Read Angguruk Yali KEJADIAN 16 Bible Online

KEJADIAN 16 - Angguruk Yali bible

KEJADIAN 16

¹Abram uhe Sarai ino malik indag ta fug angge welatfag. Wereg lit Mesir hiyap misig unuk Hagar at amingmingangge welatfag.

²Welatfareg Sarai inowen Abram fam hiyag utuk lit, ”NIKNI Allahn an fahet malik indag ta fug teg peruken hat an namingmingangge tu men nohomihinmu aren malik eke indag nuruhu lit teg,” ulug hiyag itfagma Abramen fano ehen ibag.

³Ibagma Sarai inowen amingmingangge hat hilamihin ulug Abram og itfag. Og itfag li itano Abram o Kanaan weregman eneg mo ilig am wirig am turukmu numen atfag.

⁴Abram ino Hagar men nohibagma hiyap ino malik fet talug lit malik nahummu atisi ulug oluk atfagma hemet turuk lit Sarai apmayap turuk latfag.

⁵Apmayap turuk latfagma Sarai inowen Abram fam ele uruk lit, ”Namingmingangge Hagar ino hat og hitikikmu malik nahummu atisi ulug oluk atisireg aren an apmayap naptuk. Haren tirikin ane ariyen an siyahap naptuk. Ari fahet alem nit piren nunubam werehon aru NINIKNI Allahn hale fuhu,” ibag.

⁶Ibagma Abramen te, ”At ino hat hamingmingangge werehen hinggikmu wereg. Haren timin peruk ane fano ubam timihin,” ulug hiyag itfagma Sarai inowen Hagar ino fam olok ane anggolo turuk latfagma akolen wilip atfag.

⁷Wilip atfareg laruk lit o Sur fil laruk ke lekma ik eleruk wilip atuk ambeg libareg weregma NINIKNI Allah ot malaikat ino ambeg watfareg

⁸ubam ele uruk lit, ”Sarai amingmingangge Hagar, hat keman wahenteg kema lamin peruk lahen?” ulug kapal hibagma Hagar inowen te, ”Nakolen an nisinga Sarai embeselug waharuk lahi,” ibag.

⁹Ibagma malaikat inowen te, ”Suhuloho ambeg lamihinteg at apma welaruhun,” il laruk lit,

¹⁰”Anden hineyap habuhukmu haren ondohowonen endebuhubon arimano anggolo amuhupmu aben winag isa fug teg lamuhup.

¹¹Tot welaruhunteg malik ap angge indag tahun. Indag tahunteg an siyag toho wereg lit uba yatuk latikikon NIKNI Allahn holtisi ulug malik ino unuk Ismael suwaluhun.[14]

¹²Hat hamloho ino wam eli il wirikon hag toho wereg lit ori obog toho men hili roho welamuhupmu aren ap obog toho unusimin ulug turukmen iren oho at wabul ulug turuk lamuhup,” ulug hiyag itfag.

¹³Hiyag itfagma Hagar ino indimuwen wenggel haruk lit, ”Allahn an kim niyarukon ino tem toho inam ahama yet hihi ano?” peruk lit NINIKNI Allahn ele ubam ibahon ino unuk ”Allah Kim Niyarukon” suwaleg uruk latfag.

¹⁴Ari tibagma ik fahet kinang habulihon o Kades men Bered men honggolegma werehon ino unuk ”Allah Mondabi Oluk Werehonen Kim Niyarisi Ambeg” suwaleg.[15]

¹⁵Tot welatfareg Hagar inowen malik ap angge indag tibagma ikni Abram inowen unuk Ismael suwalfag.

¹⁶Suwalfag li itano Abram indag tibag sali mo ilig am wirig am turukmen teng hinahan nubam hilag fuwaben 86 atfag.