Read Angguruk Yali KEJADIAN 24 Bible Online

KEJADIAN 24 - Angguruk Yali bible

KEJADIAN 24

¹Abrahamen mun ane man ane turukmu NINIKNI Allahn ineyap turukmen eneg ebe mondabi sabal atfag.

²Sabal atfareg amingmingangge aren angge foroho latfahon ino hiyag utuk lit, ”An nuyug honggolegma hat hinggik kila femihin.[23]

³Kila femihinteg NINIKNI Allah pohol kinang senehon inowen holegma namloho Ishak fahet haren Kanaan kinang tu fam wereg hiyap yami ruhuk fug ulug hele tem toho imihin.

⁴An indag napfag ambeg lamihinteg an ninggareg nowe ot sehelimuwon hiyap eke yami rik lamihin,” ulug hiyag itfag.

⁵Hiyag itfagma amingmingangge inowen ele uruk lit, ”Hiyap Ishaken helelep puhukon inowen hat min o Kanaan lul fug uhu halug hamloho ino hondohik waruhukteg haren embeselug wilip atik inag ambeg lahuk ano?” ulug kapal hibag.

⁶Kapal hibagma Abrahamen, ”Fug, an namloho hondoholug lahun fug!

⁷NINIKNI Allah poholma werehon inowen an nikni ibamen og naplug wilip atukmu nori embeselug waharik iyagma Aren kinang Kanaan aru we tem toho hat humbusagsi og isahuk ulug sali imbibag. At inowen hat let habukag ulug ot malaikat ino monde fik waruhumu haren an namloho fahet hiyap ino hondoholug waruhun.

⁸Hiyap inowen hat min o Kanaan lul fug uhu halug ketiya sali emberuk lahenon fahet wenggel ha fug angge hindi se roho hebe eneg waruhun. Ari fahet namloho hondoholug lahun fug!” ulug hiyag itfag.

⁹Hiyag itfagma amingmingangge inowen Abraham uyug honggolegma inggik kila fibareg Abrahamen ibag ane hikit toho sali imbibag.

¹⁰Sali imbibareg amingmingangge inowen wam unta numen men fano-fano angge ikniyen tohon men wibareg hun Nahor tam welatfag ambeg o Mesopotamia kinangma libag.

¹¹Libareg o hupmu hiyap ik hinanggik waharuk li horog atfagma wam unta itano kel tawag ulug ik fahet habulfag ambeg o pumbuk sel fil welatfahon iraham kel tibag.

¹²Kel taruk lit amingmingangge inowen sembahyang uruk lit, ”An nikni Abraham IKNI Allah welahenon, nikni Abraham fahet hindi haruk lit aren perisi ane hikit toho timinen let napmihin!

¹³Tot welamulteg o aruwen hilani malik ik an welahi ambeg tu hinang ta wamusa.

¹⁴It wamuson arimano misig ubam heng uruk lit ik kubag fam hinanggowon an tot naminen og nimin iminmu aren ik hinang hitminteg hambohom unta oho og isa lamin imisiyon ino fahet NIKNI Allahn Ishak fahet hiyap mumalehekon tu pemin. Ari teko lamisi halug nikni Abraham Allahn indi haruk lit aren peruk ane hikit toho tehek ulug noluk atmisi,” ulug sembahyang uruk latfag.

¹⁵Sembahyang obog toho irikim itano hiyap tuhum anggolowon yu werehon misig unuk Ribka kubag ik hinangguruk angge umaloma ha roho o inowen wilip atug watfag. Ribka ino Abraham ot Nahor inowen Milka hilibareg Betuel indag tibahon ino ahaloho watfag. Watfareg ik fahet habulfag ambeg ino wambibareg ik kubag fam hinanggibareg suhuloho laharukmu

¹⁶

¹⁷Abraham amingmingangge ino folo-folo hiyap ino iraham libareg, ”Nahaloho, ik tot hinang nimin,” ulug heng tibag.

¹⁸Heng tibagma hiyap inowen, ”Nikni, amin,” ulug kubag ino folo-folo umaloman pila fibareg ik hinanggoho og itfagma nibag.

¹⁹Nibagma hiyap inowen, ”Hat hambohom oho ik hinang isa laminmu enehum toho nalusa,” ibag.

²⁰Ibareg ik hinanggowon ino folo-folo walug libareg wam untan ik naruk ambeg hilili fibareg nin hinanggoho hilili fik larukmen eneg wam arimano enehum toho nibag.

²¹Ari turukmu Abraham amingmingangge inowen NIKNI Allahn anden pihi ane hikit toho let napmisi ano ulug ele uk fug angge hiyap ino kim haruk lit welatfag.

