Read Angguruk Yali KEJADIAN 35 Bible Online

KEJADIAN 35 - Angguruk Yali bible

KEJADIAN 35

¹Welatfagma Allahn Yakub fam ele uruk lit, ”Howe Esau fahet hakolen larukmu An Hikni Allah holohotma inam atikikon inowen uruk lahi. Inam atikik ambeg o Betel lamihinteg wereg lit An nubahet hubu lahaptuk ambeg wit nabuhun,” ulug hiyag itfag.

²Hiyag itfagma Yakub inowen uhesi umalikisi ap at men welatfahon arimano unubam hiyag isaruk lit, ”An nindi anggin toho weregma Allahn let naptisireg kema larukmu oho hondog naptisiyon fahet hubu lahaptuk ambeg wiruhuken o tu embeselug Betel lul. Ari fahet usangge o wina keyen tohon hilaruk latikibon arimano hik isalihipteg hunubam wereg ane hal taruk lit sum puhun toho umahowon wan tilihip!” ulug hiyag isibag.

⁴Hiyag isibagma usangge arimano men inisanggomangge men obog toho Yakub og itfagma Yakuben o Sikhem horogma e suwon welatfahon ino alma salfag.

⁵Salfareg Yakub umalikisi men wilip atukmu Allahn ap o pumbuk walinggoho welatfahon arimano enekolap enepfagma Yakub umalikisi unusul ulug mug eneplug la fug teg latfag.

⁶La fug tegma Yakub umalikisi men o Betel atam unuk Lus uruk latfahon Kanaan kinang fam werehon ino libag.

⁷Libareg Yakub inowen Allah fahet hubu lahaptuk ambeg witfareg indimuwen wenggel haruk lit, ”An nowe fahet nakolen larukmu Allah nolohotma inam atisi ambeg tu,” ulug o ino unuk El-Betel suwalfag.

⁸Suwalfag ambeg inowen Ribka ebe totma forohoman eneg welatfag hiyap Debora ino war atfagma o Betel ino apma fil e suwon welatfahon alma salfag. E suwon alma salfag ahen ino unuk ”Uba Yatuk Ahen” suwalfag.

⁹Yakub ino o Mesopotamia embeselug watfagma nin eke Allah at olohotma inam atfareg hi ruruk lit,

¹⁰”Hat hunuk Yakub ino embeselug Israel uruk lamuhup,” ulug unuk suwalfareg

¹¹nin eke hiyag utuk lit, ”An Allah mondabi nineyonen nele uruk lahi. Haren ondohowonen endebuhubon anggolo amuhupteg o pumbuk humon enele wal-wal urukon welamuhup. It welamuhubon arimano enesehelimuwen ap suwon raja in atuk lamuhup.

¹²Kinang humbusag Abraham men hikni Ishak men og isahuk irikikon ino hat humalikisi menen ngi amuhuben og hisahuk,” ulug hiyag itfareg

¹³Yakub embeselug libag.

¹⁴Libagma hun Yakub inowen Allahn an nubam ele ehek ambeg tu ulug enehangge helep eke kinangma hutuk tibibareg helep ino fam anggur ahaluwe men e zaitun ahaluwe men hilili fibag.

¹⁵Hilili fibareg o ino Betel suwalfag.

¹⁶Welatfareg Yakub umalikisi men o Betel embeselug Efrata horogma larukmen Rahel inowen malik indag tarukon horog atfagma malik ino ahummu pug uruken

¹⁷nenek turuk lit inel-hanel urukmu hiyap at let turukon inowen hiyag utuk lit, ”Nin malik ap angge eke indag tamihinen hindi anggin toho welam fug,” ibag.

¹⁸Ibagma Rahel ino war arik oho lit sat eleg atukmu malik ino unuk Ben-Oni (nit nenele roho asengseng toho indag tihiyon) suwalfag angge famen ikniyen Benyamin (nit nenele roho ahiyeg toho welaruhuwon) suwalfag.

¹⁹Rahel ino war atfagma o Efrata ketiya unuk Betlehem suwalehon ino larukon ke ilanma salfag.

²⁰Salfag ambeg ino hun Yakub inowen enehangge helep misig hutuk tibibahon ino ketiya oho wereg.

²¹Ari tibareg Yakub ino o yaron unuk Eder urukon pisan isalug libareg o sabo wiroho welatfag.

²²Wereg lit Ruben inowen ikniyen uheyap taruk tibahon Bilha ino men nohibag ane fahet Yakuben hol hibareg olok anggolo hibag. Yakub inowen umalikisi ap angge nisanggowen indag enepfag.

²³Uhe Lea inowen amloho wandabon Ruben indag tibareg Simeon men Lewi men Yehuda men Isakhar men Zebulon men indag enepfag.

²⁴Uhe Rahel inowen Yusuf men Benyamin men indag enepfag.

²⁵Rahel amingmingangge Bilha inowen Dan men Naftali men indag enepfag.

²⁶Lea amingmingangge Zilpa inowen Gad men Asyer men indag enepfag. Malik arimano obog toho kinang Mesopotamia famen eneg indag enepfag.

²⁷Welatfareg Yakub ino ikni Ishak ambeg Hebron horogma o Mamre libag. Indam o ino Abraham men Ishak men ap pohon hag toho welatfag.

²⁸Ishak indag tibag sali mo ilig am wirig am turukmu teng sabiren 180 atfagma fano amusun toho welatikik ulug indi yuwag toho war atfareg umbasi men mangno atfag. War atfagma umalikisi Esau men Yakub menen kinangma salfag.