Read Angguruk Yali KEJADIAN 25 Bible Online

KEJADIAN 25 - Angguruk Yali bible

KEJADIAN 25

¹Welatfareg Abrahamen hiyap eke unuk Ketura hilibagma

²umalikisi Zimran, Yoksan, Medan, Midian, Isbak, Suah men indag itfag.

³Hun Yoksan inowen Syeba men Dedan men indag enepfag. Dedan ondohowonen ondohowon Asyur inap, Letus inap, Leum inap men wereg.

⁴Hun Midian inowen Efa, Efer, Henokh, Abida, Eldaa men indag enepfag. It obog toho arimano he Ketura inowen endetfahonen ondohowon wereg.

⁵Abrahamen mun angge man angge at inggikmuwon obog toho amloho Ishak og itfareg

⁶uhesiyap enepfahon unumalikisi arimano inindi fanowap angge we tor angge og isibag. Og isibareg Abraham oluk wereg li Ishak embeselug kinang yali filon fam lalihip ulug hiyag isibagma libag.

⁷Abraham indag tibag sali mo ilig am wirig am turukmu teng sabiren 175 atfagma amusun toho welatikik ulug indi yuwag toho war atfareg umbasi men mangno atfag.

⁹War atfagma umalikisi Ishak men Ismael menen kinang o Mamre yali fil werehon fam Makhpela owikmu kilapfag. Kinang ino tam Het ahun Zohar amloho Efron inowen ngi regma

¹⁰Abraham inowen onggo palfareg uhe Sara owikmu kilapfag ambeg ino Abraham oho kilapfag.

¹¹Kilapfareg weregma Allahn Abraham amloho Ishak ino indi haruk lit let turuk latfag. O itano li Ishak ino ik fahet habulig ambeg ”Allah Mondabi Oluk Werehonen Kim Niyarisi Ambeg” suwalehon iraham welatfag.

¹²Abraham inowen Sara amingmingangge Mesir hiyap Hagar ino hilibagma amloho Ismael indag itfahon inowen endetfahonen ondohowon ununuk tuma haharoho imbibag.

¹³Ismael inowen amloho wandabon Nebayot indag tibareg otsi Kedar, Adbeel, Mibsam,

¹⁴Misma, Duma, Masa,

¹⁵Hadad, Tema, Yetur, Nafis, Kedma men indag enepfag.

¹⁶Ismaelen endetfahonen ondohowon ununggul unuk nisanggowen arimano onowesi wal tanehen sen enesugmu inibam man-man wereg lit winon o sabo wirigmu winon o pumbukmu wereg.

¹⁷Ismael indag tibag sali mo ilig am wirig am turukmen teng fuwaben 137 atfagma war atfareg umbasi men mangno atfag.

¹⁸Ismaelen endetfahonen ondohowon arimano inibam o Hawila famen tulug kalem o Mesiren Asyur kinang fil laruk ke ilanma o Syur wereg lit onori obog toho men seli roho welatfag.

¹⁹Abraham amloho Ishak inowen turuk latfag ane tu:

²⁰Ishak indag tibag sali mo ilig am wirig am turukmu teng misig nubam hilag nuwalen 40 atfagma uhe Ribka hilibag. Ribka ino Aram ahun o Mesopotamia welatfahon Betuel amloho Laban ot welatfag.

²¹Ribka ino malik indag ta fug angge welatfagma Ishak inowen sembahyang urukmu NINIKNI Allahn holfagma Ribka ino malik ahummu atfag.

²²Malik piren ahummu wereg lit miyal-miyal atuk latfagma Ribka inowen, ”Nungge fahet alem tu an nubam ari roho turuk?” ulug indimuwen wenggel hibareg NINIKNI Allahn seleg toho hiyag nitmisi ulug kapal ha libag.

²³Kapal hibagma NINIKNI Allahn hiyag utuk lit, ”Ap ununggul unuk piren unumbasi welamuhubon hat hahummu wereg. It-it hili roho welamuhubon indag enebuhun. Ap ununggul unuk piren itano misihen eke apmayap turuk laruhu. Owe ino ot amingmingangge aruhu,” ulug hiyag itfag.

²⁴Hiyag itfagma welatfareg Ribka inowen piren umalik indag enepfag.

²⁵Tam indag atfahon ino ahap hulu reg lit amenderuk pak oruk hag toho wilibig latfag. Wilibig latfag ane fahet unuk Esau suwalfag.[24]

²⁶Esau tam indag atukmu ot fobikon inowen Esau uyug anggul seneko indag atfag. Uyug anggul seneko indag atfag ane fahet unuk Yakub suwalfag.[25] Ishak indag tibag sali mo ilig am wirig am turukmu teng piren 60 atfagma malik piren umalik itano indag tibag.

²⁷Malik piren itano su atfareg Esau ino suwe pak watuk ane indi anggat teg lit farema wilip atuk ane ahiyeg toho turuk latfag. Yakub ino ubabut lombuk toho wereg lit ibam eneg welatfag.

²⁸Ishaken pak unu narukon fahet ahiyeg toho wereg lit amloho Esau fahet indi reg latfagma Ribka inowen amloho Yakub fahet indi reg latfag.

²⁹Misihim sambil Yakub inowen sak esetukmu Esau ino fareman suburu obok toho watfag.

³⁰Watfareg Yakub fam, ”Nare, suburu obok anggolowen hulu angge ari og nimin!” ulug heng tibag. Hulu angge ibag ane ari fahet unuk eke Edom suwalfag.[26]

³¹Esau inowen heng tibagma Yakub inowen hiyag utuk lit, ”Fano heng nabehenma hat wandabon welahen ane ino embesemihinteg ilabowon hag toho atmihinmu an wandabon hag atmin halug eneg heng ehenon ari og hitmin,” ulug hiyag itfag.

³²Hiyag itfagma Esau inowen, ”Suburu oboken war am hag ane naptuken nungge fahet an mondabi wandabon welaruhuk imin?” ibag.

³³Ibagma Yakub inowen, ”Hat wandabon hag toho welaruhun ulug Allah unuk fam tik-tem toho imihin,” ulug hiyag itfagma we tik-tem toho ihi ibagma Yakub ino wandabon hag atfag.

³⁴Ari tibagma Yakub inowen suburu roti men sak amug huluwon ino men og itfagma nibareg libag. Ari roho turuk lit Esau inowen an wandabon welahi ane nirim ulug imbisibag.