Read Angami Naga Samuel Kerieu 29 Bible Online

Samuel Kerieu 29 - Angami Naga bible

Samuel Kerieu 29

¹Filistinmia u chüpahiko pete ze vo Afek nu kengulie, mu Israelko rei vor Jezril nu dzüluoki khieki nu razhüchü balie.

²Siro Filistinmia niepukoe mia thekriekrie mu nyienyie di vota tse, David mu puo themiako Akish ze di puo sietsa vota.

³Sitse Filistinko nyie mhokezhau sie, “Ibri hako hakinu kedipuo chü ba ga?” silie. Sitse Akish-e sie Filistinko nyiemhokezhau ki, “Hauha David, Israel kediu Saul kituou, teisozha huo mu teicie huo a zetuoketau moü me? Siro puo vor a zetuokelie nunu vor thie haketso puo kejo yopuorei ngulie molie” sishü.

⁴Derei Filistinko nyiemhokezhau puo gei puo nei mota; sidi Filistinko nyie mhokezhau puo ki, “Themiau ketse lawacie, sitse puo no khapie puo ketsü thechüu nu la votatuo; puo bu u ze di tsu terhüchülie lho, terhü kegeikecü ki puo u ngumvü chüta rei silie lho mu. Kekreilamonyü themia hau kimhie di puo thuo puo niepuu ze kezevilie shi? Süu pie themia hako tsü gei keshü mese moü me?

⁵Hauha David, uko keli mu u dowhuo di huoniehuo ki, ‘Saul-e puo mia nyienyie dukhri, mu David we mia nyie kerür dukhriwa’ ikecüu mo me?” sita.

⁶Sitse Akish David kielie di sie, “Jihova rheiketuo mhie, noe miatho tuo zo, siro razhüchü nunu rüpfhünuoko ze pra mu lekecü a mhiki we vi zo; kekreilamonyü no a ki kevor nhienu vor thie ketso kekrükecü puorei chü mo. Sizoürei niepuko n ze ba nyü mote.

⁷Süla tsie latalie; mu n nou mene di voliecie, mu no Filistinko niepuko neikemo puorei chü hiecie” sishü.

⁸Sitse David sie Akish ki, “Derei a kedipuo chüwata ga? A n ze ketuo yawinu vor thie ketso no n kituou gei kedipuo ngu di a bu vo a niepuu kediu ngumvümia ze kegei lhoüta ga?” sita.

⁹Sitse Akish David die kela di, “Noe Ukepenuopfü dieliemia tuoi a mhodzüki kejo jükecü a si zo, sirei, Filistinko nyie mhokezhau sie, ‘Puo bu a ze terhü nu vo suo’ itelie.

¹⁰Süla khise sie zilie sidi no mu niepuu kituo n ze kevorko ze a thechü thapie n ketsü nu votalie. Siro puotou kemo die hau pie n noushü se tuo hie, kekreilamonyü no a mhodzüki mhachü pevi phishü zo. Süla khiserüna dojülie di teiso vor mumetha tuotacie” sita.

¹¹Süla David mu puo themiako Filistinmia kijü nu la votatuoü khise rüna tuota. Derei Filistinko Jezril nu khota.