Read Angami Naga Samuel Kerieu 3 Bible Online

Samuel Kerieu 3 - Angami Naga bible

Samuel Kerieu 3

¹Siro unuoyo Samuel-e Eli ze di Jihova mhodzünu chalie chü. Süteiki Jihova die kevortsa phi, mu pengukeshü kra mo.

²Si tuo di Eli-e puo mhi thachü mu mhangu merü phita mu puoe puo zhü nu zhü.

³Ukepenuopfü mitubou pemhe mo ba zoluo, mu Samuel rei Ukepenuopfü dietseidiekhobouu keba Jihova rüsuokiu nu zhü.

⁴Sitse Jihovae sie, “Samuel, Samuel” isi ru puoe sie, “A haki bawe” sishü.

⁵Sidi puoe ta Eli ki vo di sie, “A haki bawe, no a kiekecü la” isi. Derei puoe sie, “A n kie mo; vo zhü latalie” sita. Süla puo la vo zhüta.

⁶Süsie Jihovae kie la di, “Samuel” isi la; sitse puo sielie di ta Eli ki vo di, “A haki bawe, no a kiecü la” si lashü. Eli sie, “A nuo a n kie mo, la vo zhütalie” si.

⁷Siro tsie ketso rei Samuel-e Jihova si moluo, mu Jihova die rei pie puo pesipengushü mo zoluo.

⁸Jihovae va seu Samuel kie la, sitse Samuel sielie di ta Eli ki vo di, “A haki bawe, no a kiekecü la” sishü. Sitse Eli-e Jihovae unuoyo kiekeba silie.

⁹Süla Eli-e Samuel ki, “Vo zhütalie, sidi puo n kie la liro noe sie, ‘Pushücie, Jihova, n kituoue rünyü bawe’ ishülie” sishü. Süla Samuel-e la vo di puo zhü nu zhüta.

¹⁰Sitse Jihovae vor thalie di puo ki, “Samuel, Samuel” idi puo kie; sitse Samuel-e sie, “Pushücie, Jihova, n kituou n pfhe rünyü bawe” sishü.

¹¹Süki Jihovae Samuel ki, “Harie, a Israel donu mha puo chüshütuoüzhie, mu süu kesi pete u nyieto kenienie mezatatuo.

¹²Sünhie ae Eli kikru gei chüshütuoü pukeshüko pete therie nu thela ketso chü tseishütuo.

¹³Kekreilamonyü a puo kikruu ketsotuoükecü puo ki pushüwate, mu kikru kephouma süu puo thuo si ba, süusü puo nuonie Ukepenuopfü pesekecü chü[5] mu puoe unie kekhalie mote.

¹⁴Süla Eli ki rüseshüwate, süusü ruosuo mu mha khakeshü se Eli kinuko kephouma chükemesalie kelho chüwate” sita.

¹⁵Sidi Samuel-e teiso ketso zhü di khise sie Jihova kiu kikhako khrüshü. Tsiu puo pengukeshüko pie Eli ki pu michieta.

¹⁶Derei Eli-e puo kie di, “A nuo Samuel,” si. Ru Samuel-e sie, “A haki bawe” si.

¹⁷Sitse Eli-e sie, “Jihova n ki kedipuo pu ga? A ki mhapuorei kevie hie; siro puo pukeshüko noe mha huo kevieta ro, Ukepenuopfü bu sükemhie mu sükezie rei chüpie n gei shütuo” sita.

¹⁸Süla Samuel-e mhapuorei kevie mo di pete se puo ki pushü. Sitse Eli-e sie, “Süu Jihova zo. Puo bu puo mhiki mezhüükecüu chüliecie” sishü.

¹⁹Siro Samuel zha miemie sielie, mu Jihova puo ze tuolie, mu puo dieko puorei bu te kijü tsuta mo.

²⁰Siro Dan nunu vo Beersheba ketso Israelmia pete rei Samuel-e pelelie kesü Jihova siedzekesimia puo ücü sita.

²¹Tsiu Jihovae Shilo nu ba zota, Shilo nu puo die nunu puo thuo Samuel pengushüshütakecü la.