Read Angguruk Yali KEJADIAN 15 Bible Online

KEJADIAN 15 - Angguruk Yali bible

KEJADIAN 15

¹Welatfagma Abram inowen fulu roho yet harukmen NINIKNI Allahn ele ubam uruk lit, ”Abram, hakol ha fug! Siyag ane hubam aruhu rohon ulug Anden hat fet hasug lit onggo suwon og huruhuk,” ibag.

²Ari ibagma Abramen ele uruk lit, ”NIKNI suwon Allah, Haren malik eke og nitikin fugmu an war aruhuk halug an nanggengge obog toho namingmingangge Damsyik ahun Eliezer inggikmu aruhu. Ari roho tuhu angge re nungge fahet onggo suwon og huruhuk ehen?” ulug hiyag itfag.

⁴Hiyag itfagma NINIKNI Allahn nin eke ele uruk lit, ”Hamingmingangge inowen haren angge ngi aruhu fug, hat hamloho hinggarehen tohonen ngi aruhu,” ibareg

⁵Abram selma hondoholug libareg hiyag utuk lit, ”Poholma lahap hamihinteg suhal werehon winag himin! Suhal winag isa fug teg hag toho haren ondohowonen endebuhubon arimano anggolo mondeg lamuhup,” ibag.

⁶Allahn ibag ane aru fahet Abramen we tem toho ehek ulug wenggel hibagma NINIKNI Allahn at fahet fano peruk latfag.

⁷Fano pibareg nin eke Abram fam hiyag utuk lit, ”An HIKNI Allah welahi. Kinang aru hat ngi aruhun ulug Anden o Ur Babilonia kinang famen hondog haplug wilip atikikteg humbahik waharikik,” ibag.

⁸Ibagma Abramen kapal haruk lit, ”NIKNI suwon Allah, Haren kinang aru og huruhuk ehenon aru tem toho irisi puhuken nangginoho noluk aruhu?” ulug kapal hibag.

⁹Kapal hibagma NINIKNI Allahn, ”Wam sapi heyon men kambing heyon hunon men enebe wal taneg mo hinahan fam endetuson walug waharuk lit suwe yalma hahon eke men pel hahon eke men An nubahet walug watmihin,” ulug hiyag itfagma

¹⁰walug watfag. Walug watfareg Abram inowen wam sapi kambing waroho pul ke pilang tibareg fima fil iraroho emberuk lit fima fil oho iraroho imbibag. Suwe itano eneg pilang tibibag fug.

¹¹Ari tibareg weregma suwe kararakni imbalo wareg narukon wam Abramen imbibahon arimano fam hur arik wambik watfagma Abramen yanggal enepfag.

¹²Yanggal enepfareg mo ubuk urukmu Abram ino noho apeleg atfareg itano akol anggolo haruk latfag.

¹³Ari turukmu NINIKNI Allahn ele uruk lit, ”Haren ondohowonen endebuhubon arimano ap pohon hag toho o winama welamuhubon fahet holuk toho welamin! Ap enemingmingangge weregma enele ying eneptukmen eneg mo ilig am wirig am turukmu teng-teng angge 400 welamuhup.

¹⁴Hat humbusagsi mingming eneptuk lamuhup inap arimano Anden alem angginon unubam emberuk laruhukmu humbusagsi o ino embeselug wilip atuk lit mun angge man angge hilalug wilip amuhup.

¹⁵Hat hinggareg eneg amusun toho wereg lit sabal aruhunteg hindi yuwag toho war aruhunmu kinangma sal habuhup.

¹⁶Hat humbusagsi o ino wereg lit unumalikisiyen endebuhubonen endebuhubon welamuhup li eneg suhuloho o aru wamuhup. Amori inap kinang tu fam werehon arimanowen siyag ane turukmen warukmen eneg mondabi hum atuk halug eneg Anden alem angginon unubam emberuk lit yanggal enebuhuk,” ulug hiyag itfag.

¹⁷Mo ubuk ibareg o mondabi hik atfagma indok kubag elma weregma hubu laharukon men iral indok ambulpul turukon men inam atfareg wam paloho imbibahon arimano honggoleg ke laruk latfag.

¹⁸Ari turuk lit itano NINIKNI Allahn Abram ubam sali emberuk lit, ”Kinang o Mesir hili-hilimuwen tulug Keni inap enengginang men Kenas, Kadmon, Het, Feris, Refaim, Amori, Kanaan, Girgasi, Yebus inap enengginang arimano keyen tulug ik Efrat ayegma werehon oho haren enderuhunonen endebuhubon og isahuk,” ulug hiyag itfag.