²²Wam arimano ik enehum toho nibagma amingmingangge inowen ambiyangmangge men sehene piren men umbagpag turukon emas fam wirihon wibareg hiyap ino og utuk lit,

²³”Hikni unuk sa? Hikni ambeg an numalikisi men nohulen kolo reg ambeg wereg ano?” ulug kapal hibagma

²⁴Ribka inowen, ”An nikni Nahor men Milka menen indag tibahon Betuel wereg,” ibareg,

²⁵”Nit ninibam hat fahet kolo reg ambeg wereg. Hambohom nohoruk ambeg fahet oho hoholangge weregma wamen naruk angge oho anggolo foroho lahe,” ibag.

²⁶Ari ibagma amingmingangge ino kinangma sahung atfareg sembahyang uruk lit,

²⁷”An nikni Abraham IKNI Allah wel haptuk lahi. Haren nikni Abraham hindi haruk lit ubam hiyag itikin ane hikit toho tehen. An nikni ot amlohowen ondohowon wereg ambeg pikit hondog naptug wahen,” ibag.

²⁸Ari ibagma Ribka ino isinga ambeg libareg amingmingangge inowen ele ibag ane fahet isinga hiyag utukmu

²⁹Ribka owe Laban inowen oho hol hibareg yet harukmen ot ino ambiyangmangge men sehene men wan tegma yet hibag. Yet hibareg Laban ino o inowen wilip atfareg folo-folo Abraham amingmingangge ambohom men ik fahet habulfag ambeg iraham weregma libareg,

³⁰

³¹”Nikni, hat NINIKNI Allahn indi hasuhon welahenma selma tuma welatmihin fug. Hat men hambohom men nohoruk ambeg hale fehereg ninibam lulen ma,” ibareg

³²hondoholug ibam libag. Libareg Laban inowen wam untan ha rulug watfag angge arimano lisoho pila fibareg wam nohoruk ambeg hoholangge tuwale fibareg naruk angge oho og isibag. Og isibareg Abraham amingmingangge umalikisi men unuyug umabukag ulug ik hinang isa watfag.

³³Suburu osoko alukema imbibagma amingmingangge inowen ele uruk lit, ”Suburu uwan na fug lit an wahi ane fahet tam hiyag hisamin halug eneg namin,” ibagma Laban inowen, ”Nikni, hiyag nisimin!” ibag.

³⁴Ibagma, ”An Abraham amingmingangge wahi,” ibareg,

³⁵”An nikni ino NINIKNI Allahn indi haruk lit wam domba, kambing, sapi, unta, keledai men fano-fano angge perak emas men amingmingangge ap angge hiyap angge anggolo roho og itisimu at ino tung ahun atisi.

³⁶An nikni uhe Sara ino mondabi sabal atisi angge famen malik ap angge indag itisimu nikniyen an war aruhuk halug anden angge aruma obog toho namloho tuwen ngi aruhu peruk lit wereg.

³⁷Aren hiyag nutuk lit, ’An namloho fahet haren Kanaan hiyap yami ruhuk fug ulug tem toho imihin.

³⁸An nikni welatfag ambeg lamihinteg an nowe ot sehelimuwon hiyap eke hiyahakunteg hondoholug waruhun,’ ulug hiyag nitisi.

³⁹Hiyag nitisimu anden te, ’Hiyap inowen hat men Kanaan kinangma lul fug uruk halug nangginoho tuhuk?’ ulug kapal harikikmu

⁴⁰aren te, ’NIKNI Allah alukema welahi ahun inowen hat let habukag ulug ot malaikat monde fik waruhumu an namloho fahet nowe ot sehelimuwon hiyap eke hiyahakun.

⁴¹Nori arimanowen hiyap eke og hutuk eleg isalug eneg ketiya sali emberuk lahenon fahet wenggel ha fug angge hindi se roho hebe eneg waruhun,’ ulug hiyag nitisi.

⁴²Hiyag nitisimu yoho ik fahet habulig ambeg wahireg nindimuwen sembahyang uruk lit, ’Nikni Abraham IKNI Allah welahenon, Abrahamen perisi ane hikit toho timinen let napmihin.

⁴³Tot welamulteg hilani malik misig ik an welahi ambeg tu hinang ta watmisiyon fam ik hinang nimin ulug heng timinmu

⁴⁴aren, ’Nikni, ik hinang hitminteg hambohom unta oho og isa lamin,’ imisiyon ino fahet NIKNI Allahn Abraham amloho fahet hiyap mumalehekon tu pemin,’ ulug sembahyang ihi.

⁴⁵Sembahyang obog toho irikim itano Ribka ino kubag umaloma ha roho wahareg ik hinanggik wambehekma anden ik hinang nitmihin ulug heng ihi.

⁴⁶Heng ihimu ik kubag ino folo-folo umaloman pilabe fehekteg, ’Nikni, ik namihinmu hambohom oho og isa laminmu nalusa,’ ehekma ninggi. Ninggimu nambohom oho ik og isa laha.

