Read Angguruk Yali KEJADIAN 31 Bible Online

KEJADIAN 31 - Angguruk Yali bible

KEJADIAN 31

¹Welatfareg Yakub inowen hol haruk lit Laban umalikisiyen enele uruk lit, ”Yakub inowen nit ninikni anggengge obog toho hilarisireg ninikniyen tohon famen tung atisi,” ulug abug urukon hol hibag.

²Hol hibareg wenggel haruk lit Laban orohole tam seleg toho yet niyaruk latisi angge famen ketiya orohole amu roho yet niyaruk peruk latfag.

³Ari perukmu NINIKNI Allahn Yakub ubam ele uruk lit, ”Hat hikni angginangma hori wereg ambeg suhuloho lamihin. Lamihinmu An men ambiyeg lul,” ulug hiyag itfag.

⁴Hiyag itfagma Yakub inowen ot eke fam, ”Rahel men Lea men an wam foroho lahi ambeg wamusan hondog enebik lamihin,” ulug hiyag itfagma hondog eneplug watfag.

⁵Watfagma Yakuben enele unubam uruk lit, ”Hinikni orohole tam seleg toho yet niyaruk latisi angge famen ketiya orohole amu roho yet niyarukmu yet haruk lahi. Ari reg famen Allah an nikniyen wel turukon ino an men wereg.

⁶Anden hinikni iyabuk nine anggolo roho wituk latikik ane hit honoluk angge famen

⁷hinikniyen an nele ying naptuk lit yabuk wituk latikikon onggo imbik lahuk imbik wambuk turukmu eneg numenam atisi. Ari turuk latisi angge famen Allahn siyag ane nubam tuhu rohon ulug at olohotman sok latisi.

⁸Hinikniyen misihim sambil an nubam ele uruk lit, ’Wam panduhabon onggo hilahun irisi halug wam domba arimanowen unumalik obog toho onoruk panduhabon eneg ondoko laruk latisi. Eke sambil wam suhalorukon onggo hilahun irisimu wam arimanowen unumalik onoruk suhalorukon eneg ondoko laruk latisi.

⁹Ari roho turuk lit Allahn hinikni ambohom obog toho waruk lit an og nutuk latisi.

¹⁰Misihim sambil wam arimano uwali fiyag lahap-lahap atuk li anden nei og harukmen wam hunon suhalorukon panduhabon sehen hobohon arimanowen eneg uwali lahap-lahap atukmu yet harikik.

¹¹Yet harukmen Allah ot malaikat inowen an nubam, ’Yakub’, irisimu anden, ’Woh, an tu welahi,’ irikik.

¹²Irikikmu Aren hiyag nutuk lit, ’Horohole leko yet himin. Wam hunon onoruk suhalorukon panduhabon sehen hobohon arimanowen eneg lahap atukmu yet isimin. Labanen siyag ane hubam turuk ane obog toho Anden yet harikikteg alem ari hubam turuk lahi.

¹³O Betelen haren An nolohotman, ’Hat hubam eneg wenggel haruk laruhuk,’ ulug hele tem toho uruk lit enehangge helep yaho ferikin ambeg inowen hat halukeman inam atikikonen nele uruk lahi. Ari fahet ketiya in atug hori wereg ambeg hibam lamihin,’ ulug hiyag nitisi,” ibag.

¹⁴Ibagma Rahel men Lea menen Yakub fam enele uruk lit, ”Ninikni anggengge at oluk weregma oho war aruhumu oho tor angge oho hilahuk fug.

¹⁵Aren nit fahet pohon peruk lit ayeg watisi. Ayeg waroho warisi angge abirangge aren oho narisi.

¹⁶Narisimu ninikni anggengge Allahn warisiyon obog toho nit nunumalikisi menen ngi atukuk. Ari fahet ketiya Allahn hiyag hitisi ane hikit toho timihin,” ulug hiyag itfag.

¹⁷Ari ulug hiyag itfagma Yakub ino in atfareg uhesi umalikisi men wam unta fam lahap enepfareg

¹⁸ambohom men o Padan-Aram kinangma inggikmu atfag angge obog toho og eneplug nikni Ishak ambeg Kanaan kinangma lul ulug libag.

¹⁹Libag sambil ino Laban inowen nambohom oruk palmin ulug libagma Rahel inowen wam anum ikniyen ibam inditmu foroho latfag angge hirako hilibag.

