Read Angami Naga Samuel Kerieu 25 Bible Online

Samuel Kerieu 25 - Angami Naga bible

Samuel Kerieu 25

¹Siro Samuel siata; sitse Israel pete kengulie di puo krükra. Ukoe Rama nu puo kiu nunu puo khruwa. Süsie David sielie di tuo Paran rayha nu keta.

²Maon nu mia puo tuo, mu Karmel nu puo lie nyi. Themiau mhanyi se; puoe tekuo nyie se mu temvü nyie puo ba. Puoe Karmel nunu puo kuonuoko mie be ba.

³Siro themiau za Nabal, mu puo kimia za Abigail. Thenupfüe mecie mu zivi, derei themiau we puo zhosuo mu ngu vi mo, puoe Kalebmia.

⁴David-e Nabal rayha nunu puo kuoko mie bekeba silie.

⁵Süla David khriesamia ker ketseshü; mu David khriesako ki, “Karmel gei kholie, sidi Nabal ki vocie, mu a za nunu puo kelushülie.

⁶Nieko hakemhie di puo kelushülie; ‘Nouneu bu n ze balie, mu nouneu bu n kiu nu balie, tsiu nouneu bu no mha keba pete gei balie.

⁷A sicü noe tekuo mie kebe themia ba üsi; siro tsie n kuopfheko hie ze ba, mu hie uko gei mha kesuo puorei chüshü mo, mu uko rei Karmel gei kebachie uko vie puorei pejüwa mo.

⁸N Khriesako ki ketsoshücie, sitse uko n ki pushütuo. Süla a khriesako bu n mhodzüki keneiu chülie üthienyü; kekreilamonyü hieko thenyi zha puo nhie vorlie. Süla n pezie rei n dzie nu keba mhakehoupuorei pie n kituoko mu n nuou David tsüshücie’ siliecie” sishü.

⁹Sidi David khriesako vorlie tse, uko David za nunu mha hako pete pie Nabal ki pushü; sidi ukoe pfhe ba.

¹⁰Derei Nabal-e David kituoko die kela di, “David sü supuo ga? Jese nuou sü supuo ga? Tsie teiu nu kituomia kekra u niepumia kinu taketa nyite.

¹¹A bu a kuomie kebeko la, a niekhrüda mu a dzü tsiu themuo biekelieko se vo kirapuonu vor shikecü a sikemo themia kro puo tsüwatuo me?” sita.

¹²Süla David khriesako lata, sidi mha hako pete se vor puo ki pushü.

¹³David sie puo themiako ki, “Kehoupuorei u zhiecha khepfüliecie!” sishü. Süla uko pete rei u zhiecha khepfü phrelie; David rei puo zhiecha khepfülie; sidi mia krie dia mese David sie medzi kho, mu mia krie kenie bu mhanyako pfhe bata.

¹⁴Derei khriesako donu mia puoe Nabal kimia Abigail ki, “David-e rayha nunu u niepuu keluketuo la dieliemia ketseshü sirei puoe uko gei diekesuo pu di shiekhouite.

¹⁵Sirei themiako hieko gei tseiüvi phi zo, mu hieko pechü mo zo, mu hie lieko nu uko ze kebachie mha puorei pejüwa mo zo;

¹⁶ukoe khisetheva hieko la sozha puo tuoi zo, hieko uko ze di tekuo pfhe kebachie.

¹⁷Süla tsie no kedipuo chü morosuo shi silie di chüshücie; kekreilamonyü u niepuu mu puo kiu pete gei mha kesuo chüshütuoü pepiliete; puoe puo zho suo phicü la, miapuorei puo ki mhapulieya mo” sishü.

¹⁸Sitse Abigail rükri sie niekhrüda krie kenie, khubedzü chüzhüsü kenie, chü kemesakewa tekuo pengou, thoulha kemejü pengou, khubesi phro krie puo mu chiede niekhrüda krie kenie selie sidi puoe hako khapie gada chiegei dashülie

¹⁹Sidi sie puo khriesako ki, “A mhodzü tuoshüliecie; a nieko sie vorzhü ho” sishü. Derei puoe puo nupfu Nabal ki pu mo.

²⁰Siro puoe gada geinu ta vor sidi kijüthou donu kerzhü, ru David mu puo themiako puo ki vor; sidi puo uko ze keselie.

²¹Sitse David sie, “Ketho zo, a themia hau vieko rayha nunu pekrukeshü ha thedo chü za ho, puo vie yopuorei pejüwa mo zo; derei puoe mha kevi sou nu kesuo khashü.

²²Mhanuü khise puo vie thepfumia puo zokecü rei peshashü üliro, sükemhie mu sükezie rei Kepenuopfü bu chüpie David gei shücie” sita.

²³Siro Abigail-e David ngu tse, puoe rükri gada geinu kerlie, sidi nuketsu David mhodzünu kijü zerepfü zhüta.

