Read Angguruk Yali KEJADIAN 21 Bible Online

KEJADIAN 21 - Angguruk Yali bible

KEJADIAN 21

¹Welatfareg NINIKNI Allahn atam ibag ane hikit toho Sara fahet wenggel haruk latfag.

²Wenggel haruk latfagma Abraham ino sabal atfag angge famen uhe Sara malik ahummu atfagma Allahn tu sambil indag aruhu ibag ane hikir atfag sul ino malik ap angge indag tibag.

³Indag tibagma Abraham inowen malik unuk Ishak suwalfag.

⁴Suwalfareg Ishak ino indag tibag sali hup likinen atfagma Allahn ibag ane hikit toho Abrahamen ambilahap palfag.

⁵Abraham ino indag tibag sali mo ilig am wirig am turukmu teng uhan 100 atfagma Ishak indag atfag.

⁶Indag tibareg Sara inowen ele uruk lit, ”Allahn nubam tehek ane fahet nahiyehen inda yatuk lahi. Ap winonen hol halusareg anden inda yatuk lahi hag toho iren oho enehiyehen inda yabusa,” uruk latfag.[21]

⁷Nin eke ele uruk lit, ”Anden malik uwan indag ta fugmu ap san an nahun fam hiyag utuk lit, ’Huheyen malik ag mondoruhu,’ ulug hiyag etlepman tem toho pelep? Nahun mondabi sabal atisi angge famen anden malik indag irihi,” uruk latfag.

⁸Welatfareg malik ino su atuk lit isinga ag imbisibag sambil ino Abrahamen seni humon esetfag.

⁹O misihim sambil Hagar inowen Abraham indag itfahon Ismael ino men Sara amloho Ishak men ying aptuk latfag. Ying aptukmu yet isibareg

¹⁰Sara inowen Abraham fam hiyag utuk lit, ”Hat war aruhunmu haren angge an namloho Ishak men hamingmingangge amloho aru men ambiyeg ngi amuhup tohon hamingmingangge amloho aru men yanggal enepmihin,” ulug hiyag itfag.

¹¹Ibagma Abraham inowen Ismael oho an namloho angge famen ehek ulug indi siyag atfag.

¹²Siyag atfagma Allahn Abraham fam ele uruk lit, ”Hamingmingangge Hagar amloho men fahet hindi anggin ha fug. Anden hat humbusagsi anggolo amuhup ulug sali hubam irikikon ino Ishak feneyen teko lahuwen Saran ehek ane hikit toho timihin.

¹³Hagar amloho oho hat indag hitisiyon wereg ulug Anden ineyap tuhukmu aren ondohowonen endebuhubon anggolo amuhupteg o pumbuk humon welamuhup,” ibag.

¹⁴Ari ibagma nohibareg likiya hubet Abraham inowen suburu men kubag ik hinanggoho werehon men Hagar og itfareg amloho ino isinga anduhunmu yabuhuk fibareg lalihip ulug hiyag isibag. Hiyag isibagma Hagar ino libareg Beersyeba lekman kema lamin o ulug indi nonghong uruken la wam turuk latfag.

¹⁵La wam turukmen ik wibahon ino eleg atfagma Hagar inowen amloho e toron alma imbibareg

¹⁶namloho war atukon yet hamin fug ulug tot yatma libareg heriyeg lit uba yatuk latfag.

¹⁷Malik Ismael inowen uba yatukmu Allahn hol hibagma Allah ot malaikat inowen poholman ele uruk lit, ”Hagar, nungge fahet hat hindi anggin toho welahen? Allahn hamloho ele holehekma hakol ha fug!

¹⁸Hamloho iraham lamihinteg mako pug toho seneg latmihin. Anden at ino ineyap tuhukmu umbusagsi anggolo amuhupteg o pumbuk humon welamuhup,” ulug hiyag itfag.

¹⁹Hiyag itfareg ik fahet kinang habulig ambeg yet hawag ulug Hagar il selehap tibagma yet hibareg kubag fam ik ino hinanggoho wak libareg amloho og irik watfagma nibag.

²⁰Nibareg weregma Allahn Ismael ino forohoman eneg su atfareg o Paran lekma welatfag. Wereg lit suwe pak watuk ane oluk tohon weregma

²¹isingan Mesir hiyap eke og itfag.

²²Welatfareg Abimelekh otsi sehen senehon onowe Pikhol menen Abraham ubam enele uruk lit, ”Allah hat men weregma haren mun ane man ane yabuk turuk lahenon ari yet hiyaruk lahe.

²³Ari fahet Allah olohotma hele tem toho imihinon tu, ’Anden hat humalikisi humbusagsi enele ying eneptuk laruhuk fug. Haren an nindi fanowap naptikin angge re an kinang tu fam ap pohon hag toho wereg lit hat men hori men hunubam fano ane eneg turuk laruhuk,’ imihin,” ulug hiyag itfag.

²⁴Ari hiyag itfagma Abrahamen, ”Haren ehenon fahet nele tik-tem toho uruk lahi,” ibag.

²⁵Ibareg Abrahamen nin ele uruk lit, ”Ik fabulig ambeg hat hotsiyen ilmig turusama an nindimu siyag aha,” ulug Abimelekh hiyag itfagma

²⁶hebeloho hiyag utuk lit, ”San tirisi-o, an napeleg. Haren oho alem ari fahet hiyag nitikin fug anggeyen o yoho eneg noluk atuk,” ulug hiyag itfag.

²⁷Hiyag itfagma Abraham inowen wam domba men sapi men Abimelekh og itfareg it pirenen an men hat men mangno roho welamuhuk ulug sali imbibag.

²⁸Sali imbibareg Abrahamen wam domba umalik heyon sabiren eneko amumu imbik libag.

²⁹Imbik libagma Abimelekh inowen Abraham fam, ”Nungge fahet wam tiya amumu imbik lahen?” ulug kapal hibagma

³⁰Abrahamen ele uruk lit, ”Anden ik fabultikikon fahet siyengge wereg peruk lamag ulug imbihimu an ninggikmuwen wam tiya wamihin,” ibag.

³¹It piren itanowen sali imbibahon fahet aben o unuk Bersyeba[22] suwalfag.

³²O Bersyeba inowen sali imbibareg Abimelekh men otsi sehen senehon onowe Pikhol men inibam Filistin kinangma libag.

³³Libagma Abraham inowen o Bersyeba inowen e win hahon yaho fibareg NINIKNI Allah mondabi oluk werehon unuk wel turuk latfag.

³⁴Ari obog toho tibareg Abraham ino Filistin kinangma ap pohon hag toho wereg lit amusun toho welatfag.