²⁰Hilibagma Yakuben Aram ahun Laban hiyag um fug angge hirag-hirag laruk lit

²¹anggengge obog toho og eneplug ik Efrat paloho tom Gilead fil libag.

²²Libareg nohorukmen hup piren atfagma ap ekeyen Laban hiyag utuk lit, ”Yakub hirag-hirag larisi,” ulug hiyag itfag.

²³Hiyag itfagma Laban ori menen Yakub muko larukmen eneg hup falfaliken atfagma Yakub tom Gilead fam larukmu mug isa libag.

²⁴Libagma Aram ahun Laban inowen hubanggo nei og harukmen Allah at ambeg watfareg ele ubam uruk lit, ”Yakub fam hele holok toho uhun tohon hindi anggat toho welamin,” ibag.

²⁵Ibagma Laban ino Yakub o sabo wiroho welatfag ambeg libareg Laban ori menen oho o sabo wiroho welatfag.

²⁶Wereg lit Labanen Yakub fam, ”Nungge fahet an hiyag num fug angge naholani ininggik hele waroho imbisik laruk hag toho og eneplug waharikin?

²⁷Lamin ulug hiyag netlenma nahiyeg toho waruk teltil pinggong kong til laruk lit sini yiko mon henepte angge famen hele nubam uk fug angge hirag-hirag waharikin.

²⁸Waharikinmu an numbusagsi men naholani men mako pug toho hi eneptikik fug. We tem, ap sohuwonen turuk ane tirikin.

²⁹Hit an ninggikmu atikip angge re hit hunubam siyag ane tele angge famen o yoho hubanggo Allah hikniyen wel turukon inowen an nubam ele uruk lit, ”Yakub fam hele holok toho uhun tohon hindi anggat toho welamin,” irisi.

³⁰Irisimu ketiya nikni ibam lamin ulug hindimu sehet toho waharikin ane fahet anden oho fano pele angge famen nungge fahet wam anum anden tohon hirahalug waharikin?” ulug hiyag itfag.

³¹Hiyag itfagma Yakub inowen Laban fam ele uruk lit, ”Anden lamin ulug hiyag hetlema haholani an ninggikmuwen lalihip fug ulug tel nabik oho reg perikikteg nakolen hiyag hitikik fug.

³²Haren wam anum haren tohon yami rurukmen sa asum fam welatmisi halug at ino war aruhu. Ari fahet mun angge man angge niren walug waharukon arimano obog toho nonori tiya onolohotman pen hamihinteg wereg halug wamihin,” ibag. Ibag ane ari Rahelen wam anum ino hirahibahon Yakub apeleg teg lit ibag.

³³Ari ibagma Laban o sabo Yakuben tohon, Lea inowen tohon, hiyap amingmingangge piren itanowen tohon men kibareg yami rurukmen wam anum ino hiyahibag fug. Hiyahibag fureg o sabo Lea inowen tohon famen wilip atug o sabo Rahelen tohon fam kibag.

³⁴Rahel inowen wam anum ino walug wam unta palimu onolombik iyangge tuwalehon apma kila fibareg palimu hur arik lahibag. Hur arik lahibareg weregma Laban inowen o indit ke fatil larukmen wam anum ino hiyahibag fug.

³⁵Hiyahibag fugmu Rahel inowen ikni fam ele uruk lit, ”Nikni, an pikalem sap turuk lahireg hat holohotman in am fug teg lahi angge re an pet nabuk fug,” ibagma Laban inowen hebel-pebel toho yami ribag angge famen wam anum ino hiyahibag fug.

³⁶Ari tibagma Yakub indi inahan turuken Laban men yik abul ulug turuk lit Laban fam, ”Anden hat hubam siyag ane men nolok ane men tirikik fug angge famen nungge fahet hahako roho mug naplug wahen?

³⁷Mun angge man angge anden tohon haren hibil-hebel toho yami ruruk lit hat hanggengge eke hiyahaken? Hiyahaken halug hat hori men an nori men nonolohotman imbik watmihinmu iren nit piren hal nenebusa.

³⁸An hat men weregman eneg mo likin fuman larisi. Wereg lit anden hambohom domba men kambing men forohoman unumalik wareg angge indag atuk latisi fug. Wam yuhambukon oho anden narikik fug.

