Read Angguruk Yali KEJADIAN 29 Bible Online

KEJADIAN 29 - Angguruk Yali bible

KEJADIAN 29

¹Ari ibareg Yakub ino Kanaan kinang embeselug yali fil libag.

²Laruk lit yet harukmen anggenma ik fahet habulig ambeg misig iraham wam domba palu hinahan luhaloho weregma yet isibag. Winasul oho wam foroho inap arimano obog tohowen enembohom ik ino iraham og eneplug waharuk halug eneg ik fahet habulig ambeg helep lare ferukon ino imbiloho ilanma imbil laruk lit enembohom ik hinang isalug helep ino imbiloho lare feruk latfag.

⁴Yakub ik ino iraham libareg wam foroho inap arimano kapal isaruk lit, ”Nori, hit kema hinap?” ibagma iren te, ”Nit o Haran ninap,” ibag.

⁵Ibagma Yakub inowen, ”Hun Nahor amloho Laban ino haruk lahep ano?” ibagma iren, ”Haruk lahe,” ibag.

⁶Ibagma Yakuben, ”At nangginoho wereg?” ulug kapal isibagma iren, ”Fano wereg,” ibareg, ”Ahaloho unuk Rahel wam domba kambing ikniyen tohon og eneplug waharukon ari yet himin,” ibag.

⁷Ibagma Yakub inowen, ”Nori, o hup am fugmu unukoho welahe angge famen nungge fahet henembohom palu enebik wahep? Ik eneg hinang isalihipteg nin hoholangge nawag ulug hondog eneplug lalihip,” ulug hiyag isibag.

⁸Hiyag isibagma iren te, ”Wam domba foroho inap arimano winonen oho enembohom og eneplug waharuk isalug eneg helep ik larehon miyaloho imbik lulteg wam arimano ik hinang usulen yet enesug lahe,” ulug hiyag itfag.

⁹Yakub inowen it men enele uruk lit weregma Rahel ino wam ikniyen tohon og eneplug waharuk latfag.

¹⁰An nisinga owe ahaloho waharuk ulug yet hibareg Yakub ino ik ambilikmu libareg helep ik larehon ino miyaloho imbik libareg Laban ambohom arimano ik hinang isibag.

¹¹Hinang isibareg Rahel mako pug toho hi ruruk lit nami ahaloho men ambi ahe ulug uba yatuk latfag.

¹²Uba yatuk lit, ”An hat hikni ot Ribka amloho wahi,” ulug hiyag itfag. Hiyag itfagma Rahel ino ikni ambeg pupu angge libareg hot Ribka amloho waha ulug hiyag itfag.

¹³Hiyag itfagma hol hibareg Laban ino folo-folo Yakub ambeg libareg mako pug toho hi ribareg ibam hondoholug watfag. Olma kibareg Yakub inowen at ubam teko libag ane fahet Laban hiyag itfagma

¹⁴Laban inowen, ”Hat we tem toho an nameben tohon wahen,” ibag. Yakub ino pikalem misig hunduko Laban men welatfagma

¹⁵Laban inowen Yakub fam ele uruk lit, ”Hat an nameben tohon welahen angge re nungge fahet an niyabuk saplangge wit nutuk laruhun? Onggo maren og netep peruk lahen?” ulug hiyag itfag.

¹⁶Laban ino aholani piren wandabon ino unuk Lea weregma fobikon Rahel indag tibahon welatfag.

¹⁷Lea il homanggen tegma Rahel ino ebe tuhum anggolo wereg lit orohole fano anggolo welatfag.

¹⁸Ari reg latfagma Yakub inowen Rahel fahet indi haruk lit, ”Nami, hat hahaloho fobikon Rahel ino hilahuken anden hat hiyabuk witukmen eneg mo ilig am wirig am turukmu mo sabiren aruhu,” ulug hiyag itfag.

¹⁹Hiyag itfagma Laban inowen, ”Nahaloho aru ap winonen hilahup tohon hat og huruhuken an men tuma welaruhun,” ibag.

