Read Angguruk Yali KEJADIAN 2 Bible Online

KEJADIAN 2 - Angguruk Yali bible

KEJADIAN 2

¹Allahn ari roho pohol men kinang men mun angge man angge wal tibibareg

²obog toho wal tibihi ulug inggik sabir angge kel tibag.

³Inggik sabir angge kel taruk lit, ”O sabir angge ap An wel naptuk lamuhubon arimano Anden nindi enesug laruhuk,” ulug o sabir angge ino usayap tibag.

⁴Allahn pohol ha kinang ha wal tibag ane tu fam emberuk lahe. Allah NINIKNI inowen pohol men kinang men wal tibag li itano

⁵osit uwan pilabik wam fugmu ap yabuk witukon elehen hoholangge men aben yatuk angge men eleg latfag.

⁶We kinang undaman ik laharuk lit kinang ahaluwe ruruk latfag.

⁷Ari turuk latfagma Allah NINIKNI inowen kinang tot wibareg ap lale fibag.[1] Lale fibareg oluk welaruhu ulug ambiyang ele ke ambilik ahe fu roho kilapfagma ap ino lebe ruruk latfag.

⁸Lebe ruruk latfagma Allah NINIKNI inowen yali fil o Eden kinang yabukap tibareg ap lale fibahon ino hiyag itfag.

⁹Allah NINIKNI inowen yabuk ino fam fano ahen anggen unduk fanowon eke hag eke hag wilip amag pibagma wilip atfag. Yabuk pulmu e piren wilip atfag, e misig ino anggen aben narukmu war atuk eleg ahen, misig ino anggen narukmu siyahon tu, fanowon tu ulug unundaman onoluk atuk ahen welatfag.

¹⁰O Eden yabuk ino ahaluweyap turukon fahet ik misig wilip atfahon ino yabuk ino pisan toho laruk lit ik uhan handuhal turuk.

¹¹Misig unuk Pison inowen Hawila kinang walinggoho laruk. Hawila kinang ino fam umbagpag turuk angge emas fanowon men e ahaluwe amben fanowon men helep ili faya rurukon men wereg.

¹³Ik pirenehon unuk Gihon inowen o Kus kinang walinggoho laruk.[2]

¹⁴Ik hinahanehon unuk Tigris ino Asyur kinang yali fikit laruk. Ik uhanehon ino unuk Efrat uruk.

¹⁵Allah NINIKNI inowen ap lale fibahon ino Eden yabuk foroho lit wituk laruhun ulug hiyag itfag.

¹⁶Ap ino fam ele uruk lit, ”E yabuk tu fam werehon aruma anggen obog toho naruk laruhun angge famen

¹⁷e anggen narukmu siyahon tu, fanowon tu ulug onoluk atuk ahen aru eneg anggen nahun fug. Nahun sambil war aruhun,” ibag.

¹⁸Ari ibareg Allah NINIKNI ino indimuwen peruk lit, ”Ap eneg amu weregma siyag. At let turuk laruhuwon at men wirim tohon misig lalmin,” pibag.

¹⁹Ari pibareg kinang tot wibareg mun angge man angge lebe ruruk angge kinangma werehon men pohol ke larukon men wirim tibibag. Wirim tibibahon arimano obog toho og eneplug ap inowen ununuk suwal enepmisi ane yet hamin ulug ambeg libag. Walug libagma enebe wal taneg ununuk suwal enepfahon arimano ketiya oho wereg.

²⁰Lebe ruruk angge kinangma werehon men pohol ke larukon men arimano obog toho ununuk wal taneg suwal enepfagma ap ino let turukon at men wirim tohon eleg latfag.

²¹Eleg latfagma Allah NINIKNI inowen ap ino noho apeleg amag pibagma nohorukmu NINIKNI inowen ap ino ibal uwag misig lisoho wibareg lisoho wibag ambeg ino unu fam lare fibag.

²²Ibal uwag wibahon ino fam hiyap lale fibareg ap ino ambeg walug libag.

²³Walug libagma ap inowen ele uruk lit, ”At tu eneg an min wirim teg,” ibareg, ”At uwag aru an nuwag famen wereg, at unu aru oho an nunu famen wereg. An ap famen wehek angge re unuk hiyap suwaltuk lahi,” ibag.[3]

²⁴Alem ari famen aben ikni men isinga men embeselug uhe men mangno roho wereg lit enebe misig welamuhup.

²⁵Ap men hiyap men itano enesum wan teg eleg angge enebiye wereg latfag angge famen ininggali haruk latfag fug.