Read Angguruk Yali KEJADIAN 37 Bible Online

KEJADIAN 37 - Angguruk Yali bible

KEJADIAN 37

¹Yakub ino ikni ap pohon hag toho welatfag ambeg Kanaan kinang fam welatfag.

²At umalikisi menen turuk latfag ane tu: Yakub amloho Yusuf indag tibag sali mo ilig am wirig am turukmu nanggolop fuman 17 atfagma ikniyen uhesiyap tibahon itano Bilha men Zilpa men unumalikisi indag enepfahon itanowet mangno roho wam kambing domba foroho latfag. Ari roho wereg lit owesiyen onolok ane turuk latfahon fahet Yusuf inowen ikni fam hiyag utuk latfag.

³Yakub inowen umalikisi winon indi isanggoma reg lit Yusuf amu fahet eneg sabal umalik indag tarikik ulug indi anggen teg latfag. Indi anggen teg lit sum fanowon eke wan taruk laruhu ulug og itfag.[47]

⁴Yakub umalikisi winonen inindi wenggel haruk lit ninikniyen nonot Yusuf fahet eneg indi reg lit nit ambolmayap neneptuk ulug onoluk atfareg Yusuf fahet enelmahip toho turuk lit at fam enele fano roho uruk latfag fug.

⁵Misihim sambil Yusufen nei og hibag ane owesi hiyag isibagma iren at fahet inirim anggolo haruk latfag.

⁶Yusufen owesi hiyag isibag ane tu, ”Nori, iminon tu holeg lamek!

⁷Anden nei og harukmen nit obog toho yabukmu wereg lit roti anggen palehon pug toho emberukmen anden pug toho imbihiyon pikit in atukmu hiren pug toho embehebon arimano walinggoho unduhuk lit anden tohon olohotma kunuk toho ying atuk lahasa,” ulug hiyag isibag.

⁸Hiyag isibagma owesi arimanowen at ubam enele uruk lit, ”Hat ap suwon raja aruhukteg nit apmayap enebuhuk peruk lahen?” ulug pet tibag. Pet tibareg winasul oho nei og halug hiyag isaruk latfag ane fahet onolok anggolo haruk latfag.

⁹Ari turukmu Yusuf inowen nei eke og hibareg owesi hiyag isaruk lit, ”Anden nei og harukmen mo men pikalem men suhal nanggoloben men arimanowen an nalukema ying atukmu yet hihi,” ulug hiyag isibag.

¹⁰Nei wibag ane ino ikni oho hiyag itfagma ikniyen pet turuk lit, ”Nei ari nungge hahon wehen? An hikni hisinga men howesi men an nambeg wamuhupteg nalukema kunuk toho hur atuk lamuhup peruk lahen?” ibag.

¹¹Ari turuk latfahon fahet Yusuf owesi arimanowen at fahet inirim toho wenggel harukmu ikniyen nei wibag ane ino indimu foroho latfag.

¹²Welatfareg Yusuf owesiyen wam kambing domba inikniyen tohon arimano og eneplug libareg o Sikhem horogma foroho latfag.

¹³Ari tibagma Yakub inowen Yusuf hiyag utuk lit, ”Howesiyen wam niren tohon o Sikhem foroho lit weregma pen isa lamihin,” ulug hiyag itfagma Yusufen, ”Nikni, fano ehen,” ibag.

¹⁴Ibagma Yakuben, ”It men nambohom men fano wereg ano ulug pen isa lamihinteg hiyag nirik waruhun,” ulug hiyag itfagma Yusuf ino o Hebron tonggoma embeselug libag. O Sikhem lamin ulug larukmen

¹⁵kalem apelehen anggen ke la wam turuk latfagma ap eke at men salkal ibareg, ”Nungge yami ruruk lahen?” ulug kapal hibag.

¹⁶Kapal hibagma Yusufen, ”Nikni, nowesiyen wam kema fet enesug lit wereg ulug yami eneptuk lahireg hat holuk teg halug hiyag nimin,” ibag.

¹⁷Ibagma ap inowen, ”Howesi o tuwen wilip atug laruk lit o Dotan lul urukon holtikik,” ulug hiyag itfagma Yusuf ino owesi o Dotan wereg ambeg libag.