²⁰Ibagma Yakub inowen Rahel hilahuk ulug mo ilig am wirig am turukmu mo sabiren fam Laban iyabuk wituk latfag. Amusun toho wituk latfag angge famen Rahel fahet indi haruk lit welatfag ane ariyen we hup pirenam hinahanam wereg hag toho welatikik peruk latfag.

²¹Ari pibareg Yakub inowen Laban hiyag utuk lit, ”Niren urukuk ane hikit toho mo sabiren fam hiyabuk arat witikikteg hahaloho hilahuken og nitmihin,” ulug heng tibag.

²²Heng tibagma Laban inowen nahaloho Yakuben hilamisiyon fahet seni esetmin ulug ap obog toho o pumbuk ino welatfahon wol enepfareg seni esetfagma nibag.

²³Nibareg hup atfagma Laban inowen ahaloho Lea hondoko Yakub og irik libagma Yakub men nohibag. (

²⁴Ari tibag sambil ino Laban inowen amingmingangge Zilpa fam Lea amingmingangge welaruhun ulug hiyag itfag.)

²⁵Likiya Yakub in atfareg yet harukmen Lea men nohoki ulug oluk atfag. Oluk atfareg Laban ambeg libareg hiyag utuk lit, ”Nungge fahet an nubam tu hag toho tehen? Haren Rahel og huruhuk irikinmu hiyabuk wituk latikik angge famen nungge fahet nele yong naptikin?” ulug hiyag itfag.

²⁶Hiyag itfagma Laban inowen hiyag utuk lit, ”O aruma inaben turuk ane hikit toho eneholani wandabon tam aben hilaruk halug eneg onombolimon fobik aben hilaruk.

²⁷Ari fahet Lea hilarikinon fahet nenehiyeg toho yunggultukmen eneg hup sabirenam welamuhukteg nahaloho Rahel oho og huruhuk. Og huruhukmu at fahet onggo nin mo sabirenam niyabuk wituk laruhun,” ulug hiyag itfag.

²⁸Hiyag itfag ane ino fahet Yakuben fano ehek pibareg hup sabirenam yunggultukmen eneg welatfagma Labanen ahaloho Rahel og itfag. (

²⁹Ari tibag sambil ino Laban inowen amingmingangge unuk Bilha ino Rahel amingmingangge welaruhun ulug hiyag itfag.)

³⁰Yakub inowen Rahel men oho ambiyeg nohibareg Lea ino indi isanggoma reg lit Rahel ino eneg indi anggen teg latfag. Ari roho wereg lit nin mo sabiren fam Laban iyabuk wituk latfag.

³¹Hun Yakub inowen Lea ino indi isanggoma regma NINIKNI Allahn yet hibareg Lea inowen malik indag tawag pibareg Rahel malik indag ta fug angge welamag pibag.

³²Ari pibagma Lea malik ahummu atfagma malik ap angge misig indag tibag. Indag tibareg ele uruk lit, ”An nindi siyag toho weregma NIKNI Allahn yet niyarisimu nahunen an indi pulmu numbahaku,” ulug malik ino unuk Ruben suwalfag.[30]

³³Welatfareg Lea ino malik eke ahummu atfagma malik ap angge indag tibag. Indag tibareg ele uruk lit, ”An nahunen indi nasug eleg ane fahet NIKNI Allahn hol harisireg malik aru oho og nitisi,” ulug malik ino unuk Simeon[31] suwalfag.

³⁴Welatfareg Lea inowen malik ap angge eke indag tibareg ele uruk lit, ”Malik ap umalik hinahan indag itikikon fahet nahunen inggik kobog niya fug teg,” ulug malik ino unuk Lewi[32] suwalfag.

³⁵Welatfareg Lea ino malik eke ahummu atfagma malik ap angge indag tibareg ele uruk lit, ”Ketiya tu famen Allah fam NIKNI ulug hi ruruk lahi,” ulug malik ino unuk Yehuda[33] suwalfag. Yehuda indag tibahon famen Lea malik indag ta fug angge welatfag.