³⁹Wam olomeneyen ware feserisiyon oho hambeg walug wam fug angge ubalma wam eke emberuk latikik. Ap ekeyen hubanggo ano ilingge ano hirahalug larisi halug ubalmangge og nitmihin ulug heng naptuk latikinmu og hutuk latikik.

⁴⁰An unukoho inahanen war am hag ane turuk latikik, hubanggo sun anggolo roho nubam atukmu nohonil angge famen nil ili regman eneg welatikik.

⁴¹Ari roho an hat hibam weregman eneg mo likin fuman larisi. Anden hat hiyabuk witukmen eneg mo nunggul hiriken larisimu onggo haholani piren og nitikin. Nin ariyen hiyabuk warukmen eneg mo falfaliken atisimu wam og nitikin. Ari roho turuk lit onggo anden hubam heng haptuk latikikon haren imbik lahuk imbik wambuk turukmen eneg numenam atisi.

⁴²Allah Abraham inowen wel turuk latfahon nikni Ishak inowen oho akol toho fok turukon an men welalep fug halug nungge-nungge an ninggikmu eleg angge lamihin ulug hiyag netlenma lele angge famen an asengseng-pasengseng toho turukmu Allahn yet niyarisireg hubanggo hiyag nutuk lit, ’Hibam lamihin,’ ulug kong toho hiyag nitisi,” ibag.

⁴³Ari ibagma Labanen Yakub fam ele uruk lit, ”Hiyap ariya an naholani, malik ariya an numbusagsi, wam ariya oho an nambohom. Mun angge man angge haren yet haruk lahenon aruma anden tohon angge famen haren hilarikin angge re anden naholani unumalikisi iren endetuson men unubam nungge ane tihi ha reg?

⁴⁴Ari fahet an men hat men ninindi misig toho welamuhuk ulug sali emberuk lit enehangge misig umbul,” ibag.

⁴⁵Ibagma Yakub inowen helep eke wibareg enehangge welaruhu ulug hutuk tibibag.

⁴⁶Hutuk tibibareg Yakuben ori fam ele uruk lit, ”Helep misigmu andog tik maniyek,” ulug hiyag isibagma helep wak libareg palu ribik watfag. Palu ribik watfag ambeg ino irahamen hur atfareg suburu nibag.

⁴⁷Nibareg helep palu ribag ambeg ino Labanen at ele uruk ane hikit toho unuk Yegar-Sahaduta suwalfagma Yakuben oho at ele urukon hikit toho unuk Galed suwale fibag.[41]

⁴⁸Suwale fibareg Laban inowen, ”Helep aruma sali embeheyon fahet enehangge welaruhu,” ibag ane hikit toho helep palu ribag ambeg ino unuk Galed suwaleg.

⁴⁹Nin eke Labanen ele uruk lit, ”Fobik an oho har oho nenemu-nenemu lulteg ambi amuhuk fug angge re NINIKNI Allahn haret andet kim nisaruk laruhu,” ulug helep unuk eke Mizpa[42]

⁵⁰Suwalfareg Labanen Yakub fam ele uruk lit, ”Haren an naholani enele ying eneptuk laruhun fug, hiyap eke hilahun fug ulug ap eleg ambeg tuman ihi angge famen an men hat men niniraham Allah weregma ihi ulug holuk toho welaruhun,” ibag.

⁵¹Nin eke Labanen Yakub fam ele uruk lit, ”Haren oho anden oho nolok ane tik lamin ulug helep tu pisan tuhuk fuhen hat welaruhun ambeg men an welaruhuk ambeg men honggolegma helep aruma enehangge palu tebehe.

⁵²

⁵³Allah Abraham Nahor inikni menen wel turuk latfahonen nit haloho nunumbahaku,” ibagma Yakuben Allah ikni Ishaken akol toho wel turuk latfahon unuk fam, ”Haren ehenon hikit toho turuk laruhuken nele tem toho uruk lahi,” ibag.

⁵⁴Ari ibareg Yakub inowen tom ino fam wam waroho Allah fahet hubu lahapfareg seni nul ulug ori wol eneplug ambiyeg nibag. Nibareg tom ino fam nohibag.

⁵⁵Nohibareg likiyamon hubet Laban inowen aholani men umbusagsi men unubam Allahn fet henesug laruhu ulug mako pug toho hi enepfareg ibam suhuloho libag.