Read Angami Naga Samuel Kerieu 31 Bible Online

Samuel Kerieu 31 - Angami Naga bible

Samuel Kerieu 31

¹Siro Filistinko Israelko perhie; mu Israelko Filistinko mhodzü tata, mu mia kekra Gilboa Kijüthou geinu tetsuta.[38]

²Siro Filistinko Saul mu puo nuonuoko mho kuolieta; sidi Filistinkoe Saul nuonuoko Jonathan mu Abinadab tsiu Malkhishua dukhriwa.

³Siro terhüue Saul gei re seta; süki theükepieko puoe uko geinu rüza pesuo sekewa ngulie.

⁴Sitse Saul sie puo rünyie kepieu ki, “N zhiecha shüzoulie di süu pie a zewacie, sitse u zhürekemo hako vor di a pie rüzhüwa molietuo” sita. Derei puo rünyie kepieu puo medo mota; kekreilamonyü puo bie kemide sewaketa la. Süla Saul puo thuo puo zhiechau zulie di te sügei tsuta.

⁵Siro puo rünyiekepieu rei Saul siaketa ngu tse, puo rei te puo zhiechau gei tsu sidi puo ze siazhüta.

⁶Sidi Saul mu puo nuonuo seko tsiu puo rünyiekepieu siro puo themia pete keze khunhie se chüta.

⁷Siro Israelmia razha lutsakhie ketuoko mu Jordan khie lutsa ketuokoe Israelko taketa mu Saul tsiu puo nuonuoko siaketa ngu tse, ukoe u rüna khawa di tata; sitse Filistinko vor di süko nu lhouta.

⁸Süsienhie, Filistinko kesiamia vie rhuolietuoü vorkecü ki, ukoe Saul mu puo nuonuo seko Gilboa kijüthou geinu siakezhü ngulie.

⁹Sitse uko puo tsü zielie, puo rünyieko rhuolie, sidi dieliemia ketsepie Filistinmia kijü pete nu rüsuokiko nu mu themiako pete ki thedze kevi süu pu pesishünu ketseshü.

¹⁰Sidi ukoe puo rünyieko pie Astarte rüsuokiu[39] nu bawa; mu puo mo-u pie Beth-shan sozha gei phapie zhawa.

¹¹Derei Jabesh-gilid nu kelhoumiako Filistinko Saul gei chükeshüko sishü tse,

¹²themia kethepfu khe sielie di teizeizha pete tuo vo di Beth-shan sozha geinu Saul mu puo nuonuoko mo chülie. Sidi uko Jabesh nu vorlie di sünu nu uko thewa.

¹³Süsie uko ruko chü se vor Jabesh nu tamarisk bo puo khronu khruwa, di zha thenie mevo.