⁴⁷Og isa lahareg wahama anden, ’Hat hikni sa?’ ulug kapal hihimu, ’An nikni Nahor men Milka menen indag tibahon Betuel ino wereg,’ ehekma ambiyangmangge men sehene piren men umbagpag turuk angge emas fam wirihon wan tibihi.

⁴⁸Wan tibihireg norohole han sahung ahireg nikni Abraham IKNI Allah wel turuk lit, ’Haren an nikni ot amlohowen ondohowon wereg ambeg hondog naplug wahenma hili tu nikni amloho fahet hiyahaki,’ ulug wel tihi.

⁴⁹Ari fahet hiren an nikni hinindi reg lit nununggul unuk misihon angge re tuk teg ane hikit toho tul pelihip halug fag toho hiyag nitlihip. Tul fug pelihip halug oho seleg toho hiyag nitlihipmu hiyap winon eke yami rik lamin,” ulug hiyag isibag.

⁵⁰Hiyag isibagma Laban men Betuel menen hiyag utuk lit, ”NINIKNI Allahn perisi ane hikit toho teko lahama niren nungge uk fug tehen

⁵¹Ribka aru hat men lahupmu NINIKNI Allahn perisi ane hikit toho hikni amlohowen hilahu,” ibag.

⁵²Ibag ane ari hol hibareg Abraham amingmingangge ino kinangma sahung atfareg NINIKNI Allah wel tibag.

⁵³Wel tibareg sum wan turukon men aliliyangge emas perak fam wirihon men wibareg Ribka og itfareg isinga men owe men oho fano-fano angge og isibag.

⁵⁴Og isibareg Abraham amingmingangge men umalikisi men arimanowen ik men suburu men nibareg nohibag. Nohibareg likiya in atfareg amingmingangge inowen, ”An nikni ambeg laminen hiyag nitlihip,” ulug hiyag isibag.

⁵⁵Hiyag isibagma Ribka owe men isinga menen hiyag utuk lit, ”Ribka ino o sabirenam ano numenam ano nit min welamuhukteg hat men lahup,” ulug hiyag itfag.

⁵⁶Hiyag itfagma amingmingangge inowen, ”NINIKNI Allahn let naptukmu nikniyen perisi ane hikit toho tirikik angge re hiren an sen naplihip fug. Nikni ambeg folo-folo laminen hiyag nitlihip,” ulug hiyag isibag.

⁵⁷Hiyag isibagma iren te, ”Ribka ino wol tulteg kapal hul,” ibareg

⁵⁸Ribka wol tibareg kapal haruk lit, ”Ap tu men lalihip ano?” ulug kapal hibagma, ”Ambiyeg lul,” ibag.

⁵⁹Ibagma Ribka men ebe totma forohoman eneg welatfag hiyap ino men unubam, ”Abraham amingmingangge tu men umalikisi men ambiyeg lalihip,” ulug hiyag isibareg

⁶⁰Allah unuk fam Ribka hi ruruk lit, ”Hat nonot welahenon ap teng-teng angge winag isa fug toho welamuhubon inisinga aruhun. Haren ondohowonen endebuhubon arimanowen ap seliyon apmayap eneptuk lit inibam pin halog toho unusuruk lamuhup,” ulug hi ribag.

⁶¹Hi ribagma Ribka men amingmingangge hiyap angge arimano menen enesum tug tibibareg wam unta fam lahibareg Abraham amingmingangge ino men libag.

⁶²Libag li itano Ishak ino Kanaan kinang ik ambut fil libareg ik fahet habulfag ambeg ”Allah Mondabi Oluk Werehonen Kim Niyarisi Ambeg” suwalehon ino horogma welatfag.

⁶³Wereg lit o misihim sambil hupmu yabuk ke pen hil lamin ulug ibamen wilip atfareg yet harukmen wam unta arimano waharukmu yet isibag.

⁶⁴Yet isarukmen Ribka inowen oho Ishak yet hibareg wam unta ino famen wambibareg

⁶⁵Abraham amingmingangge ino kapal haruk lit, ”Ap misig yabukmuwen nit ninibil waharukon ari sa?” ibagma hun inowen, ”An nikni waharuk ari,” ibag. Ibagma Ribka inowen sum fam orohole hililip tibag.

⁶⁶Ari turukmu amingmingangge inowen tibag ane fahet Ishak hiyag itfag.

⁶⁷Hiyag itfagma Ishak inowen Ribka nuhe ulug hilibareg isinga Sara welatfag ibam kilapfag. Kilapfareg wereg lit Ishak inowen nisinga war atisimu nindi siyag toho weregman ubalma waha ulug Ribka fahet indi haruk latfag.