Read Angami Naga Samuel Kerieu 28 Bible Online

Samuel Kerieu 28 - Angami Naga bible

Samuel Kerieu 28

¹Süki Filistinmiako Israel ze terhüchütuoü uko chüpahiko kengu phrelie. Sitse Akish-e David ki, “No mu n themiako a ze terhü nu pra tou zotuokecü no si ba zo mecie” sita.

²Sitse David-e Akish ki, “Viwe, no n kituou kedipuo chülie vi ba shi si ba zotuo” sishü. Akish sie David ki, “Viwe, a n chüpie a kerheichie la a kepfheu chütatuo” sita.

³Tsie we Samuel siate, mu Israel pete puo krükra sidi puo pie puo nadiu Rama nu khruwa. Saul-e puo kijü nu themouko mu kemeduomiako whuo phrewata.

⁴Siro Filistinko kengulie di vor Shunem nu razhüchü balie. Saul rei Israel pete kiekengulie, sidi uko vor Gilboa nu balie.

⁵Siro Saul-e Filistinko chüpahi ngushü tse, michieta mu puo melou perüshürüsata.

⁶Sidi Saul Jihova ketsokecü ki, Jihovae puo mho nu morei Urim geinu, morei siedzekesiko geinu rei puo die kelashü mota.

⁷Sitse Saul sie puo kituoko ki, “A la themouyakecü thenumiapfü puo pfhüshücie, siro a vo di puo ki mha ketsolietuo” sita. Sitse kituoko sie puo ki, “Endor nu themoumiapfü puo balie” sishü.

⁸Süla Saul puorhi chüpekreipfülie mu pfhenei kekrei selie di sünu mia kenie bu puo ze vo. Ukoe theva zenu thenupfü ki vor. Sidi puo sie, “A la ruopfü puo ketsoshücie, sidi a puo za se n ki pukeshüu ze vorcie” sita.

⁹Thenupfü sie puo ki, “Noe Saul mhachükeshü pete si tou ba ze, kimhie di puo themoumiako mu meduoyakezhako kijüu nunu peka phrewate shikecü. Siüro no kidi a bu siatatuoü di kebie pethoupie ba ga?” sita.

¹⁰Derei Saul-e Jihova za se rüse di, “Jihova rheiketuo mhie, mhahau la kepechü puorei se vor n geishülie lho” sita.

¹¹Sitse thenupfü sie, “A bu n la supuo ze vorta?” sishü. Puo sie, “A la Samuel ze vorshücie” si.

¹²Ru thenupfüe Samuel ngu tse, puo melie shiekhouita; sidi thenupfü Saul ki, “No kiüdi a seya ga? No Saul ze!” sita.

¹³Sitse kediu puo ki, “Michie hiecie; no kedipuo ngu ga?” sita. Thenupfü Saul ki, “Ae terhuo[37] puo kijü nu sierketa ngu” sishü.

¹⁴Puo sie hapfü ki, “Puo kengu kimhie ga?” si. Hapfü sie, “Ketsamia puo khorzhie; pfhe pie puo kezipfü di” sishü. Süla Saul-e süu Samuel keta silie, sidi puo zie pesupie kijü merelie di nerhu tsu zhüta.

¹⁵Sitse Samuel Saul ki, “No kiüdi a ze khor a kebvüya ga?” sita. Saul sie, “A nou kemezhiethorte, kekreilamonyü Filistinko a ze terhü chütuoü bate, mu Ukepenuopfü a kinu rüreite sidi a pfhekho sa mote, siedzekesiko morei a mho geinu rei silie mote, süla a bu kedipuo chütuo shi no se a ki pucie” sita.

¹⁶Samuel sie, “Jihova n kinu rüreita, sidi n ngumvümia chütaü ro kiüdi a ketsoya ga?

¹⁷Jihova a geinu pukeshü mhie n gei chüshüwate ho; kekreilamonyü n dzie nunu n kedirüvie cierhawate, sidi süu khapie n zanuou David tsüwate.

¹⁸Kekreilamonyü no Jihova pfhe zelie mote, mu Amalek gei puo noupfhünouyie kereu chüshü mo. Süla Jihova thie n gei mha hau chüshüzhie.

¹⁹Sizomoü Jihova n sa di Israel khapie Filistinmia dzie nu shüwatuo; sidi sodu no mu n nuonuoko vor a ze batatuo; siro Jihovae Israel rüpfhünuo rei khapie Filistinko dzie nu shüwatuo,” sita.

²⁰Sitse Samuel dieko la Saul-e michie di te mhai tsu kijü vazhapfü zhüta, mu kekuo puorei puo gei tuo mota, puoe teisozha pete mu teizeizha pete mhapuorei cükemo la.

²¹Siro thenupfü Saul ki vor, mu hapfüe puo michie se zhüketa ngu tse, puo ki, “N kituopfü n pfhe rünyüliete, mu a a kelhou pie kemichie nu shüshü, sidi no kedipuo a ki pu shiü rünyüliete.

²²Süla tsie, no rei n kituopfü pfhe rünyüshücie; a bu kecüca se vor n mhodzünu shücie. Sidi mhacülie, sitse no n cha nu vokezhü ki kekuo ngulietuo” sishü.

²³Derei puo mvüta, sidi sie, “A mhacülie lho” sita. Derei puo kituoko mu thenupfü puo ki pu beita, süla puo uko die zelie. Süla puo kijü nu sielie di pfü thezhü gei balie.

²⁴Thenupfü kinu mithunuo keluo yopuo tha. Hapfü süu dukhri mhailie, mu puo thoulha pielie di süu nelie, sidi khreiüsakemo niekhrüda rielie.

²⁵Puo süko pie Saul mu puo kituoko mhodzünu shü, ru uko cülie. Süsie uko sielie di süzhü tuo lata.