Read Angami Naga Samuel Kerieu 26 Bible Online

Samuel Kerieu 26 - Angami Naga bible

Samuel Kerieu 26

¹Süsie Zifitmiae Gibia nu Saul ki vor di sie, “David-e Hakila kijükhruu gei, Jeshimon kepetsoutsa[35] nu rüshü ba” sishü.

²Süla Saul sielie di Israelmia nyie se kedalie di ze Zif rayha nu tsu, sidi Zif rayha nunu David pfhütuoü ke.

³Sidi Saul-e Hakila, Jeshimon kepetsoutsa[36] cha khieki razhüchü nu balie. Derei David-e rayhanu ba zo. Siro puoe Saul puo sie whuo rayha nu tsurketa sishü tse,

⁴David-e mha rüciekecümia ketseshü, sidi Saul vor tsoketa si toulie.

⁵Sitse David sielie di Saul kebachüu nu vorlie; mu David-e Saul, Ner nuou Abner, rüpfhünuo mhokezhau ze zhüyakecü chüu ngushü. Süki Saul-e razhüchüu nu zhü, mu puo chüpahiko puokhiepuomhou houpfü ba.

⁶Süsie David-e sie Hit-u Ahimelek mu Zeruia nuou Abishai, Joab siezeu ki, “Supuonie a ze di Saul razhüchü nu ketuo ga?” sishü. Sitse Abishai sie, “A n ze tsutuo” silie.

⁷Süla David mu Abishai unie theva zenu chüpahiko ki tsu; siru Saul-e razhüchüu nu zezhü, mu puo ngou pie puo tsü khieki kijü sepfü tha; tsiu Abner mu chüpahiko puo khie houpfü tha.

⁸Abishai sie David ki, “Ukepenuopfü thie n ngumvüu khapie n dzie nu shüwate; süla tsie a bu rüngou-u pie puo geiwa di va puo nu puo zekhropie kijü shüwacümu, a va kenie puo bielie lho” ita.

⁹Derei David sie Abishai ki, “Puo pekawa hiecie, kekreilamonyü supuonie puo dzie yhapie Jihova kenhekelieu petsou di jo molie vituo ga?” sita.

¹⁰David sie, “Jihova rheiketuo mhie, Jihova puo biewatuo; morei puo siaketuo teisozhau vortuo; morei puo rüyachü nu tsu di katatuo.

¹¹Jihova a bu a dzie yhapie Jihova kenhekelieu petsou hienuya; derei tsie puo tsü ki ketha rüngouu mu dzübouu chüliecie, sidi avu tuota khe” sita.

¹²Süla David-e Saul tsü khieki ketha rüngouu mu dzübouu chüpielie, sidi unie tuota. Siro miapuorei süu ngu mo, morei si mo, morei miapuorei cosier mo; uko pete zezhüketa la, kekreilamonyü Jihova kinu keze kesou puo uko gei tsurketa la.

¹³Süsie David-e tuo puo rütsietsa pfülie, sidi vo kepetse nu kijükhru mezü gei thalie, uko donu thechü meya secü puo zhü

¹⁴Sitse David-e chüpahiko mu Ner nuou Abner kie di sie, “Abner! No a pfhekhoshülie lho me?” si. Sitse Abner puo die kela di, “Kediu kie kethau no supuo ga?” sita.

¹⁵David sie, Abner ki, “No thepfumia puo mo me? Israel donu supuo n mhiecü ba ga? Siüro kidi no n niepuu kediu pfhe balie mota ga? Themiako mia puo n niepuu kediu pekawatuoü vorcü la.

¹⁶Mha chükewa hauha vi mo zo. Jihova rheiketuo mhiei, no siatakecü mese zo, kekreilamonyü no n niepuu, Jihova kenhekelieu pfhe balie mote. Tsie mehoshücie, kediu tsü khieki keba rüngouu morei dzübouu kirapuo bata ga?” sishü.

¹⁷Saul David pfhe silie di sie, “A nuo David, hau n pfheü zo me?” si. David sie, “Hau a pfhe zo, a niepuu, he-i kediu” sishü.

¹⁸Sitse puo pu sa di, “Kiüdi a niepuu puo kituou whuo tuo zote shi? A kedipuo chüwata ga? Kejokemou kikecüpuo a dzie nu tuote mu?

¹⁹Süla tsie a niepuu kediu bu puo kituou pfhe rünyüshücie. Mhanuü Jihova n hüshü di n bu sier a petsouta üliro, puo bu ruosuo puo lieliecie; derei mhanuü süue themia geinuta üro, uko bu Jihova mhodzü rüsepfütacie, kekreilamonyü ukoe Jihova kayie kha a ketsü a yau nunu thie a whuowa, sidi sie ‘Vo di terhuo kekrei lie chütacie’ ite.

²⁰Süla tsie Jihova mhodzünu a zie bu kru kijü tsuta hiecie; kekreilamonyü mia puo kijüthouko gei pera petuoü rühouketuo tuoi Israel kediue a kerheiro rübei pfhütuoü parte” sishü.

²¹Sitse Saul sie, “A kekrüwate; la vortalie, a nuo David, a mhakipuorei n pechü salie lho, kekreilamonyü thie a kelhoue n mhiki puoma rete; a nya tuote, mu kekrü pezha phiwate” sita.

²²David sie, “He-i kediu, rüngouu sü hau! N khriesako mia puo bu phir hau pieliecie.

²³Jihova themia kehoupuorei puo kemiatho mu puo kedietho ki ze zhakhra chüshüya; kekreilamonyü thie Jihova n khapie a dzienu shü zo, derei a a dzie yhapie Jihova kenhekelieu gei shü mo zo.

²⁴A mhi ki n kerheiro puoma kere tuoi, sütuoi a kerheiro bu rei Jihova mhodzünu puoma kere puo chülieyi, sidi kemezhiekecü pete nu a kelashü üthienyü” sishü.

²⁵Sitse Saul sie David ki, “A nuo David, thejakepfüu chücie! No mha kekra chütuo mu süko nu vilielie zotuo” sita. Siro David puo cha nu vota; mu Saul la se puo chü nu vorta.