Read Angami Naga Samuel Kerieu 27 Bible Online

Samuel Kerieu 27 - Angami Naga bible

Samuel Kerieu 27

¹Siro David-e puo thuo puo nou nu, “A khunhie puo Saul dzie nunu katatie; a ta mhai Filistinmia kijü nu voketa ki a la kevi ba sa mote; sitse Saul-e Israel tierieko donu a pfhü sa motatuo, mu a puo dzie nunu talietuo” si.

²Süla David-e sielie di tuota, puo mu puo zeketuo mia krie sorou, sidi Gath kediu Maok nuou Akish ki vota.

³David-e Gath nu Akish ze bata, puo mu puo chüpahiko, mia puopuokecü u kikru sa phre, mu David puo kimianie Jezrilpfü Ahinoam mu Karmelpfü Abigail, Nabal kimiapfü.

⁴Siro David-e Gath nu ta voketa Saul ki pushü tse, puoe puo pfhü sa mota.

⁵Süsie David sie Akish ki, “Mhanuü ae n mhi ki n neichülie üro, rüna nu thechü puo khapie a tsü di a bu lhou batacie; kekreilamonyü kiüdi n kituou n ze kedi nadi nu lhou balie vituo mu?” sita.

⁶Süki Akish-e sünhie nu Ziklag khashü, süla Ziklag thie ketso rei Juda kediko vie chütuo zo;

⁷sidi David-e ciete puo di khrü dia Filistinmia rüna nu lhou.

⁸Siro David mu puo themiako kho di Geshurmia, Girzitmia mu Amalekmia re; kekreilamonyü Shur nunu Ijipt kijü nu kevo thiedzü kelhoumiakoe kijü sünu lhoukecü la.

⁹Sidi David-e kijü süu pekawa, thepfumia morei thenumia shierei peshashü mo, sidi tekuo, mithu, gada, ut tsiu pfhemeneiko chülie di la Akish nu vorta.

¹⁰Siro Akish sie, “No thie supuo re ga?” idi ketso. Sitse David sie, “Juda Negeb-u perhie,” morei “Jerahmilmia Negeb perhielie,” isituo, morei “Kenmia Negeb perhielie” isituo.

¹¹David-e thepfu rei thenu rei perhei di ze Gath nu vor mo, puoe, “Ukoe hieko dze pu di sie, ‘David-e sükemhiekecü chüshüwe’ idi puta rei si mo mu” idi leketa la. Puoe Filistinmia rüna nu lhouketuo chie puo zhorüli sikecü rhi se tuo tso.

¹²Akish-e David peleta, puoe lecü, “Puo themia Israel bu puo ngumecü lotsota; süla puoe a kituo chü sei tuotatuo” ikecü la.