Read Angguruk Yali KEJADIAN 30 Bible Online

KEJADIAN 30 - Angguruk Yali bible

KEJADIAN 30

¹Ari turuk latfagma Rahel inowen nowe malik indag tarukmu an malik indag ta fug angge welahi ulug owe fam ahummu siyag toho wenggel hibareg Yakub hiyag utuk lit, ”Malik eke og nuruhun, og nuruhun fug halug war aruhuk,” ibag.

²Ibagma Yakub ino indimu olok hibareg, ”An Allah hag toho welahi fug. At inowen perisi ane hikit toho hat ibili atuk lahen,” ulug Rahel pet tibag.

³Pet tibagma Rahel inowen ele uruk lit, ”An namingmingangge Bilha aru men nohomihinmu aren malik ondoko an nahoma umbuhumu an numalik aruhu,” ulug

⁴Bilha ino ahun hiyag itfag. Hiyag itfagma Yakub ino Bilha men nohibagma

⁵malik ahummu atfareg ap angge indag tibag.

⁶Indag itfagma Rahel inowen ele uruk lit, ”Anden sembahyang irikim Allahn holtisireg nibil atuk lit malik aru og nerehek,” ulug unuk Dan[34] suwalfag.

⁷Welatfareg Bilha ino malik eke ahummu atfagma ap angge indag tibag.

⁸Indag itfagma Rahelen ele uruk lit, ”Nowe men war am hag toho yik angge ruruk lit an palimu atikik,” ulug malik ino Naftali[35] suwalfag.

⁹Welatfareg Lea inowen malik indag ta fug teg lahi pibareg amingmingangge Zilpa ino Yakub uhe hag toho welamag ulug og itfag.

¹⁰Og itfagma Zilpa inowen malik ap angge misig Yakub indag itfag.

¹¹Indag itfagma Lea inowen ele uruk lit, ”Malik tuwen nahiyehap nabehek,” ulug unuk Gad[36] suwalfag.

¹²Welatfareg Zilpa inowen malik ap angge eke indag tibag.

¹³Indag itfagma Lea inowen ele uruk lit, ”An nahiyeg haruk lahi. An fahet hiyap obog tohowen ahiyeg toho wereg uruk lamuhup,” ulug malik ino Asyer[37] suwalfag.

¹⁴Welatfareg roti anggen paltuk li Ruben ino anggenma libareg e anggen malik wereg atukon fahet narukon hiyahibareg isinga Lea og irik watfag. Og irik watfahon oluk atfareg Rahel inowen, ”E anggen hamlohowen walug wahayon tot og nimin,” ulug Lea fam heng tibag.

¹⁵Heng tibagma Lean uruk lit, ”Haren an nahun hilarikinon wirim teg elehen ketiya e anggen tu oho hilamin peruk lahen?” ulug pet tibag. Pet tibagma Rahelen hiyag utuk lit, ”Nehe, e anggen ari tot og nitmihinmu yoho hup tu fam Yakub ino hat men nohomisi,” ulug hiyag itfag.

¹⁶Hiyag itfagma hupmu Yakub ino yabukmuwen ibam waharukmu Lea olohotma libareg hiyag utuk lit, ”E anggen malik wereg atukon fahet narukon namlohowen hiyag nirik wahama anden Rahel og irihiyon fahet ayeg waroho Yakub men noholihip ehekma yoho an men ambiyeg nohul,” ulug hiyag itfag. Hiyag itfagma hup ino sambil Yakub ino Lea men nohibag.

¹⁷Nohibagma Lean Allah fam heng turuk latfag ane hikit toho malik ahummu atfagma malik fuwabon indag tibag.

¹⁸Indag tibareg ele uruk lit, ”Namingmingangge Zilpa ino nahun hiyag itikikon fahet onggo Allahn malik aru og nitisi,” ulug unuk Isakhar[38] suwalfag.

¹⁹Welatfareg Lea ino malik eke ahummu atfareg malik falfalikon indag tibag.

²⁰Indag tibareg ele uruk lit, ”Allahn mondabi fano angge og nitisimu ketiya nahun inowen, ’Malik falfaliken indag nitisi angge re nuhe subon wereg,’ ulug numbahuk fug teg,” ulug malik ino unuk Zebulon[39] suwalfag.

²¹Welatfareg Lea inowen malik hiyap angge eke indag tibareg unuk Dina suwalfag.

²²Tot welatfagma Allahn Rahel fahet wenggel hibagma Rahelen heng turuk latfag ane hikit toho malik eke ahummu atfagma ap angge indag tibag. Indag tibareg Rahel inowen ele uruk lit, ”An ninggali roho welatikikon ino NIKNI Allahn elehap tirisireg

²⁴fobik malik ap angge misig eke og nuruhu,” ulug malik ino unuk Yusuf[40] suwalfag.

