Read Angguruk Yali KEJADIAN 22 Bible Online

KEJADIAN 22 - Angguruk Yali bible

KEJADIAN 22

¹Tot welatfareg Allahn Abraham inowen nele holmisi ano ulug wal hamin pibareg Abraham ulug wol tibag. Wol tibagma, ”Nikni, welahi,” ibagma

²Allahn hiyag utuk lit, ”Hamloho misig enehon hindi anggen tohon Ishak men Moria kinangma lalihip. Lalihipteg Anden punu eke hiyag huruhuk ambeg lahakupteg hamloho An nubahet waroho indokma yaluhun,” ulug hiyag itfag.

³Hiyag itfagma nohibareg likiya hubet Abraham inowen Allah fahet hubu lahabuhuken walug lul ulug e ting-ting witfareg sum tug toho imbibahon wam keledai emberimu imbik lahibareg Ishak men amingmingangge piren men Allahn hiyag itfag ambeg libag.

⁴Larukmen eneg hup piren atfagma o hinahaneg angge laruk lit yet harukmen Allahn ibag ambeg ino onorohole fil tot yat toho weregma yet hibareg

⁵Abraham inowen amingmingangge piren itano fam hiyag isaruk lit, ”Hit keledai aru men tiya welatlihip. An namloho menen NINIKNI Allah fam sembahyang ulen lendima lahulteg henembeg wamul,” ulug hiyag isibag.

⁶Hiyag isibareg Allah fahet hubu lahabul ulug e witfahon itano Ishak unggulmu ha ribibareg inggarehen indok huk men karog men seneko amloho men laruk latfag.

⁷Laruk lit Ishak inowen niyon ibagma Abraham inowen, ”Namloho, nungge?” ibag. Ibagma Ishak inowen, ”Indok men e men wehe angge famen wam domba umalik indokma yaltulon kema wereg?” ulug kapal hibagma

⁸Abraham inowen, ”Namloho, Allahn hiyag nisamisiyon yaltul,” ibareg laruk latfag.

⁹Libareg Allahn hiyag itfag ambeg ino lahibareg Abraham inowen Allah fahet hubu lahapmin ulug helep sengget watfareg e palimu yahare fibag. Yahare fibareg amloho Ishak ino inggik uyug hele fam pug toho e palimu yinggi fik lahibareg

¹⁰karog lisoho watmin ulug turukmen

¹¹NINIKNI Allah ot malaikat inowen poholman, ”Abraham, Abraham,” ulug wol tibagma Abraham inowen wo ibag.

¹²Wo ibagma malaikat inowen, ”Hamloho wabuk fug! At ubam nungge-nungge timihin fug. Haren An fahet hakol toho wereg lit nele holtuk lahenon ketiya An noluk aha. Hamloho misig enehon og nuruhun irikikmu nindi ulug umbat tarikin fug,” ibag.

¹³Ibagma Abraham inowen hebeloho yet harukmen wam domba hunon misig andimbuk fam alog-alog angge sehelimu heleyen het toho weregma yet hibareg wam ino wak libareg amloho ubalma Allah fahet waroho yalfag.

¹⁴Yalfag ambeg ino Abraham inowen unuk ”NINIKNI Allahn Neneseher angge Og Nisarukon Wereg Ambeg” suwalfag. Suwalfag ane hikit toho ketiya oho aben uruk lit, ”NINIKNI Allah antom fam neneseher angge wep toho wereg,” uruk.

¹⁵Malaikat inowen nin eke poholman Abraham fam ele uruk lit,

¹⁶”An HIKNI Allahn ninggareg nunuk fam tik-tem toho iminon tu: Anden hamloho misig enehon og nuruhun irikikmu nindi ulug umbat tarikin fugmu

¹⁷Anden hat hineyap habuhukmu haren ondohowonen endebuhubon arimano suhal men ik yinggi saho ahik ayegma werehon men mondeg hag amuhupteg ap seliyon apmayap eneptuk lamuhup.

¹⁸Haren An nele holehenma fobik ap o pumbuk obog toho kinangma werehon arimanowen An nalukema waharuk lit, ’Abraham umbusagsi inineyap eneptikin hag toho nir oho ninineyap nenepmihin,’ ulug heng naptuk lamuhup,” ulug hiyag itfag.

¹⁹Hiyag itfagma Abraham ino amingmingangge piren imbisibag ambeg suhuloho wambik watfareg it ambiyeg o Bersyeba libareg mondabi welatfag.

²⁰Welatfareg ap ekeyen Abraham hiyag utuk lit, ”He Milka inowen oho hot Nahor umalikisi indag itisi,” ulug hiyag itfag.

²¹Malik indag itfahon arimano wandabon unuk Us, ot unuk Bus, eke Aram ikni unuk Kemuel ino,

²²Kesed, Hazo, Pildas, Yidlaf, Betuel men suwal enepfag.

²³Malik likinen itano he Milka inowen Abraham ot Nahor indag itfag. Welatfareg hun Betuel inowen ahaloho Ribka indag tibag.

²⁴Nahor inowen uhe eke hilibahon unuk Reuma inowen oho umalikisi Tebah, Gaham, Tahas, Maakha men indag enepfag.