Read Angami Naga Samuel Kerieu 7 Bible Online

Samuel Kerieu 7 - Angami Naga bible

Samuel Kerieu 7

¹Sitse Kiriat-jearim themiakoe tsur di Jihova dietseidiekhobouu pieta. Ukoe süu pie vo chazoukhru gei Ahindab kinu khapie bata. Sidi ukoe puo nuou Eliazar bu Jihova dietseidiekhobouu pfheketuo la puo chü kemesalie.

²Tsiu sünhienu dietseidiekhobouu Kiriat-jearim nu bata, siro puotei cha pereta, teicie mepfü sünu bata. Mu Israelmia pete rei Jihova ki thekrü chü di kekhruo chata.

³Sitse Samuel-e Israelmia pete ki pu di, “Mhanuü niekoe nieko melou pete se rürei Jihova kitsa vozhü üro nieko donu terhuo kekrei mu Astartko khawalie. Sidi nie melou kereipie Jihova kitsashülie, sidi puo lie rübei chülie, siro puoe Filistinmia dzie nunu nieko kelashü zotuo” sishü.

⁴Süla Israelko Baalko mu Astartko kha phrewa di Jihova lie rübei chüta.

⁵Siro Samuel-e sie, “Israelmia pete vor Mizpa nu kenguliecie, sitse a Jihova ki nieko la chashütuo” sishü.

⁶Sidi uko vor Mizpa nu kengulie tse, dzü ülie di rupie Jihova mhodzünu shü, mu sünhie mevo mu uko kejo phra di sie, “Hie Jihova mhodzünu phoumawate,” ilie. Siro Samuel-e Mizpa nunu Israelko capichü.

⁷Siro Filistinkoe Israelko Mizpa nunu kengukeba sishü tse, Filistin kedikoe Israelko perhietuoü di khor. Mu süki Israelkoe süu dze sishü tse, uko Filistinko prei di michie phita.

⁸Sidi Israelko sie Samuel ki, “Jihova úko Kepenuopfü bu Filistinko dzie nunu u kelashüketuo la puo ki cha pete hie zocie” sita.

⁹Sitse Samuel-e tekuonuo nukeba yopuo pete thepie ruosuo chü Jihova tsü; tsiu Samuel-e Israel pete la Jihova ki puo mezhiemelo, sitse Jihovae puo kecha rünyülie.

¹⁰Siro Samuel-e ruosuou khashükeba ki, Filistinkoe Israel bietuoü penuo vorta. Derei Jihovae sünhie teise kemeriekecü khashü di uko bie kemidepie kebvükerhüwa, sidi Israel mhodzü tata.

¹¹Tsiu Israelkoe Mizpa nunu parlie di Filistinko whuo mu gei zo Bet-kar cie vowa.

¹²Sitse Samuel-e ketsie puo chülie, di süu pie Mizpa mu Jeshana[9] unie donu seshü di puoe süu üse Ebenezer[10] üdi kielie, puoe, “Jihovae haketso u khruohi vorshü zo” idi.

¹³Sidi Filistinko penyükewa sie uko la khor Israel rüvie whuo sa mota. Tsiu Samuel kerheichie, Jihovae Filistinko perhiepetsou tuo tso.

¹⁴Tsiu Filistinko Ekron nunu Gath ketso Israelmia rüna liekelieko kha lashüwa, siro, Israelko Filistinmia dzie nunu puo tierie kijüko lie lalie. Siro Israelko mu Amorko donu rei vitho bu balie.

¹⁵Tsiu siro Samuel-e puo rheichie Israel capiu chü.

¹⁶Puoe teicie puo nu va puopuo idi Bethel, Gilgal mu Mizpa hako nu whi vo di capiu chü Israel nyie mezaya.

¹⁷Puo sidi Rama nu la vortaya, sünu puo ki bacü la, di sünunu Israel la capi chüya. Sünu puoe ruosuoba puo chüpie Jihova tsü.