Read Angami Naga Samuel Kerieu 30 Bible Online

Samuel Kerieu 30 - Angami Naga bible

Samuel Kerieu 30

¹Siro zha se nhie David mu puo themiako Ziklag nu vor tse Amalekkoe Negeb mu Ziklag perhie. Sidi ukoe Ziklag perhie di süu mi pie thewa,

²tsiu thenuko mu sünu keba kecükezha pete teze kediechü vota; ukoe süko puorei dukhriwa mo, derei süko zeta, sidi uko cha nu vota.

³Siro David mu puo themiako nadi nu vor tse, ukoe süu thepie zhükewa mu uko kimianuoko mu u nuonuo thenu rei thepfu rei ze kediechü phreketa ngulie.

⁴Sitse David mu puo zeketuo themiako uko pfhephra sie di krata, sidi uko kekuo jüta kemochie kra bata.

⁵Siro David kimia kenienie Jezrilpfü Ahinoam mu Karmelmia Nabal kimiapfü Abigail rei tezeta.

⁶Süla David-e kemichie se puo nu bata; kekreilamonyü themiako ketsie pie puo pewatuoü putacü la, themia pete u nuonuo thenu rei thepfu la rei u nousuo phi bata. Derei David we puo Kepenuopfü Jihova nunu puo thuo puo chüpekuolie.

⁷Sitse David-e sie Ahimelek nuou Abiathar zievo-u ki, “Zievomia boulieu se a ki vorcie” sishü. Süla Abiathar zievomia boulieu se vor David tsüshü.

⁸Sitse David sie Jihova ketso di, “A bu themia kro hau whuotuo me? A uko mho kuolietuo me?” idi ketsota. Süki puoe puo die kela di, “Whuo volie, kekreilamonyü no uko mho kuo toulietuo mu uko kela lalie tou zotuo” si.

⁹Süla David tuo vo, puo mu puo zeketuo themia krie sorouko. Sidi uko Besor rücüu nu vorlie tse sünu mia sie baketuoko bu bata.

¹⁰Derei David-e tuozhü zo, puo mu mia krie diako; mia krie kenie khapie bawa. Ukoe meziethor vo Besor rücüu ciepralie kenjüta.

¹¹Ukoe rünau phouyo nunu Ijiptmia puo ngulie, sidi puo ze David ki vor. Sitse uko niekhrüda pie puo tsüshü mu puo süu cülie; uko dzü pie puo bu krienu di khashü;

¹²uko chiede niekhrüda da puo mu khube kro puo rei sa pie puo tsüshü. Sidi puo mhacülieta tse; puo shürhei la vorlie; puo teisozha se mu teizeizha se mhacümhakrie mo tuoketa la.

¹³Siro David puo ki, “No kiramia ga? No kirapuonu vor ga?” sishü. Sitse puo sie, “Ae Ijiptmia khriesa kemedzü yopuo zo, Amalekmia kituo chüya. Sirei a niepuu zha se voketa ki a mhachüketa la a khawate.

¹⁴Siro hieko Keretmia Negeb nu kebako mu Juda viekecüko, tsiu Kaleb Negeb re tsu; sidi hieko Ziklag thewa” sishü.

¹⁵Sitse David sie puo ki, “No a ze mia rekecü kro hau nu voshütuo me?” sishü. Puo sie, “No Ukepenuopfü za se a dukhriwa lhoücü morei a khapie a niepuu tsüwa lhoücü rüseshülie, sitse a n ze tsu uko ki shütuo” sita.

¹⁶Sidi puo puo ze ke tse uko kijü pete ketshu chüpfü ba, ukoe Filistinmia kijü mu Juda kijü nu mha kekra vakelie la, mhacümhakrielie, tsiu u dowhuo ba.

¹⁷Sitse David-e teizei geinu uko re zo ba süsienhie thevatie ketso. Miapuorei lhieshü mo, khriesamia mia krie dia, ut geinu taketako zo kemosie.

¹⁸David-e Amalekko bu toupfüketa pete ngu lalie mu David-e puo kimia kenienie rei kela lalie.

¹⁹Mhapuorei pejüwa mo, mha kecükezha, u nuonuo thenu thepfu rei, mhapekakelie morei ukoe seketa mhapuorei tso mota mo, sidi David-e mha pete se la vorlie.

²⁰Siro David tekuo kro mu kiri kro te lalie, süko puo mhodzü whuo zetuo; sitse themiako sie, “Hako David-e pekakeliekowe” sita.

²¹Süsie David-e mia krie kenieko meziethorketa la David siemedzilie kenjüketako, vo di Besor rücüu nu khapie bakewako ki vor. Uko David mu puo ze vorkezhüko ze kesetuoü par. Mu David-e themiako puo penuo vor tse, puoe uko kelushü.

²²Sitse themia kesuo mu puotou kemoko David ze kevoko pete sie, “Kekreilamonyü ukoe u ze vo kemo la, hie mhavakelie puorei pie uko tsülie lho, u thuo u kimianuo mu u nuonuoko zelie di tuotalie,” ilie.

²³Derei David sie, “Nieko bu Jihova khapie u tsükeshüko se silie lho, a siezeko; puoe u sebalie mu vor u petsou di u rekecü kro-u pie u dzie nu shü.

²⁴Supuonie mha hau nu nie pfhe rünyü ta? Kekreilamonyü terhü kegeikecü nu keprau, siro mhanya pfhekebau unie zae ketou zotuo” sita.

²⁵Siro sünhie yawinu puoe süu pie Israelko la thezho mu ze morokesuo zho chüwa; süu thieha ketso rei si tuoya zo.

²⁶Siro David Ziklag nu vor tse, puo mha vakelie huo ketsepie Juda phichüko puo zeko tsü di pukecü, “Hakinu Jihova ngumvümia vie pekakelie ketsepie nie tsüshüzhie” ishü.

²⁷Sidi Bethel nu kebako, siro Negeb Ramoth nu kebako, Jatir nu kebako,

²⁸Aroer nu, Sifmot nu, Eshtemoa nu.

²⁹Rakal nu, Jerahmilko rünako nu Kenmiako rünako nu.

³⁰Horma nu, Bor-ashan nu, Athak nu,

³¹Hebron nu, David mu puo themiako rühou tuoyakezha thechü pete nu shü.