Read Angguruk Yali KEJADIAN 32 Bible Online

KEJADIAN 32 - Angguruk Yali bible

KEJADIAN 32

¹Yakub ino nibam lamin ulug funggalma larukmu Allah otsi malaikat ambeg waharuk latfag.

²Waharukmu yet isibareg Yakub inowen, ”Allah otsi luhaloho wereg ambeg tu,” ulug o ino Mahanaim suwalfag.[43]

³Suwalfareg Yakub inowen otsi winon nowe Esau o Edom wereg ambeg lalihiben tam atlihip ulug mon enepfag.

⁴Mon eneptuk lit, ”Lalihipteg hiyag itlihip ane tu, ’Nikni, an hamingmingangge Yakub ino Laban men amusun toho weregman

⁵namingmingangge men wam sapi, keledai, domba, kambing men anggolo ngi atikikteg ketiya waharuk lahiyon fahet hat nikniyen hindimu fano pemihinen nele tu emberuk lahi irisi,’ ulug hiyag umuhup!” ulug hiyag isibagma libag.

⁶Esau ambeg libareg suhuloho Yakub ambeg watfareg hiyag utuk lit, ”Ninikni, howe Esau ambeg larukukteg yet harukmen howe ino otsi enebe teng-teng angge 400 men hambeg waharukmu yet isarukukteg waharuk lahe,” ulug hiyag itfag.

⁷Hiyag itfagma Yakub ino akol anggolo hibareg indimu wenggel haruk lit, ”Numalikisi men nambohom domba, kambing, sapi, unta arimano men pul ke minggiroho palu piren enepmin halug

⁸Esauen palu misig unusuruk halug palu misig seleg toho longgo ulusa,” pibareg palu piren enepfag.

⁹Ari tibareg Yakub inowen sembahyang uruk lit, ”Numbusag Abraham men amloho Ishak men Inikni Allah welahenon, NIKNI, Haren hiyag nutuk lit, ’Hibam yugmu hori wereg ambeg suhuloho lamihin, Anden hat fet hasugmu fano roho welaruhun,’ ulug sali nubam irikin.

¹⁰An siyag nahun welahi angge famen Haren an hindi nasug lit tam irikin ane hikit toho let naptuk latikin. An nibam embeselug wilip atikik sambil nungge-nungge wa fug angge wanggun tomuk eneg seneko ik Yordan paloho larikik angge famen ketiya suhuloho waharuk lit numalikisi men nambohom men palu piren luhaloho waharuk lahe.

¹¹Nowe Esau ino watmisireg nuhesi malik men nunusimisi ulug nakol toho welahireg at inggikmuwen windat nenepmihinen heng haptuk lahi.

¹²Haren an hiyag nutuk lit, ’Anden hat fet hasugmen eneg humbusagsi ik yinggi saho ahik ayegma werehon mondeg hag toho weregma aben winag isa fug teg lamuhup,’ ulug hiyag nitikinon ino fahet wenggel hamihin!” ulug hiyag itfag.

¹³Hiyag itfareg indimuwen wenggel haruk lit, ”Esau indi fanowap turukon fahet nambohom winon tam walug lalihip ulug notsi mon enepminteg an tuma nohomin,” pibareg wam kambing heyon teng likinen 200 men, hunon likin fumahen 20 men, wam domba heyon teng likinen men, hunon likin fumahen men, wam unta unumalikisi ag narukonet teng misig 30 men, wam sapi heyon teng misig nubam hilag nuwalen 40 men, hunon numen men, keledai heyon likin fumahen men, hunon numen men wibareg

¹⁶enemu-enemu palu enepfag. Palu enepfareg otsi hiyag isaruk lit, ”An tuma nohominen hit wal tanehen palu misig-misig og eneplug tam lalihip. Kema henemu-henemu laruk lit hit winon tam atukmu winon fobik lalihip,” ulug hiyag isibareg

¹⁷tam lamisi pibahon ino fam hiyag utuk lit, ”Nowe Esau men salkal ilihip halug aren kapal hiyaruk lit, ’Hat hikni sa? Kema lamihin? Sa ambohom walug waharuk lahen?’ ulug kapal hiyamisimu

¹⁸haren hiyag utuk lit, ’Hamingmingangge Yakuben tohon walug wahi. Nikni Esau fahet walug lamihin ehekma og hirik waharuk lahi. Hamingmingangge Yakub ino an nombolim waharuk,’ imihin,” ibag.

¹⁹Otsi winon oho wal tanehen wam og eneplug lalusa pibahon arimano enebe wal-wal unubam ambi ane eneg hiyag isibag. Yakub inowen, ”Esau indi fanowap timin ulug wam arimano walug lalusan notsi tam mon enepminteg an fobik onombolim lahukmu Esauen fano waha puhu lit teg,” ulug wenggel hibag ane hikit toho

²¹otsiyen wam eneko wibahon arimano tam og eneplug larukmen at inggareg eneg o saboma nohibag.

²²Yakub ino hubanggo in atfareg uhesi piren men amingmingangge hiyap piren itano men umalikisi nanggoloben men ambohomet aren angge obog toho arimanowet og eneplug ik Yabok paloho nindig atfag.

²⁴It hondoko ik fimag fil imbisik libareg at ino suhuloho watfareg amu welatfag. Amu weregma ap eke ambeg watfareg Yakub men yik aptukmen eneg o sakan tibag.

²⁵O sakan tibagma ap inowen Yakub ine anggolowen anden apmayap tuk fug teg lahi ulug oluk atfagma Yakub awe inggalimmu ware fibagma aho inggalim kobog toho fultuk tibag.

²⁶Fultuk tibagma ap inowen ele uruk lit, ”Mo lahik watmisiyen an hinggik obog niyimin,” ibagma Yakuben, ”Allah unuk fam hi napmihin halug eneg ninggik obog hiyamin,” ibag.

²⁷Ibagma ap inowen, ”Hat hunuk sa?” ulug kapal hibagma, ”An Yakub,” ibag.

²⁸Ibagma ap inowen hiyag utuk lit, ”Hat hunuk Yakub uruk lamuhup fug. Haren Allah men ap men yik aptuk lit hine reg lahenma hat hunuk Israel[44] uruk lamuhup,” ulug hiyag itfag.

²⁹Hiyag itfagma Yakub inowen, ”Hat hunuk fag toho hiyag nimin!” ibagma ap inowen, ”Nungge fahet an nunuk hiyag hitmin?” ulug hiyag itfareg Yakub Allah unuk fam hi ribag.

³⁰Ari tibagma Yakub inowen ele uruk lit, ”Anden Allah orohole yet hihi angge famen war ahi fug,” ulug o ino Pniel[45] suwalfag.

³¹Suwalfareg mo lahik waharukmu o Pniel ino embeselug laruk lit aho inggalim kobog toho fultuk tibahon inowen uwag hihil til laruk latfag.

³²Ap inowen Yakub awe inggalimmu ware fisibag ulug Israel inaben wam unu awe inggalim fam werehon naruk eleg.