¹⁸Yusuf ino yatma waharukmu owesiyen yet hibareg at nenembeg waharuk halug ware fusul pibareg

¹⁹it-it enele sahaltuk lit, ”Nei fulu roho waruk ahun ino waharuken

²⁰pinggi waroho ik fahet habulig ambeg hik usul. Ari tulteg wam eliyen ware feserisi uruk lamuhuk. Ari roho ware fusulmu aren nei waruk latisi ane nangginoho tuhu ulug yet hahuk,” uruk latfag.

²¹Ari urukmu Ruben inowen hol hibareg nangginoho it ininggikmuwen windatmin pibareg ele uruk lit, ”Nori, pinggi ware fusul fug.

²²At amep wambuhu rohon niren at ubam nungge-nungge tuk fug angge anggenma ik fahet habulig ambeg lindi pila fusul,” ibag. Ibag ane ari Yusuf ino ware fusuhup tohon windatminteg hikni ambeg lamihin imin ulug wenggel hibareg ibag.

²³Yusuf ino owesi enembeg watfagma iren senetfareg asum fanowon wan teg latfahon ino nonggoloho hik isibareg

²⁴inggik lisoho walug libareg ik fahet habulig ambeg hik isa wambibag. Hik isibag ambeg ino ik yenggeleg latfag fug.

²⁵Ari tibareg suburu naruk lit yet isarukmen Ismael inap o Gilead inowen Mesir lul ulug e ahaluwe ap hihir eneptuk angge enembohom unta fam imbibareg walug waharukmu yet isibag.

²⁶Yet isibareg Yehuda inowen ori unubam ele uruk lit, ”Nori, nungge fahet nonot ware fusulteg amep hiraho fusul?

²⁷At ino nonot yuhon tehen niren pinggi wabuk fug angge Ismael inap aruman onggo og nisalusan og usul,” ulug hiyag isibagma oriyen fano ehen ibareg weregman

²⁸Midian inap[48] fano-fano angge ayeg waroho hilil noruk inap it pisan isalug libagma Yusuf ino owesiyen[49] ik fahet habulig ambeg inowen lisoho laha fibareg Ismael inap og isibagma iren ayeg waroho uang 20 perak og isibag. Og isibareg Yusuf ino o Mesir walug libag.

²⁹Libagma Ruben ino ik fahet habulig ambeg suhuloho watfareg pilap harukmen Yusuf ino eleg latfagma yuk libareg asum wan teg latfahon tararag isibag.

³⁰Ari tibareg ori enembeg libareg hiyag isaruk lit, ”Malik ino elehen ketiya nangginmin?” ibag.

³¹Ibagma Yusuf owesi arimanowen wam kambing misig watfareg Yusuf asum ino wam amep fam yuhulfareg

³²ap eke hiyag utuk lit, ”Sum aru ninikni ambeg walug lamihinteg hiyag utuk lit, ’Sum aru niren hiyaharukukteg hat hamloho asum ano ulug unug ha waharuk lahi,’ imihin,” ulug monde fibagma Yakub ambeg libag.

³³Libareg sum ino unug hibagma Yakub inowen yet hibareg ele uruk lit, ”We tem an namloho asum. Namloho Yusuf ino wam eliyen waroho senggel tarisireg kiyal-kiyal narisi,” ibareg

³⁴indi siyahen asum wan teg latfahon tararag toho hik isibareg fesi lahaboho wereg lit amloho fahet amusun toho fong watuk latfag.

³⁵Fong watuk lit weregma umalikisi abet hiyabet indi yuwahap tul ulug waharuk latfag angge famen hun ino indi yuwag atuk latfag fug. Yuwag am fug angge wereg lit, ”Namloho fahet fong watukmen eneg an oho war aruhuk,” ibareg uba yatukmen eneg welatfag.

³⁶Ari turuk lit weregma Midian inaben Yusuf ino o Mesir walug libareg hun Potifar og itfagma aren onggo og isibag. Hun Potifar ino Mesir inap inikni foroho latfag inap sehen senehon onowe welatfag.