Read Angguruk Yali KEJADIAN 20 Bible Online

KEJADIAN 20 - Angguruk Yali bible

KEJADIAN 20

¹Welatfareg Abraham ino o Mamre embeselug Negeb kinangma wirig atfareg o Kades men Syur men honggolegma o Gerar libareg ap pohon hag toho welatfag.

²Wereg lit Abrahamen uhe Sara fahet, ”Tu an not,” uruk latfagma Gerar inap onowe suwon Abimelekh inowen otsi fam Sara ino wak lalihip ulug mon enepfagma hondoholug watfag.

³Hondoholug watfagma Abimelekh hubanggo nei warukmen Allah at ambeg watfareg ele uruk lit, ”Hiyap aru ap uhe palehen angge re hat war aruhun,” ibag.

⁴Abimelekh ino Sara iraham am fugmu ele uruk lit, ”Nikni, Haren ap o pumbuk eke siyag ane tuk fugmen unusehen ha reg?” ibareg

⁵”Ap ino amuwen, ’Tu an not,’ ulug hiyag nitisi fug? Hiyap ino amuwen oho, ’At an nowe,’ irisi. Alem ari fahet anden tirikikon ino siyag ane timin fug ulug nindiyen haloho hilarikik,” ibag.

⁶Ari ibagma nei fam Allahn hiyag utuk lit, ”Alem ari fahet nindiyen haloho timin perikinon ari An oho noluk atisimu haren hiyap ari iraham atuk lit An nalukema siyag ane tuhu rohon ulug holohotma sok latikik.

⁷Ari fahet ketiya hiyap ino ahun An nawene uruk ahun nabi wereg angge re hahun ambeg lamihin ulug hiyag itmihin. Hiyag itmihinmu at inowen hat fahet oluk welaruhu ulug sembahyang uhu. Lamihin ulug hiyag itmihin fug halug hat men hori men war amuhup ane fahet holuk toho welaruhun,” ulug hiyag itfag.

⁸Nohibareg likiyamon Abimelekhen otsi obog toho wol enepfareg alem obog toho teko libag ane fahet hiyag isibagma otsi arimano enekol anggolo hibag.

⁹Enekol hibagma Abimelekhen Abraham wol tibareg ele ubam uruk lit, ”Nungge fahet alem ari hahon nit nunubam tirikin? Anden hat hubam siyag ane nunggeyon tirikikmu haren tirikinon famen an men numalikisi menen oho alem mondabi siyahon tila? Haren tirikinon ari nubam tuk fug tehon tirikin,” ulug hiyag itfag.

¹⁰Hiyag itfareg Abimelekh inowen Abraham fam nin ele uruk lit, ”Nungge wenggel harikinteg alem ari nubam tirikin?” ibagma

¹¹Abrahamen hebeloho hiyag utuk lit, ”Anden wenggel haruk lit o aruwen Allah fahet enekol toho wenggel haruk ane wereg eleg angge re an nuhe ap winonen hilaruk lit an nuwabuhup tohon ulug irikik.

¹²An not irikikon ino we tik-tem toho an not, nikni ahaloho fahet irikik angge famen ninisingasi amu-amu werehen an hilarikik.

¹³Hilarikikteg weregma Allahn an nubam ele uruk lit, ’Hat hikni ibam embeselug lahun,’ ulug hiyag nitisimu anden nuhe hiyag utuk lit, ’Nit o kema-kema laruk ambehen haren hindi nasug lit an fahet ap unubam, ’Tu an nowe,’ ulug hiyag isaruk laruhun,’ ulug hiyag itikik,” ibag.

¹⁴Ibagma Abimelekh inowen wam domba men sapi men amingmingangge abet hiyabet wibareg Abraham og utuk lit uhe Sara oho hebeloho og itfag.

¹⁵Og utuk lit Abimelekhen, ”Kinang anden tohon aru fam haren o wit tahuk puhun ambeg hahiyeg toho welaruhun,” ulug Abraham hiyag itfag.

¹⁶Hiyag itfareg Sara fam ele uruk lit, ”Ap obog toho hat men werehonen hat fahet we tik-tem toho siyag ane tirisi fug puhuben hat howe uang perak anggolo 1.000 og irihi. Og irihi angge re ap misihen oho aren siyag ane tirisi uhu fug,” ibag.

¹⁷Abimelekhen Abraham uhe Sara fam tibag ane fahet NINIKNI Allahn hiyap Abimelekh ibam welatfahon obog toho ibiliyap enepfag angge famen Abraham inowen Allah fam sembahyang ibagma Allahn Abimelekh men uhe men hiyap at amingmingangge welatfahon men fanowap enepfagma nin malik indag taruk latfag.