Read Angami Naga Samuel Kerieu 5 Bible Online

Samuel Kerieu 5 - Angami Naga bible

Samuel Kerieu 5

¹Filistinkoe Ukepenuopfü dietseidiekhobouu tekelie sie, Ebenezer nunu se Ashdod nu vorta.

²Sidi ukoe süu pie Dagon rüsuokiu nu vor di Dagon khieki pie bawa.

³Siro süsie nhie Ashdod nu themiako khiserüna vor ru, harie! Dagon sü puo zie pesu di tetsu Jihova dietseidiekhobouu phinu zhü ngulie; süla ukoe Dagon pie la sie puo thanu shüshü.

⁴Derei uko süsieduü rüna la sier ru, harie! Dagon-e puo zie pesu di tetsu Jihova dietseidiekhoubouu mhodzünu zhü di ngu lalie, tsiu Dagon tsü mu puo bounie tetsu kiluo nu zhüta di puo mo-u rübei kezhü zota.

⁵Süla thie ketso Dagon zievo-u shierei morei kekreimia rei Dagon rüsuoki nu kevor pete rei Ashdod nu Dagon kiluo nu kedeya mo.

⁶Siro Jihova dzieu Ashdod mu sükhiesümhou rüna pete nu themiako gei re se di uko pekata di tichü sa se vor uko pechüpenyü phita.

⁷Mu Ashdod nu themiako mha hako ngu tse ukoe “Israel Kepenuopfü dietseidiekhobouu bu u donu ba sa suote, puo dzie u gei, tsiu u rhuo Dagon gei rethorte” sita.

⁸Süla uko Filistin krütako kelie ze vorlie di sie uko ki, “Israel Kepenuopfü dietseidiekhobouu pie kedipuo chü ro vituo ga?” ita. Sitse Gad nu kelhoukoe, “Ukepenuopfü dietseidiekhobouu pie hie pelewalie” ita. Süla ukoe Israel Kepenuopfü dietseidiekhobouu pie tsu Gad nu shüwa.

⁹Derei uko süu pie tsu Gad nu shü tse, Jihova dzie-e nadi sünu themiako pechü vüta, süki themiako michie kemerie chüta. Sidi puoe nadiu nu themiako phichü nhicu pete gei tichü bu kemerie chüsierta.

¹⁰Süla ukoe Ukepenuopfü dietseidiekhobouu pie Ekron nu tsuwa. Derei sünu Ukepenuopfü dietseidiekhobouu pie Ekron nu tsulie tse, Ekron themiakoe sie, “Israel Kepenuopfü dietseidiekhobouu pie vor u donu shü di u mu u themia dukhriwatuoüzhie” sita.

¹¹Süla uko Filistin krütako kelieshü di uko ki, “Israel Kepenuopfü dietseidiekhobouu ketse lawaliecie, puo bu puo tha nu la votacie, sidi süu bu we rei mu u themia rei dukhri motalie” sita. Kekreilamonyü kemichie thuo nadiu tshuta, mu Jihova dzieu themiako gei rethorta.

¹²Siro themia sia hu kemoko zorei tichü kere se bu u biewa, mu nadiu nu kekrapfhe si kho teigei tsota.