Read Angguruk Yali KEJADIAN 19 Bible Online

KEJADIAN 19 - Angguruk Yali bible

KEJADIAN 19

¹Allah otsi malaikat piren tam libahon itano hupmu o Sodom libag. Larukmu Lot ino elehet o Sodom walinggoho ohowon sok iraham heriyeg lit yet isarukmen ap piren itano waharukmu yet isibareg in atug enembeg libareg orohole han kinangma sahung atfareg

²it hi eneptuk lit, ”Niknisi, an nibam lulteg hunuyug ik umatihipmu nibam ambiyeg nohul. Sono hubet lul pehep ambeg lahup,” ulug hiyag isibag. Hiyag isibagma iren, ”Nare, fano ehen angge famen nit selma tuma nohul,” ibag.

³Ibagma Lot inowen ele ine roho nibam lul ulug hiyag isibagma ambiyeg at ibam libag. Olma kibareg Lot inowen suburu isag isaruk lit roti oho wirako og isibagma naruk latfag.

⁴Nibareg ap itano uwan nohuk fugmu Sodom inap kabiniyonet sabalonet obog toho luhaloho watfareg o ino walingguruk latfag.

⁵O ino walinggoho wereg lit enele hi roho Lot fam uruk lit, ”Hupmu ap hambeg wahason itano kema wereg? Niren yarog enebulen wilip nisa ma!” uruk latfag.

⁶Ari urukmu Lot ino wilip atfareg sok sel filen lare fibareg

⁷Sodom inap unubam ele uruk lit, ”Nori, hiren honolok ane tilihip fug!” ulug hiyag isil laruk lit,

⁸”Naholani piren ap nim laruk elehon werehen og hisaminmu hiren tul pehep ane unubam tilihip angge famen ap piren itano eneg an nibam tu wahasama ninggik obog isa fug tehen hiren siyag ane unubam tilihip fug,” ulug hiyag isibag.

⁹Hiyag isibagma Sodom inap arimanowen Lot fam uruk lit, ”Hat ap pohon welahen angge re nangginoho hal enepmin peruk lahen? Hebe lag! Lamihin fug halug ap piren itano tot unusul angge famen hat eneg hum toho huwabul,” ulug hiyag itfareg Lot miyaltil laruk lit sok ino halog toho kul ulug turuk latfag.

¹⁰Ari turukmu ap piren itanowen ininggik wili fibareg Lot ino lisoho olma kila fibareg sok o le filen lare fibag.

¹¹Lare fibareg ap selma werehon arimano obog toho inil hupni fisibagma sok ino kema wereg ulug yami ruruk lit hiyahibag fug.

¹²Ari turuk latfagma ap piren itanowen Lot hiyag utuk lit, ”Sodom inap arimano siyag ane anggolo turuken ap winonen enele ya nga urukon NINIKNI Allahn holtisireg Sodom inap siyahap enebuhup ulug nit mon neneptisi. Ari fahet hat humalikisi ap angge hiyap angge men hiyamalsi men hori winon men o aru wereg halug hondog eneplug wilip atmihin,” ulug hiyag itfag.

¹⁴Hiyag itfagma Lot ino aholani hilahuk peruk inap piren enembeg libareg hiyag isaruk lit, ”Nori, NINIKNI Allahn o aru siyahap timisiyen folo-folo wilip amulen maniyek!” ulug hiyag isibagma iren nenele ying neneptuk lit anggelkel toho ehek ulug holfag fug.

¹⁵Holfag fugmu nohibareg likiya o yanggaltukmu malaikat piren itanowen enele ine roho Lot hiyag utuk lit, ”O aru siyahap turukmu war amuhup tohon huhe men haholani men folo-folo o aruwen wilip atlihip,” ulug hiyag itfag.

¹⁶Hiyag itfagma Lot inowen lamin ano ulug indimuwen peruk lit weregma NINIKNI Allahn at fahet nindi ulug windatmin pibagma malaikat piren itanowen Lot uhe men aholani piren itano men ininggik lisoho o inowen hondog eneplug wilip atfag.

