Read Angguruk Yali KEJADIAN 12 Bible Online

KEJADIAN 12 - Angguruk Yali bible

KEJADIAN 12

¹Weregman NINIKNI Allahn Abram fam ele uruk lit, ”Hibam men hori men hangginang men embeselug kinang Anden hiyag huruhuk ambeg lahun,” ibareg,

²”Haren ondohowonen endebuhubon arimano anggolo atuk lit ununggul unuk suwon welamag ulug hineyap habuhukmu hat hunuk palimu weregma hat feneyen ap anggolo fano amuhup.

³Aben An nunuk fam hi haptuk lamuhubon Anden nindi enesug laruhuk. Hat huluwap haptuk lamuhubon Anden huluwap eneptuk laruhuk. Ap ununggul unuk obog toho hat fahet inindi hasug lamuhubon arimano mondabi fano roho welamuhup,” ibag.

⁴Abram indag tibag sali mo ilig am wirig am turukmu teng hinahan 75 atfagma NINIKNI Allahn hiyag itfag ane hikit toho Kanaan kinangma lul ulug o Haran embeselug laruk lit uhe Sarai men ot amloho Lot men amingmingangge men anggengge o Haran inowen inggikmu atfag angge men hilalug libag. Kanaan kinangma libareg

⁶walinggoho laruk lit o pumbuk Sikhem horogma usa ahen unuk More wereg ambeg libag. Libag li itano Kanaan inap weregma libag.

⁷Libagma NINIKNI Allah ino Abram olohotma inam atfareg, ”Kinang aru haren ondohowonen endebuhubon Anden og isahuk,” ulug hiyag itfag. Hiyag itfagma Abram inowen NINIKNI Allah an nolohotma ebenam ahayon fahet hubu lahapmin ulug helep sengget watfag.

⁸Ware fibareg ik ambut fil lamin ulug o Betel yali fil punu werehon fene libareg o Ai hubula fil o sabo witfareg welatfag. O ino wereg lit NIKNI Allah fam sembahyang imin ulug hubu lahaptuk ambeg eke witfag.

⁹Welatfareg nin wilip atug laruk lit o eke witil eke halog til ik ambut fil wirig atfag.

¹⁰Abram o Kanaan weregma suburu obok humon eke lahibagma suburu elehen o Mesir lamin ulug wirig atfag.

¹¹O Mesir horogma libareg uhe Sarai hiyag utuk lit, ”Hat tuhum anggolo reg lahenma

¹²Mesir inaben yet hiyahupteg hiyap aru Abram uhe wereg ulug wenggel hahupteg hat humbaharuk lit an nuwabuhup.

¹³Ari fahet haren an Abram ot welahi uhunmu an nubahet hiyap tu owe wereg ulug nuwabuk fug angge fano ane nubam turuk lamuhup,” ulug hiyag itfag.

¹⁴Hiyag itfareg o Mesir libagma Mesir inaben yet harukmen Sarai ino tuhum anggolo regma yet hibag.

¹⁵Mesir inap onowe amingmingangge arimanowen oho Sarai yet hibareg hiyap tuhum fanowon waha ulug inikni hiyag irik libagma ap suwonen Sarai ino ibam hondoko kila fat tibag.

¹⁶Kila fat tibareg ap suwon inowen Abram fahet Sarai owe wereg ulug fano ane ubam turuk lit amingmingangge men wam domba, kambing, sapi, keledai, unta men og itfag.

¹⁷Hun inowen Abram uhe Sarai hilibag ane fahet NINIKNI Allahn ap suwon ino uhesi malik men unubam ouk alem suwon monde fibag.

¹⁸Monde fibagma ap suwon inowen Abram wol tibareg kapal haruk lit, ”Haren nungge fahet Sarai an nuhe uk fug angge hele si ane hiyag nitikin?

¹⁹Nungge fahet not ulug hele si ane irikinmu anden hilarikik? Huhe tu werehen hilalug lamihin,” ibag.

²⁰Ibareg Abram uhe men anggengge obog toho hilalug o aruwen wilip amusan hondog eneplug lalihip ulug amingmingangge hiyag isibag.