Read Angguruk Yali KEJADIAN 23 Bible Online

KEJADIAN 23 - Angguruk Yali bible

KEJADIAN 23

¹Sara ino indag tibag sali mo ilig am wirig am turukmu teng fuwaben 127 atfagma

²Kanaan kinang fam o Hebron inowen war atfag. War atfagma ahun Abraham inowen fong watuk latfag.

³Fong watuk latfareg Abraham ino uhe wareg ino olma embeselug Het inap o Hebron kinang ngi reg latfahon enembeg libareg hiyag isaruk lit,

⁴”An hit sehelimu pohon welahireg nuhe salmin ambeg fahet kinang tot hiyag nitlihiben heng henebik wahi,” ulug hiyag isibag.

⁵Hiyag isibagma iren uruk lit,

⁶”Ninikni, hat ap suwon nit sehelimu Allahn hineyap haptukmu welahenon hi haptuk lahe. Nit nenengginang ap warehon sal eneptuk lahe ambeg mondabi fanowon fam hat huhe oho salmihin. Ap saltuk ambeg nit wal tanehen tohon arimano sehelimuwon misig fam huhe salmihinon fahet nit obog tohowen fano peruk lahe,” ulug hiyag itfag.

⁷Hiyag itfagma Abraham it onolohotman orohole han kinangma sahung atfareg

⁸ele uruk lit, ”Hiren an nuhe tuma salmisi pehepma o Makhpela owik hun Zohar amloho Efron angginang iraham werehon ino onggo palminen hiyag itlihip ulug heng heneptuk lahi. Aren onggo heng napmisiyon hikit toho hit hiniline og itminteg kinang onggo palmin ambeg ino nuhe salminen an nangginang atmisi,” ulug hiyag isibag.

¹⁰O ino sambil hun Efron ino Het inap sehelimu elehet o pumbuk walinggoho ohowon sok iraham heriyeg lit Abrahamen ibag ane ino hol hibareg ap welatfahon obog toho iniline ele uruk lit,

¹¹”Nikni, an nori obog toho aruma holegma huhe salmihinen kinang anden tohon ehenon ari men owik ino men saplangge og hutuk lahi,” ibag.

¹²Ibagma Abraham ino Het inap onolohotman kinangma sahung atfareg

¹³it obog toho iniline Efron fam ele uruk lit, ”Anden iminon tu holeg lamin. Kinang ino fam nuhe salminen onggo og hitminon senetmihin ulug heng haptuk lahi,” ulug hiyag itfag.

¹⁴Hiyag itfagma Efron inowen,

¹⁵”Nikni, huhe kinang ari fam salmihinen onggo anggolo wa fug teg ulug uang inggila teng-teng angge 400 uang perak heng haptuk lahiyon ita fahet hindi anggin ha fug,” ulug hiyag itfag.

¹⁶Hiyag itfagma Abrahamen fano ehek pibareg hun Efronen Het inap arimano iniline heng ibag ane hikit toho umbagpag turuk angge perak itano suburu anggin wirim haruk angge fam wirim hibareg hun Efron ino og itfag.

¹⁷Og itfareg hun Efron angginang Mamre yali fil o Makhpela werehon ino Abraham ino ngi atfag. Kinang ino fam yabuk wituk ambeg men owik men e obog toho walinggoho werehon men

¹⁸Abraham inggikmu aha ulug Het inap sok iraham welatfahon arimano obog tohowen onoluk atfag.

¹⁹Onoluk atfagma Abraham inowen Kanaan kinang fam o Hebron horogma Makhpela owikmu uhe Sara war atfahon ino kilapfag.

²⁰Ari roho turuk lit tam Het inaben kinang seneg latfahonet owiket Abrahamen nuhe salmin ulug ngi atfag.