo di la vor tse, mia puo puo ki, “David-e En-gedi rayhanu ba” idi pu.

²Sitse Saul-e Israel pete donu mia nyie se kedalie, sidi David mu puo themiako pfhü Thelou Tsiekrieu tsatie vo.

³Puoe cha khieki tekuobouu ki vor, sünu tsiepfü puo baya, sidi Saul-e sünunu rüleilietuoü le.[33] Süki David mu puo themiakoe tsiepfüu kesoutho nu ba.

⁴Sitse David themiako sie puo ki, “Jihova n ki, ‘A n ngumvümia khapie n medo chüwatuo, sidi noe puo pie n medo chüwatuo,’ ikeshü teisozhau sü thie hate” sita. Sitse David-e vo di pesikhuoi di Saul pfhephrie belie.

⁵Süsietsa David melou chüti vorta, puoe Saul pfhe bekewa la.

⁶Sidi puo puo themiako ki, “Jihova a bu a niepuu, Jihova puo kenhekelieu gei a dzie yhapie puo perhie haikecü chü hienuya; kekreilamonyü Jihova puo kenhekelieu zo” sita.

⁷Süla David-e puo themiako kerhie seshü di uko bu Saul biewaketuo khawa. Süsie Saul sielie di tsiepfüu nunu tuota, sidi puo thuo puo cha nu vota.

⁸Süsie David rei sielie di tsiepfüu nunu parlie di sie Saul kie di, “A niepuu kediu!” ishü. Sidi Saul puo sietsa meho pra tse, David-e nuke tsu puo kelu.

⁹David-e Saul ki, “No kiüdi themia n ki, ‘David n pekawatuoü n pfhüya’ ikeshüko rünyüya ga?

¹⁰Thie Jihova kedipuo mhie di tsiepfü nunu n khapie a dzie nu shüshü shikecü n mhinie pie nguwate; mu huomia a bu n dukhriwanu pu zo, derei n kelashüte. Ae sie, ‘A a dzie yhapie a niepuu perhielie lho zo; kekreilamonyü puoe Jihova kenhekelieute’ isiwa.

¹¹Harie, apuo, a dzie nu n pfhephrieu mehoshü phi; kekreilamonyü a n pfhephrieu be toulieta zo, sidi n dukhriwa mo, a dzie nu mha kesuo morei miapetsoukecü puorei tuo mokecü si mecü touta ze. A n gei phouma mo zo; sirei no a kerheiro pfhü tuo ze.

¹²Jihova bu avu donu capiu chüliecie! Jihova bu n geinu a khepushülie; derei a dzie zo we n perhielie lho zo.

¹³Keriekimia mhasidie pukecü, ‘Themia kesuomia geinu mha kesuo parya’ isi, derei a dzie we n petsoulie lho zo.

¹⁴Israel kediu supuo petsou di par ga? No supuo whuo tuo ga? Tefü kesia puo me? Telhie yopuo me?

¹⁵Süla Jihova bu thecau chüshülie, sidi avu donu mhatho-u chüshülie. Puo bu süu mehoshülie, mu a kechau chüshü, sidi n perhiekecü nu a khruohishücie” sita.

¹⁶Siro David-e Saul ki die hako pu thewa tse, Saul sie, “A nuo David, hau n pfheü zo me?” sita. Sidi Saul puo pfhephra sie di krata.

¹⁷Puo David ki, “Noe a kirei miathokuo zo; kekreilamonyü no mha kevi pie a tsüshü, sirei a we mha kesuo pie n tsü.

¹⁸No thie a gei mha kevi chükeshü thashü a kie, süusü Jihova a khapie n dzie nu shü rei no a dukhriwa mocü la.

¹⁹Kekreilamonyü mia kehoupuorei puo ngumvümia ngulie ro, puoe puo bu kru di tuotatuo me? Süla no thie a gei chükeshüu la Jihova bu keviu pie n zhakhra chüshüliecie.

²⁰Tsiewe no kedi chütuoü pu ketuo a si bate, mu Israel kedi rüvieu n dzie nunu sedelietuo.

²¹Süla no tsie Jihova geinu a sie vorkezhü a nuosenuoyieko pekawa lhoü, mu a puonuoko kikru donu a za pekawa lhoükecü a ki rüseshücie” sita.

²²Süla David hau se Saul ki rüseshü. Sitse Saul kinu vota; derei David mu puo themiako dahou kemetei nu la vota.