¹⁷O Sodom inowen wilip atfareg larukmu malaikat itano misihen, ”Hit war amuhup tohon folo-folo lalihipteg tonggo tu fam in atuk lit henembol fil hebeloho yet ha fug angge tom fam lahalihip!” ulug hiyag isibag.

¹⁸Hiyag isibagma Lot inowen, ”Nikni, haren an hindi nasug lit war aruhu rohon ulug windat nabehenma tom ino yat anggolo rehen an uwan la fugmu o aru fam timisi ane ino an nubam oho atukmu war aruhuk tohon tom fam lahalihip imihin fug!

²⁰O pumbuk toron horogma werehon ari yet himin. Nit nonoluk welamuhuken o ari lalihip ulug hiyag nisamihin,” ulug heng tibag.

²¹Heng tibagma malaikat inowen, ”Nare, haren fano ehenma o toron ari anden siyahap timin fuhen

²²folo-folo lalihip! Hit o ino uwan la fugmu anden nungge-nungge timin fug,” ibag. Lot inowen pumbuk toron ari yet himin ibag ane fahet o ino unuk Zoar suwaleg.[18]

²³Mo ket lahik waharukmu Lot ino o Zoar kibag.

²⁴Kibagma NINIKNI Allahn o Sodom men Gomora men itano fene indok ambulpul turukon pilabik watfagma

²⁵o pumbuk piren itano abet hiyabet pin lilibug toho unusuruk lit mun angge man angge tonggo ino fam walinggoho welatfahon obog toho siyahap tibag.

²⁶Siyahap turukmu itano Lot uhe ino ambol fil hebeloho yet harukmen saho famen helep atug unduhukon hag atfag.

²⁷Likiyamon hubet Abrahamen NIKNI Allah fam sono nele irikik ambeg lamin ulug libareg

²⁸o Sodom Gomora tonggo fil yet harukmen aben yabuk asan humon witukmu indok hubu muhul mondotuk hag toho hubu hum-ham toho laharukmu yet hibag.

²⁹Allahn o pumbuk o Yordan tonggoma Lot welatfag ambeg itano siyahap turuk lit Lot fahet Abraham ot amloho werehen war aruhu rohon ulug wenggel hibareg inggik lisoho wilipfag.

³⁰Ari tibagma wereg lit Lot inowen o Zoar weregman war aruhuk tohon ulug akolen wilip atfareg aholani piren itano men tom alem ke libareg owikmu welatfag.

³¹Wereg lit misihim sambil ahaloho wandabon inowen ot fam hiyag utuk lit, ”Ninikni sabal atisi angge re ap niren hilahukon kinang aru fam elehen

³²ninikni ik olokon og umulmu indi apeleg atuk halug at men nohulmu nunumalik wereg aruhu,” ibag.

³³Ari ibareg hup ino sambil inikni anggur ahaluwe olokon hinang itfagma nibareg nohorukmu ahaloho wandabon ino ikni men ambiyeg nohibag. Nohibagma inikni inowen nangginoho tihi ulug apeleg toho welatfag.

³⁴Welatfareg likiyamon ahaloho wandabon inowen ot fam hiyag utuk lit, ”Hubanggo ninikni men an nohoki angge re yoho hupmu nin ik olokon hinang umulteg nohorukmu hat ninikni men nohomihin. Nohomihinmu nit wal tanehen malik indag tahuk,” ulug hiyag itfag.

³⁵Hiyag itfareg hup atfagma inikni Lot ik olokon hinang itfagma nibareg nohorukmu ahaloho fobikon ino ikni men nohibag. Lot ino indi mondabi sohu atfagma nungge tihi ulug apeleg toho welatfag.

³⁶Hilani piren itano inikni Lot men nohibareg enebe wal taneg malik fet talug latfag.

³⁷Welatfareg ahaloho wandabon inowen malik ap angge indag tibareg unuk Moab suwalfag.[19] At ino Moab inap ketiya werehon unumba atfag.

³⁸Ahaloho fobikon inowen oho malik ap angge indag tibareg unuk Ben-Ami suwalfag.[20] At ino Amon inap ketiya werehon unumba atfag.