Read Angami Naga Samuel Kerieu 4 Bible Online

Samuel Kerieu 4 - Angami Naga bible

Samuel Kerieu 4

¹Siro Samuel die Israel pete ki vor. Süteiki Filistinko Israel ze terhü chütuo üdi puo kezulie, mu Israel rei puo petsoutuo üdi pra. Siro Israelko Ebenezer nu mu Filistinko Afek nu idi razhüchü balie,

²mu Filistinko Israelmia perhietuoü jiepfü thalie di uko pra terhü chü tse, Filistinko bu Israelko penyüwa mu rüyachü nunu uko mia nyie dia dukhriwa.

³Tsiu rüpfhünuoko razhüchü nu la vorlie tse, Israel nu phichükoe sie, “Kiüdi thie Jihovae Filistinko mhodzünu u gei keka hau se vorshüta mu? Úko vo Shilo nunu Jihova dietseidiekhobouu se haki vorta khe, sidi puo bu vor u donu bakelie sie u ngumvümia dzie nunu kelalie rei si lho mu?” sita.

⁴Süla ukoe themia ketseshü di süko bu Shilo nu krodiko Jihova dietseidiekhobou, puoe sünu Cherub nie gei bayakezhau se vorlie. Tsiu Eli nuo Hofni mu Finehas unie sünu Ukepenuopfü dietseidiekhobouu ze tuo.

⁵Sidi Jihova dietseidiekhobouu se razhüchüu nu vorlie tse, Israelmia pete shie petoshü ru kijüu va keza vota.

⁶Siro shiekeshü pfhe sishü tse, Filistinkoe sie, “Ibriko razhüchü nu shiekeba kedipuo la ga?” sita! Süsie ukoe Jihova dietseidiekhoubouu razhüchü nu vortaükecü silie.

⁷Sitse Filistinkoe süu la michieta mu uko par di, “Terhuomia uko razhüchü nu vorte,” sita. Tsiu ukoe sie “Co, úko chülietie! kekreilamonyü thiedzü hakemhie chü chie mo eru.

⁸Úko sü chülietie! Supuo terhuo kezha hako dzie nu u kelashülie vituo ga? Sükoe nhatsa nu thepetheruo khe se Ijiptmia pekakewa terhuoko zo.

⁹Thepfulie mu meteilie Filistinko, sidi thepfumia tuoi dojülie; mo liro Ibrimia nie diechü ketuo tuoi nie rei Ibrimia die chütatuo. Thepfumia chüterhü chücie,” sita.

¹⁰Sidi Filistinko pra terhü chü, ru Israelko penyüwa mu ukoe tata, u thuo ta u kinu vota. Siro themia rei geithorwa, sidi Israelmia thephi rüpfhünuo nyie ser tetsuta.

¹¹Siro mia bu Ukepenuopfü dietseidiekhobouu telieta, tsiu sünhie Eli nuo Hofni mu Finehas unie rei siata.

¹²Sünhie Benjaminmia puo terhü nunu talie di Shilo nu vor, tsiu puo pfhe cierha mu nyophe pie puo tsü gei shüpfü tuo.

¹³Puo vor tsolie, sükisü Eli-e cha khieki theba puo geinu pfhe ba, puoe Ukepenuopfü dietseidiekhobouu la puo melou pebaketa la. Siro themiau nadiu nu lelie di kedipuo chüte shikecü dze pushü tse, nadiu nu pete kra shiekhouita.

¹⁴Mu Eli-e kekrapfheu si tse, “Themia krodi pfhe hau kiüta ga?” isi. Sitse themiau rükri ta Eli ki vor di pushü,

¹⁵sükisü Eli-e cie hiethepfüethethata, siro puo mhi merüta mu mha ngulie kenjüta.

¹⁶Themiaue Eli ki, “Rüyachü nunu a taliete, sidi thie a ta zo vorzhülie” sishü. Sitse Eli-e sie, “Kedipuo mhieta ga? A nuo” si.

¹⁷Sitse themiau sie puo ki, “Israelko Filistinko mhodzü thalie mote, siro rüpfhünuoko rei biethorwate, sizomonyü n nuo Hofni mu Finehas unie rei siate, mu mia bu Ukepenuopfü dietseidiekhoubouu rei teliete” sishü.

¹⁸Siro puoe dietseidiekhobouu dze pushü tse, Eli-e puo ba nunu mela tsu puo vo kesetshiewa di siata, puoe tsa mu mesi baketa la. Puoe cie hiedia Israel capi chü.

¹⁹Sitse puo miepfü, Finehas kimia phoupie mo tuo di nuoze tei tso bata. Mu puoe Ukepenuopfü dietseidiekhoubouu teseketa, tsiu puo meiu mu puo nupfu siaketa silie tse, puo nuonuo vachü puo gei vorta, di puo thuo nuketsu di penuoshü, (derei puo mhachü la lasielie mota),

²⁰Tsiu puo siatazhücü ki, puo thekepfükoe sie, “Michie hiecie, no thepfunuomia puo penuoshüte ho,” sishü. Derei hapfüe uko pfhekho mota, mu uko dieü mhaü mota.

²¹Sidi puoe unuoyo zathopie Ikabod chülie, puoca, “Zapuzayieu Israel kinu tuote,” si. Mia bu Ukepenuopfü dietseidiekhoubouu telieta tsiu puo meiu mu puo nupfu rei siaketa la.

²²Sidi puoe sie, “Zapuzayieu Israel kinu tuote, Ukepenuopfü dietseidiekhobouu telieketa la” isi.