Read Angami Naga Samuel Kerieu 6 Bible Online

Samuel Kerieu 6 - Angami Naga bible

Samuel Kerieu 6

¹Siro Jihova dietseidiekhobouu Filistin rüna nu khrü thenie bata,

²sitse Filistinkoe zievoko mu themouko kielie di sie, “Hieko bu Jihova dietseidiekhobouu pie kedipuo chü ro vituo ga? Kimhie di ketse lapie puo tha nu shü ro vituo shiü hie ki pushücie” sita.

³Sitse ukoe sie, “Mhanuü nieko Israel Kepenuopfü dietseidiekhobouu ketseshütuoü liro, süu methuo ketseshü hie, derei nieko kehoupuochü rei jokewa ruosuo puo sa di khashüwaliecie, silie ro nieko shürholietuo, mu nieko rhalietuo, siro nie geinu puo dzieu teshü lalie lho me?” sita.

⁴Sitse ukoe sie, “Kejo ruosuo kimhiecü puo se puo tsütuo ga?” sita. Ru ukoe sie “Filistin niepuko mia kitsuo shikecü rhi nu suna pie kechü tichü miarhi pengou mu suna pie kechü thezu miarhi pengou khashütuo; thepetheruo puo nie gei mu nie niepuko gei tuotakecü la.

⁵Süla nieko nie kijü bie pesuokewa tichü miarhi mu thezu miarhi rhiliecie, sidi zapuzayie pie Israel Kepenuopfü tsüliecie, silie ro puoe nie gei, tsiu nie rhuoko gei mu nie kijü gei puo dzie kethelie rei si lho mu.

⁶Kiüdi Ijiptmia kediu mu puo themiako mhiei nie nou re ba zotuo ga? Puo kepechü se pethashü tse, ukoe Israelko bu tuotanu uko ketsewa di uko bu tuo uko chanu vota mo me?

⁷Süla tsie gari kesa puo chülie, siro puo nuo noukeba thukrü vocie pfü chiekemo kenie selie. Sidi thukrünie pie gari gei kheshülie, derei puo nuonie ze vo kinu khepie bawalie.

⁸Sidi Jihova dietseidiekhobouu pie gari gei shülie, mu nieko kejo ruosuo la suna se chüpie kebako pie puo khieki mhabou puo nu shülie, di ketsewalie, mu puo thuo ta puo cha nu votalie.

⁹Mu süu meho balie, mu harie, mhanuü süue puo thuo chau ze di Beth-shemesh nu vota liro, puo thuo kepeka hau se vor úko gei shü zo, derei simo liro thepe hau puo kinu vor mo, sirei kethekhrücü puo geinu vor ücü silietuo” sishü.

¹⁰Sitse themiakoe sükemhie chülie, sidi thukrü kenie ze vor di sünie pie gari gei khelie, mu puo nuonie pie kinu khewa.

¹¹Siro ukoe Jihova dietseidiekhobouu pie gari gei shülie, mu suna pie kechü thezu mu tichü miarhibouu sa di khashüwa.

¹²Sitse mithunie-e Beth-shemesh chau ze mezhü zo vota, sidi rürei thezatsa morei thevitsa rei va chiemo di chaüu ze tuo chakhrie mo zo vota. Tsiu Filistin kediko rei Beth-shemesh tierie nu ketso sünie siepie vo tso.

¹³Süteiki Beth-shemeshmia kijü razha nu thoulha re ba, sidi uko tosie ru, dietseidiekhobouu ngushü, sitse uko uko nei phi di vo süu ze kese.[6]

¹⁴Siro gariu Beth-shemeshmia Joshua lie nu lerlie, di thata, süki ketsie kezha puo zhü; sitse themiakoe gari seiko phrolie, thukrünie dukhrilie di kethe ruosuo chüpie Jihova tsü.

¹⁵Siro Levimiakoe dietseidiekhobouu mu suna miarhiko puo nou ketuo mhabouu se kerlie, di süko khapie ketsie kezhau gei shüwa. Mu sünhie Beth-shemesh themiako kethe ruosuo mu khakeshü ruosuo chüpie Jihova tsüshü.

¹⁶Tsiu Filistinmia niepu pengoukoe süu nguwata tse, ukoe sünhie la Ekron nu vota.

¹⁷Filistinmiako jokewa ruosuo la suna pie kechü tichü miarhi pengouko, nadi hako la, puopuo khashü; Ashdod, Gaza, Ashkelon, Gath, mu Ekron.

¹⁸Tsiu siro suna zuko rei Filistinmia niepu pengouko rüvie nu keba rünako la puopuo, mu dahou houkewa nadiko, siro Jihova dietseidiekhobouu khapie keba tsiediu pie zhapu puo chü di Beth-shemeshmia Joshua lie nu zhüya zo.

¹⁹Siro Beth-shemeshmiako Jihova dietseidiekhobouu zekelie[7] ki, Jekonia yiemiako uko ze di u neilie mota. Süla puo bu uko mia hiethenie dukhriwa.[8] Sidi themiako bu thekrü chü phi, Jihovae themia dukhri phikewa la.

²⁰Sitse Beth-shemeshmiakoe sie, “Supuonie Kemesa Ukepenuopfü Jihova mhodzünu thalie vituo ga? Puo ketsepie suomia ki shüwalie vituo ga?” sita.

²¹Sidi uko dieliemia ketsepie Kiriat-jearim nu kelhouko ki shü di sie, “Filistinmiako Jihova dietseidiekhobouu se la vorshüwate, süla nieko ker di süu se nieko ki khotaliecie” sishü.