Read Angguruk Yali KEJADIAN 13 Bible Online

KEJADIAN 13 - Angguruk Yali bible

KEJADIAN 13

¹Abram uhe men Lot men anggengge obog toho hilalug o Mesir embeselug laruk lit o Kanaan kinang ik ambut filen kuhuk ulug libag.

²Libag li itanowen hun Abram ino ambohom anggolo atfagma fano-fano angge emas perak men anggolo werehen tung ahun wereg lit

³o eke witil eke halog til o Betel fil libag. Libareg o Betel men Ai men honggolegma atam o sabo wiroho wereg lit Allah fahet hubu lahapmin ulug witfag ambeg wereg lit NINIKNI Allah fam sembahyang uruk latfag.

⁵Lot Abram men ambiyeg laruk latfahon ino oho amingmingangge men ambohom domba, kambing, sapi men anggolo welatfag.

⁶It piren enembohom anggolo werehen foroho ambeg wirim teg latfag fugmu ambiyeg welam fug teg latfag.

⁷O ita li Kanaan inap men Feris inap men oho o ino wereg latfag. Ari roho wereg lit Abram ambohom foroho inap men Lot ambohom foroho inap men suwahal uruk latfagma

⁸Abram inowen Lot fam ele uruk lit, ”An men hat men owe ot hag toho welahe angge famen an notsi men hat hotsi men suwahal uruk ane ariyen nit piren seli roho welamuhuk ane ari siyag.

⁹Kinang aru hum anggolo regma hat hamu an namu welamuhuken haren nindi peruk lahen ambeg lamihin. Hat ninggik hare fil lamihin halug an ninggik pikit fil welaruhuk, hat ninggik pikit fil halug an ninggik hare fil lahuk,” ibag.

¹⁰Ari ibagma Lot inowen walinggoho yet harukmen kinang ik Yordan ayegman tulug o pumbuk Zoar oho ik eleruk fanowon anggolo weregma yet hibag. NINIKNI Allahn o Sodom Gomora uwan siyahap tuk fugmu atam kinang ari NINIKNI Allahn yabukap tibag ambeg men o Mesir kinang men hag toho welatfag.

¹¹Ari hag toho weregma yet hibareg Lot inowen ik Yordan ayeg fil welaruhuk ulug Abram embeselug yali fil libareg enemu-enemu welatfag.

¹²Abram ino o Kanaan mondabi weregma Lot ino o Yordan tonggo ke o sabo ta witil laruk lit o Sodom horogma libag.

¹³O Sodom welatfag inap arimanowen NINIKNI Allah enembol yig utuk lit onolok ane anggolo turuk latfag.

¹⁴Lot ino nenemu-nenemu welamuhuk ulug libagma NINIKNI Allahn Abram ubam ele uruk lit, ”Unduhuk lahen ambeg ariyan yali fil, hubula fil, ik ambut fil, eleruk fil fano roho yet hamihin.

¹⁵O yet hamihin ambeg arimano obog toho hat men humalikisi menen mondabi ngi roho welamuhuben hiyag hutuk lahi.

¹⁶Anden hat hineyap habuhukmu haren ondohowonen endebuhubon arimano aben kinang alinlan winahuk fug toho wereg hag toho mondeg lamuhup.

¹⁷Anden kinang aru hinggikmu umbuhuken ketiya walinggoho kim ha lamihin,” ibag.

¹⁸Ari ibagma Abram inowen o sabo ino halog tibareg o Hebron horogma o Mamre usa ahen wereg ambeg o sabo wirik libareg wereg lit NINIKNI Allah fahet hubu lahaptuk ambeg witfag.