²⁴Puoe puo phi nu zhülie di sie, “A niepuu, kejo-u pie a gei rübei shüwaliecie, n pezie rei n kituopfü bu n nyie nu mhapushü mu n kituopfü dieko rünyüshücie.

²⁵A niepuu, kepotsüyakezha Nabal üse mhaü hiecie; puo za kheki chü, puoe sümhie zo; Nabal[34] sü puo za, süla puoe kenyamia zo; derei a, n kituopfü, we no ketsekeshü, a niepuu khriesako ngu molie.

²⁶“Süla tsie, a niepuu, Jihova rheiketuo mhiei, mu no rei rheiketuo mhie, Jihova n bu thezie pekru lho ücü la n dzie pie khepu lieketuo nu n khawate ru, tsie n ngumvümia mu a niepuu gei mha kesuo chütuoü pfhüyakecümia bu Nabal mhietaliecie.

²⁷Siro tsie n kituopfü se a niepuu ki kevor mha hako pie a niepuu siemedziketuo khriesanuoko tsüshücie.

²⁸N pezie rei n kituou kejo vashücie; kekreilamonyü Jihovae a niepuu kiu chü toushü zotuo, kekreilamonyü a niepuu Jihova terhüu la kegei tuoya; mu no rheiketuo chie mha kesuo n geinu ngu lho zo.

²⁹Mhanuü mia huomia tuocü sier n whuo di n kerheiro liewatuoü ro, a niepuu kerheiro-u pha kesapie rheikeba n Kepenuopfü Jihova khrükhro shüwatuo; derei n ngumvüko kerheiro we puoe pie tsiedeiro nunu kelhouwatuo.

³⁰Siro Jihova n ki pukeshü mha kevi kheko a niepuu gei chü tseilie mu n khapie Israel kedinuou chülie tse,

³¹a niepuu thenoukesuo morei kele biekekrükecü balie lho, puocapuola jü di thezie pekru morei puo thuo puo kelalieya mocü la. Siro Jihova a niepuu gei mha keviu chükeshü ki, n kituopfü rükrashücie” sishü.

³²Sitse David sie Abigail ki, “Jihova, Israel Kepenuopfü, n ketsepie a zekesenukeshüu bu keviu chüliecie!

³³N kele keviu la thejapfülie, mu no thejakepfüu chülie, thie a thezie pekrutuoü mu a thuo a dzie pie a khepu lietuoüketuo nunu a kekhakelieu la!

³⁴Kekreilamonyü Israel Kepenuopfü rheiketuo tuoi, a bu n pechüwa lhoü a kekhawa zo ketho, mhanuü no rükri vor a ze kese kemosie we, khise gei Nabal kitsa thepfumia puorei tuo mota zotuo muru” sita.

³⁵Süsie David-e puo dzie nunu puo mha se kevorko lielie di sie puo ki, “N nou mene di n kinu khotaliecie; harie a n dieko rünyüliete; mu a n kechako chüshü n tsüwate” sishü.

³⁶Siro Abigail Nabal ki vor; puoe puo kinu kedimia he tuoi thehe chü ba. Nabal-e meze se baketa la puo dzüzie bata; süla puoe teiso vorlie kemochie mha yopuorei se puo ki pu mo.

³⁷Siro khise Nabal gei mezekecü ba mota, sitse puo kimia mha hako pete se puo ki pushü tse puo melou thachü vorta; sidi puo ketsie mhieta.

³⁸Süsie zha ker mese sie, Jihova Nabal vüshü, sidi puo siata.

³⁹Siro David-e Nabal siaketa silie tse sie, “Jihova bu keviu chüliecie! Puoe Nabal a pesekeshüu capiu chüshüte, mu puo kituou bu mha kesuokechü nunu ketheliete; Jihovae Nabal mha kesuo chüyakecüu pie puo tsü gei shü lawate,” sita. Süsie David-e mia ketseshü di Abigail bu puo kimia chütanu di puo rüchü.

⁴⁰Sidi David kituokoe Karmel gei Abigail ki vor, di puo ki, “David-e hieko ketsepie n ki shülie, n bu puo kimia chütanuyalie” sishü.

⁴¹Sitse puoe sielie di nerhu tsu kijü zhüta, di sie, “N kituopfü bu a niepuu kituoko phi kekhrü kituomia chücie” silie.

⁴²Sitse Abigail rükri sielie, di gada geinu vota; puo kituopfü mia pengou puo ze vota. Sidi puoe David dielieko siemedzi vor di puo kimia chüta.

⁴³David-e Jezrilmiapfü Ahinoam rei lielie; unie kenienie rei puo kimia chülie.

⁴⁴Saul-e puo nuopfü Mikal David kimiapfü pie Laish nuo Palti tsüwa, puoe Galimmia.