Read Angami Naga Samuel Kerieu 8 Bible Online

Samuel Kerieu 8 - Angami Naga bible

Samuel Kerieu 8

¹Situo di Samuel-e tsata tse, puoe puo nuonie bu Israel capi chü.

²Puo nuo nuorieu za Joel mu nhicuu za Abija, mu unie-e Beer-sheba nunu capi chü.

³Derei puo nuonie puo chanu tuolie mota, sidi unie-e unie ya kevi, thesokelie mu kecürütsa vota.

⁴Sitse, Israel pehümia pete vo kengulie di Rama nu Samuel ki vor,

⁵sidi puo ki, “Harie, no tsate mu n nuonie n chatha medzi mote; süla seyie kekreiko kemhie hieko kekhaketuo kedimia puo khapie hieko tsücie,” sita.

⁶Derei uko, “Kedimia puo bu hieko kekhacie” ikecü dieu Samuel-e puo nei mota; süla Samuel-e Jihova ki cha.

⁷Sitse Jihova puo ki, “Themiako n ki kepu pfhe pete rünyüliecie, ukoe n melie ba mo, derei a bu uko mho di lho üdi a melie batacü la.

⁸Ae Ijipt nunu uko ze kepar nhie yawinu vor thie ketso ukoe a khawa di, terhuo kekrei lie chüketa tuoi, ukoe n gei rei sükemhie chü bate.

⁹Sirei uko die rünyüliecie, sidi kediu uko mho kekhaketuou zhoko pu pecü se pie uko tarhoshüliecie” sishü.

¹⁰Sitse Samuel-e Jihova die pete pie puo ki kedi cha kethako ki pushü.

¹¹Sidi puoe pukecü, “Nieko mho diketuou nieko gei hakemhie chütuo; puoe nie nuonuo thepfuko zetatuo, sidi uko bu puo gurako mu puo guragariko zetuo, siro huomia bu guragariko mhodzü ta vokecü chütuo.

¹²Siro puo huomia kedapie nyie mhokezha chü mu hiepengou mhokezha chü isituo, mu kekrei huo bu puo lie phie mu huomia bu re ituo, tsiu puo terhü rünyie mu gura nyako chütuo.

¹³Tsiu puo nieko nuonuo thenuko pie tier kethengu kechümia, mhachamia mu niekhrüda riekecümia chütatuo.

¹⁴Puoe nie khube lie mu Oliv lie kevithoko liepie puo kituoko tsüwatuo.

¹⁵Siro puoe nieko lha mu nieko khube lieyie ker za puo lielie di pie puo capi kezhako, tsiu kituo kezhako tsüwatuo.

¹⁶Tsiu puoe nie kituo thenu mu thepfu tsiu nie kiri[11] mu nie gada kevithoko teze vo puo lie chütatuo.

¹⁷Puoe nie kuo ker za puo lielietuo, mu nieko zorei puo die chütatuo.

¹⁸Siro teisozha süu vor tse, nie thuo kedakelie kediu la nie mezhie rükhruotuo, sirei Jihovae sünhie nie pfhe rünyülie lho” sishü.

¹⁹Sirei themiako Samuel pfhe ze mvüta, sidi ukoe, sie “Molie, kedi puo bu hie mho di zotuolie;

²⁰sidi hie rei seyie kekrei mhiei; tsiu hie kediu bu hie kekhatuo, tsiu hie mhodzü chathau chü di terhükechü nu hieko rei mia ze kegeituolie” sita.

²¹Siro Samuel-e themiako pete pfhe rünyülie, di pie Jihova ki pu lashü.

²²Sitse Jihovae Samuel ki, “Uko pfhe rünyülie di kedimia puo khashü uko tsüwalie” sita, süsie Samuel-e themiako ki, “Nie pete rei nie thuo nie rüna nu la vo phretaliecie” sishüwa.