²⁵He Rahel inowen Yusuf indag tibagma Yakub inowen Laban fam ele uruk lit, ”Hat indag atikin ambeg hangginangma lamihin ulug hiyag nitmihinen heng haptuk lahi.

²⁶An hat men wereg lit hiyabuk anggin toho wituk latikik ane hat holuk. Ari fahet yabuk wituk latikikon onggo hiyap men unumalikisi men og nitmihinmu lamin,” ibag.

²⁷Ari ibagma Laban inowen hebeloho hiyag utuk lit, ”NINIKNI Allahn hat feneyen an nineyap naptisiyon fahet an nindimu seleg ahama hindi niyamihinteg welatmihin.

²⁸Hat wereg lit an niyabuk wituk laruhunon onggo hiyag nitmihin ane hikit toho og huruhuk,” ibag.

²⁹Ibagma Yakub inowen hiyag utuk lit, ”Anden hat hiyabuk wituk lit hambohom forohoman eneg ondoko larisi ane hat holuk.

³⁰An hambeg wam fugmu hanggengge tor angge welatisi angge famen ketiya an waharikikteg mun ane man ane turuk latikikon famen NINIKNI Allahn hat hineyap haptisimu hanggengge anggolo atisi. Anggolo atisimu nosambil lamihin uhunmu nuhesi numalikisi fahet yabuk wiruhuk?” ibag.

³¹Ibagma Labanen, ”Nungge angge hat og huruhuk?” ibagma Yakuben, ”Haren angge tor angge oho og nuruhun fug. We anden heng hapmin ane hikit toho hiyag nitmihin halug anden hambohom foroho latikik hag toho fobik oho foroho laruhuken heng haptuk lahi.

³²O yoho hambohom seheli ke laminteg wam domba oruk panduhabon, sehen hobohon, singon men wam kambing sehen hobog tohon panduhabon men en heheg amumu embeminmu onggo og nitmihin halug og eneplug namumu lamin.

³³Laminmu hat waruhunteg anden irikik ane hikit toho onggo warisi ano ulug pen hahun halug anden irikik ane hikit toho onggo hilarisi ulug holuk aruhu. Haren pen harukmen wam kambing panduhap teg elehon, sehen hobog teg elehon, wam domba sing teg elehon men wereg halug aren yoholiyangge hilarisi puhun,” ulug hiyag itfag.

³⁴Ibagma Laban inowen, ”Fano, ehen ane hikit toho tul,” ibag.

³⁵Ari ibag angge famen Laban inowen wam kambing hunon heyon oruk panduhabon, sehen hobohon, suhalorukon, wam domba singon men en heheg hilibareg umalikisi fam walug lalihipteg foroho lamuhup ulug hiyag isibag.

³⁶Hiyag isibareg it unubam nin ele uruk lit, ”Yakub tuma welaruhumu hiren wam aruma og eneplug yatma hup pirenam noholug lahupteg foroho lit welamuhup,” ulug hiyag isibag ane hikit toho libag. Libagma Yakub ino pok atfareg Laban ambohom oruk kuron arimano foroho latfag.

³⁷Wereg lit Yakub inowen e ili inggik, watnam inggik, ulup inggik men wak libareg e ahap ino hili amu-amu nonggoltuk lit wam oruk panduhabon sehen hobohon men hikirap tibag.

³⁸E inggik ahap nonggolfahon arimano wibareg wamen ik naruk lit yet hawag ulug ik naruk ambeg ik ahummu kilabe fibag. Kilabe fibagma wam arimano ik ino nul ulug waharuk lit uwali fiyag lahap-lahap atil waharuk latfag.

³⁹E inggik ik ahummu kilabe fibahon itano horogma waharuk lit wam arimano uwali lahap-lahap atuk latfag ane hikit toho unumalik e ahap ino hag toho oruk panduhabon, sehen hobohon, suhalorukon men ondoko laruk latfag.

⁴⁰Ari roho ondoko libahon arimano Yakub inowen en heheg amu-amu emberuk lit Laban ambohom winon oruk ambi rohon yet hawag ulug ununggul it inibil leho feruk latfag. Ari roho turukmu Yakub ambohom anggolo atuk latfagma Yakub inowen wam Labanen tohon men mangno roho welamuhup fug ulug amumu imbik libag.

⁴¹Yakub inowen wam arimano ik nul ulug waharukmu yet isaruk lit we wam enebe ineyon onolohotma eneg e ahap nonggolfahon arimano ik ahummu imbik waharukmu wam arimanowen e ino yet heheg uwali fiyag lahap-lahap atuk latfag angge famen

⁴²wam enebe ine elehon onolohotma e ino imbik waharuk latfag fug. Ari roho turuk lit wam oruk kuron ondoko larukon inine elehon Laban atukmu wam ineyon arimano Yakub atuk latfag.

⁴³Ari turukmen eneg Yakub ambohom domba kambing unta keledai men amingmingangge abet hiyabet anggolo atukmu tung ahun welatfag.