Read Angami Naga Samuel Kerieu 9 Bible Online

Samuel Kerieu 9 - Angami Naga bible

Samuel Kerieu 9

¹Süki Benjaminmia kenyimia puo tuo, puo za Kish; puoe Afia nuou Bekorat nuomia Zeror nuo-u Abiel nuo;

²puo nuo puo za Saul ücü puo ba, mu süu khriesa puorhi vi secü puo. Saul-e Israelmia nuonuo donu miapuorei puo mhie kemo kevitho puo. Tsiu puo tsü mu puo bouka mia kekrei pete kirei rükrie.

³Siro Saulnuo puo Kish Gada kro puo jüta, sitse Kish-e sie puo nuou Saul ki, “No kituomia puo ze salie di tsie vo Gadako pfhücie” sita.

⁴Süla unie Efraim chazoukhruko mu Shalisha kijü pete pfüthe vo, derei ngulie mo. Süsie unie Shalim kijü pfüthe vo, derei sünu rei tuo mota. Süla unie-e tuo zo Benjamin kijü rüvie pete pfüthe vo derei sünu rei gadako ngulie mota.

⁵Süsie unie Zuf kijü nu vorlie tse, Saul sie kituo-u ki, “Ge! Avu kinu la vota khe, moro a puoe Gadako la monyü avu la puo nou kemezhie batalie vi mu,” sita.

⁶Derei kituou puo ki, “Haunu Kepenuopfü themia, therhukepfümia puo baya, mu puo kepu pete chü tseilieya; tsie avu sünu vo khe; puo avu bu voketuo chau pushü reilie vi mu” sita.

⁷Sitse Saul-e sie, “Sirei avu süu ki vo liro, kedipuo pie puo tsü ta? Avu likhuo nu kecüca tuo mote, tsiu kenei nu mha pie Ukepenuopfü themiau tsüketuo puorei jü. Avu kedipuo ba mu?” sita.

⁸Kituou la sie Saul ki, “Harie, a a dzie nu rakachü shekel dia za puo ba, a süu se Ukepenuopfü themiau tsütuo, sidi puo bu avu cha thashütuo” sita.

⁹(Thiedzü Israel nu mia puoe Ukepenuopfü ki vo mha ketsotuoü ro puoe sie, “Úko kepethau ki vo khe” siya. Tsiedo siedzekesiu ükezhau thiedzü puoü kepethau üya.)

¹⁰Sitse Saul puo kituou ki, “Süu puotoute. Ge, avu sünu vo khe” silie. Sidi unie Kepenuopfü themiau keba rünau nu vo.

¹¹Sidi unie chazoukhru gei rünau nu khozhü ru, rüümia kro puo dzüütuoü parzhü di keselie, sitse unie uko ketso di sie, “Kepethau haki ba me” ishü.

¹²Ru uko unie ki, “U, puo haki baya, mu harie puo nnie mhodzüki phizhü ho, rükri phi ro puo selietuo. Puo thie hieko ra vorzhie, kekreilamonyü thie themia pete thechü kerükrie gei kho ruosuo chütuoüya.

¹³Nnie-e rünau nu lelie mumetha puo thechü kerükrie nu kho mhacüketa mhodzü puo ngulietuo, puo vor ruosuo kechüu nu jashü kemochie themiako, mhacülie lhocü la. Sidi puo jakeshü sienu kiepie kebako mhacütuo. Süla nnie tsie kholiecie, nnie puo ze kese mhailieketuo la” sishü.

¹⁴Süla unie-e kholie di rünau nu lezhü ru, harie, Samuel-e thechü kerükrieu nu khotuoü par unie ze keselie.

¹⁵Siro Saul kevor mhodzü nhie Jihovae Samuel ki pukecü;

¹⁶“Sodu hateiki a Benjamin kijü nunu themia puo ketse n ki shütuo, sitse no, puo kenhepie a themia Israelmiako mho kedi chüliecie, puo Filistinmia dzie nunu a themiako kelalietuo, a a themiako mezhie ngushüte mu uko kekra pfhe khor a tso bate” sipie ba.

¹⁷Sidi Samuel-e Saul ngushü mumetha Jihova puo ki, “Harie, a n ki kepu themiau sü hauha zo, mu puo bu a themiako mho kedi chütuo” sita.

¹⁸Süki Saul-e Samuel penuo care ki phi di sie, “Kepethau ki kirapuo ba shi a ki pushücie” sishü.

¹⁹Sitse Samuel-e Saul die kela di sie, “Ae Kepethau zo, legei a mhodzü ruosuochü nu kholiecie, no thie a ze mhacütuo, siro khise a n nounyü pete pushütuo, sidi n ketse lashüwatuo.

²⁰Tsiu siro, n gadako zha se voketa ki jüketako la we n noumeca morei vi, kekreilamonyü süko nguliete. Derei harie, Israel pete menguu supuo gei ba ga? N gei, mu n puo kinumiako gei ba moü me?” sita.

²¹Sitse Saul puo die kela di sie, “Ae Israel seyie kecütho-u Benjaminmia ze, siro a puonuomia rei Benjaminnuomia donu pfutsanuo kecüthoyo ze, siliro no kiüdi hakemhiekecü die se a ki puya mu?” sita.

²²Süsie Samuel-e Saul mu puo kituou ze kibou nu vor di unie bu kiekeshüko donu thechü kevitho-u nu balie, mu süko mia ser mese.

²³Sidi Samuel-e sie mhachau ki, “A n bu kha kreipie balienukeshü muokhrieu se vorcie” sishü.

²⁴Ru mhachaue kha kreipiekeba puodo-u pie vor Saul mhodzünu shü. Sitse Samuel-e sie, “Harie hau n la khapie ba ho. Cüliecie; puotei chiepie kebau la hau kha kreipie ba, n bu rüsomia ze mhacüketuo la kha kreipie bawaketa la,”[12] sita. Sidi sünhiesü Saul-e Samuel ze mhacülie.

²⁵Sidi ukoe thechü kerükrieu nunu rünau nu kerlie tse, ki tsü geinu Saul la kezhüchü[13] puo keseshü, sidi puo sünu zhü di zetsuta.

²⁶Siro teisolie[14] tse Samuel-e ki tsü gei khor di Saul kie di sie, “Sie di dojülie, a n ketseshüwatuo mu” ishü. Sitse Saul sielie di Samuel unie keze cha nu tuo vota.

²⁷Sidi uko rünau cietazhü tse Samuel-e Saul ki, “N kituou bu avu mhodzü votaliecie mu puo tuo vota zorei, no zo we thazalie di a bu Jihova die pie n ki pushücie” sita.