Read Angguruk Yali KEJADIAN 28 Bible Online

KEJADIAN 28 - Angguruk Yali bible

KEJADIAN 28

¹Hiyag itfagma Ishak inowen Yakub wol tibareg Allah unuk fam hi ribareg hiyag utuk lit, ”Namloho, haren Kanaan hiyap hilahun fug!

²Hisinga ikni Betuel ambeg o Mesopotamia lahunteg hami Laban aholani sehelimuwon eke hilahun.

³Allah mondabi ineyon inowen hat hineyap habuhumu haren ondohowonen endebuhubon anggolo amuhupteg o pumbuk humon enele wal taneg urukon welamuhup.

⁴NINIKNI Allahn Abraham indi haruk lit let turuk latfag hag toho hat humalikisi men let heneptuk laruhumu kinang hat pohon hag toho welahen ambeg aru Allahn Abraham fam humbusagsi og isahuk irisiyon hikit toho hit ngi amuhup,” ulug hiyag itfag.

⁵Hisinga Ribka owe Laban ambeg o Mesopotamia lamihin ulug hiyag itfag ane hikit toho Yakub ino Aram ahun Betuel amloho Laban ino wereg ambeg libag.

⁶Ishak inowen amloho Yakub Allah unuk fam hi ribareg Kanaan hiyap hila fug angge o Mesopotamia hiyap eneg hilahunen yami rik lamihin ulug hiyag itfagma

⁷Yakub inowen ikni men isinga menen ibag ane ari hol hibareg o Mesopotamia libag ane fahet Esau inowen hol hibag.

⁸Hol hibareg nikni Ishak inowen Kanaan hiyap hilaruk ane fahet irim peruk ulug Esau oluk atfareg

⁹Abraham amloho Ismael ambeg libareg uhesi winon itano men telahe roho Ismael amloho Nebayot ot hiyap angge misig unuk Mahalat hilibag.

¹⁰Yakub ino o Bersyeba embeselug o Haran lamin ulug libag.

¹¹Larukmen eneg mo kobog ibagma libag ambeg itanowen helep misig wibareg helep ino fam unggul leko nohoruk latfag.

¹²Nohoruk lit nei og harukmen yal misig kinangman poholma pog toho lahabegma Allah otsi malaikat yal ino fene lahuk wambuk turukmu yet isibag.

¹³Yet isarukmen NINIKNI Allah yal ino fam unduhuk lit, ”Abraham men Ishak men INIKNI Allah An tu welahi,” ibareg, ”Anden kinang nohoruk lahen ambeg aru hat humalikisi menen ngi amag ulug og hisahuk.

¹⁴Haren ondohowonen endebuhubon arimano kinang alinlan mondeg hag amuhupmu enengginang hili yali fil, hubula fil, ik eleruk fil, ambut fil yat toho hiyal aruhu. Hat men humalikisi men feneyen Anden ap o pumbuk obog toho kinangma werehon inineyap enebuhuk.

¹⁵O kema-kema lahun ambeg An hat men wereg lit let haptuk laruhuk. Let haptuk lit eneg kinang aru fam suhuloho hondog haplug waruhuk. Anden hat ninggik obog hiya fug angge weregman eneg hubam ihi ane hikit toho turuk laruhuk,” ulug hiyag itfag.

¹⁶Ari urukmu itano Yakub ino in atfareg ele uruk lit, ”NIKNI Allah tuma wereg ane ketiya eneg noluk aha!” ibareg

¹⁷nin ele uruk lit, ”An welahi ambeg tu aben enekol haruk ambeg. O tuma Allah ibam weregma poholma laharukon sok elma welahi,” ulug akol hibag.

¹⁸Nin nohibareg likiya hubet Yakub in atuk lit Allah wereg ambeg tu ulug enehangge embemin pibareg helep unggul leko nohibahon ino lisoho kinangma hutuk tibibareg helep ino fam e zaitun ahaluwe hilili fibag.

¹⁹Hilili fibareg o ino unuk tamon Lus suwaleg latfag ambeg ino Betel[29] suwalfag.

²⁰Suwalfareg Yakub inowen Allah olohotma sali emberuk lit, ”NIKNI Allah an men ambiyeg laruk lit naruk angge men nasum wan tarukon men og nutuk lit let naptukmen eneg

²¹fano roho an nikni ibam suhuloho waruhuk halug At eneg NIKNI Allah wereg ulug wel turuk laruhuk.

²²Mun angge man angge Aren og nutuk laruhu angge arimano minggiroho numen palu rebelug palu misig hebeloho At og utuk laruhuk. Helep yaho fihi ambeg aru Allah wel turuk lamuhup ambeg aruhu,” ibag.