Read Angguruk Yali KEJADIAN 40 Bible Online

KEJADIAN 40 - Angguruk Yali bible

KEJADIAN 40

¹Welatfareg Mesir inap inikni ik hinang utuk ahun men suburu roti wirag utuk inap onowe ino menen inikni fam siyag ane tibahon fahet

³ininggik hele waroho penjara Yusuf kilapfag ambeg ino kilap enepfag. Penjara ino Mesir inap inikni foroho latfag inap sehen senehon onowe ibam welatfag.

⁴Weregma ap suwon foroho latfag inap onowe inowen, ”Ap piren ariya let eneptuk laruhun,” ulug Yusuf hiyag itfag. Hiyag itfagma welatfareg

⁵hup misihim sambil ik hinang utuk ahun men roti wirag utuk ahun men itanowen nei wibareg nei fulu roho weheyon nungge fahet hehe ulug enebe wal tanehen wenggel haruk latfag.

⁶Likiyamon Yusuf ino enembeg watfareg yet isarukmen onorohole hilik toho weregma yet isibareg,

⁷”Niknisi, nungge fahet honorohole hilik toho welahep?” ulug kapal isibag.

⁸Kapal isibagma iren hiyag utuk lit, ”Yoho hubanggo nei wehe ane fahet fag toho hiyag nisarukon elehen wenggel haruk lahe,” ibagma Yusufen, ”Allahn ap inindi anggarap eneptukmu eneg aben nei waruk ane alem tu fahet wehep ulug hiyag isa reg. Ari fahet nei wehep ane hiyag nemek!” ibag.

⁹Ibagma ik hinang utuk ahun inowen hiyag utuk lit, ”Anden nei og harukmen hele anggur alem norohole fil wilibigmu yet hihi.

¹⁰Anggur alem ino fam inggik hinahan tegma inggila wilip atuk lit owil turukmu anggen yihik lahasa.

¹¹Ari turukmu nikni ap suwonen ik naruk anggubag ninggikmu weregma anggen ino tahanihireg ahaluwe pete roho kubag ino fam pilabe fihireg nikniyen namisi ulug og irihi,” ulug hiyag itfag.

¹²Hiyag itfagma Yusuf inowen ele uruk lit, ”Alem tu fahet wehen ulug hiyag hitmin: Anggur inggik hinahan itano hup hinahanam fahet hehen.

¹³Hup hinahanam welaruhunmu ap suwon inowen hat o tuwen wilip habuhureg lahap habuhumu tam ik hinang utuk latikin hag toho hinang utuk laruhun.

¹⁴Hat wilip aruhunteg fano wereg lit an oho o aruwen seleg toho wilip aruhuken wenggel niyahunteg hikni ap suwon ino fam an welahi ane fahet hiyag uruhun.

¹⁵Indam an nibam Ibrani inap wereg ambeg weregman hirag naptusama Mesir kinangma tuman oho siyag ane tirikik fug angge famen o aru kilap naptusama welahi,” ibag.

¹⁶Ari ibagma roti wirag utuk ahun inowen hol hibareg nare fam fano ane ehekma anden oho nei wihiyon hiyag itmin pibareg Yusuf hiyag utuk lit, ”Anden nei wihi ane oho ari hag toho wihi. Anden nei og harukmen roti wirahowon kou hinahan fam kilaboho nunggulmu ha roho warukmu hihi.

¹⁷Kou hinahanehon palimu wihiyon ino fam wiraho angge winon-winon nikni fahet kilaboho walug lamin ulug turukmen suwe wahasareg wiraho angge arimano nenggesa,” ulug hiyag itfag.

¹⁸Hiyag itfagma Yusuf inowen ele uruk lit, ”Alem tu fahet wehen ulug hiyag hitmin: Kou hinahan itano hup hinahanam fahet hehen.

¹⁹Hup hinahanam welaruhunmu ap suwon inowen hat o tuwen wilip habuhureg e fam lahap habuhureg hele fam ililoho song hubahakumu suwe wamuhupteg hunu wisal heheg nahup,” ulug hiyag itfag.

²⁰Hiyag itfagma hup hinahanam welatfareg ap suwonen indag napfag sali horog ahama seni esetmin ulug otsi obog toho wol enepfag. Wol enepfareg ik hinang nutuk latisi ahun men roti wirag nutuk latisi ahun men penjara famen wilip enebik lalihip ulug hiyag isibagma it piren itano hondog eneplug ap suwon otsi luhaloho weregma watfag.

²¹Watfagma ap suwon inowen ap misig ino fam hiyag utuk lit, ”Atam ik hinang nutuk latikin hag toho hinang nutuk laruhunen lahap haptuk lahi,” ibag.

²²Ibareg, ”Roti wirag nutuk latisi ahun aru war amag ulug e fam song tibisik lahalihip,” ulug hiyag isibag. Tibag ane ari obog toho Yusufen tam hiyag isibahon hikit toho tibag angge famen

²³ap suwon ik hinang utuk latfag ahun inowen Yusufen hiyag itfag ane ino mondabi apeleg atfag.