Read Angguruk Yali KEJADIAN 41 Bible Online

KEJADIAN 41 - Angguruk Yali bible

KEJADIAN 41

¹Mo ilig am wirig am turukmu piren atfagma Mesir inap inikni inowen nei og harukmen at inggareg ik Nil ayegma unduhuk lit weregman

²wam sapi sabiren enebe fano reg lit sei anggolowon ik ahummuwen wilip atfareg hoholangge ik ayegma werehon narukmu yet isibag.

³Weregman nin sapi sabiren eke mondabi siyag teg lit unuwag eneg angge ik ahummuwen wilip atfareg it fanowon iniraham in arik libareg

⁴it siyahon itanowen sapi fanowon itano sali heheg narukmu nei og hibareg lagmag il ili atfag.

⁵Ap suwon ino il ili atfareg nin nohoruk lit inggik pirenehon nei og harukmen roti anggen alem misig famen inggik sabiren wilibigmu anggen fano roho yihik latfag.

⁶Yihik latfagma roti anggen winon eke wilip atukmu inggik sabiren teg latfag angge famen siyeluwen han wiratuken anggen siyahon eneg yihik fuk teg latfag.

⁷Ari reg lit siyag toho wilip atfahon itanowen anggen fano roho yihik latfahon itano lol heheg narukmu nei og hibareg ap suwon ino lagmag in atuk lit nei waruk lahi ulug oluk atfag.

⁸Likiya indi anggin toho wenggel haruk lit, ”Inindi anggat teg inap men fulu roho warukon hiyag isaruk inap men o Mesir werehon obog toho hondog enebik lalihip,” ulug otsi mon enepfag. Ap arimano hondog eneplug watfagma ap suwon inowen nei wibag ane hiyag isibag angge famen alem tu fahet warikin ulug ap misihen oho hiyag um fug teg latfag.

⁹Hiyag um fug teg latfagma ap suwon ik hinang utuk latfag ahun inowen ikni hiyag utuk lit, ”Nikni, anden siyag ane tirikikon fahet ketiya fag toho hiyag hitmin:

¹⁰Indam an nare roti wirag hutuk latisi ahun menen turukuk ane fahet hat holok harikinteg nininggik hele waroho hat hebe fet hasug inap sehen senehon onowe ibam kilap neneptikinmu wereg lit

¹¹hup misihim sambil nit pirenen nei warukukteg nungge fahet wehe ulug nenebe wal tanehen wenggel haruk latukuk.

¹²Ibrani umalik kabiniyon misig hat fet hasug inap onowe amingmingangge roho werehon ino nit men ambiyeg weregma niren nei warukuk ane fahet hiyag utukukmu alem tu fahet wehep ulug hiyag nisarisi.

¹³Aren fuki roho hiyag nisarisi ane hikit toho teko larisiyon tu: Haren an nubam hiyag nutuk lit, ’Hiyabuk wituk latikin ambeg suhuloho watmihin,’ ulug hiyag nitikinteg nare ino ware feserikin,” ulug hiyag itfag.

¹⁴Hiyag itfagma Yusuf ino hondohik aliyek ulug otsi hiyag isibagma Yusuf ino folo-folo penjara famen wili fibareg oruk paloho sum keron wan tibibagma ap suwon ambeg hondoholug watfag.

¹⁵Watfagma ap suwon inowen hiyag utuk lit, ”Anden nei warikikon alem tu fahet warikin ulug ap misihen oho seleg toho hiyag nutusa fug. Hiyag nutusa fugmu anden hol harukmen hat eneg aben nei waruk ane fahet hol halug pikit toho hiyag isaruk urukon holtikik,” ulug hiyag itfag.

¹⁶Hiyag itfagma Yusuf inowen ele uruk lit, ”Nikni, anden hiyag hum fug teg lahi. We Allahn eneg fano ane seleg toho hiyag hitmisi,” ibag.

¹⁷Ibagma ap suwon inowen hiyag utuk lit, ”Anden nei og harukmen an ninggareg ik Nil ayegma unduhuk lit weregma

¹⁸wam sapi sabiren enebe fano reg lit sei anggolowon ik ahummuwen wilip atusareg hoholangge ik ayegma werehon naruk latusa.

¹⁹Naruk lit weregma nin sapi sabiren eke mondabi siyag teg lit unuwag eneg angge o Mesir aru walinggoho ari hahon eke harikik fuhon ik ahummuwen wilip atusareg

²⁰sapi fanowon itano sali heheg naruk latusa.

²¹Obog toho narusa angge famen enehum su am fug angge tam welatusa hag toho unuwag eneg angge weregma yet isarikikteg lagmag nil ili atikik.

²²Nil ili atikikteg nin nohoruk lit ninggik pirenehon nei og harukmen roti anggen alem misig fam inggik sabiren wilibigmu anggen fano roho yihik latisi.

²³Yihik latisimu roti anggen winon eke wilip atukmu inggik sabiren teg latisi angge famen siyeluwen han wiratuken anggen siyahon eneg yihik fuk teg latisi.

²⁴Ari reg lit siyag toho wilip atuson itanowen anggen fano roho yihik latuson itano lol heheg narukmu nei og harikik. Ninggik pirenam nei warikik ane fahet fulu roho hiyag isaruk inap unubam hiyag isarikik angge famen ap misihen oho alem tu fahet warikin ulug seleg toho hiyag nutusa fug,” ibag.

²⁵Ibagma Yusuf inowen ap suwon hiyag utuk lit, ”Nikni, alem misig ane fahet nei piren warikin. Allahn tuhuk peruk ane nei fam hiyag hitisiyon tu hiyag hitmin:

²⁶Wam sabiren sei werehon men roti anggen sabiren fano roho yihik latisiyon men yet harikin ane ari mo ilig am wirig am turukmen sabiren aruhuwon fahet yet harikin.

²⁷Wam sapi siyahon sabiren fobik wilip atuson itano men roti anggen siyahon siyeluwen han wiratukon itano men yet harikin ane suburu obok li lahakumu weregman eneg mo sabiren ilig am wirig am tuhuwon fahet yet harikin.

²⁸Anden ihiyon hikit toho Allahn tuhuk peruk ane nei fam hiyag hitisi.

²⁹O Mesir pumbuk obog toho suburu sig aruhumu narukmen eneg mo sabiren ilig am wirig am turuk laruhu.

³⁰Ari roho welamuhukteg suburu obok humon lahakumu weregman eneg nin mo sabiren eke ilig am wirig am turuk laruhumu o aru mondabi siyag aruhu. Suburu oboken ap he simbuk pising uruk lit suburu sig weregma hum toho naruk latukuk ane nenepeleg atisi uruk lamuhup.

³¹

³²Ihiyon ari hag toho Allahn we tik-tem toho folo-folo tuhuk ulug kong toho emberisi angge re alem we misihon fahet eneg nei pirenam warikin.

³³Alem ari fahet nikni, haren ap misig indi anggat teg lit mun ane man ane tuk tehon yami ruhunteg Mesir inap obog toho hal eneptuk laruhun ulug unduhuk fuhun.

³⁴Unduhuk fuhunteg hotsi winon hiyag isaruk lit mo sabiren fam suburu sig naruk li ap o pumbuk wal tanehen roti anggen paltuk lamuhubon arimano minggiroho palu fuwaben heheg emberuk lit palu misig henembeg walug waharuk lamuhupmu o pumbuk wal taneg andog toho foroho lamuhuben in enebuhun.

³⁵

³⁶Mo sabiren fam suburu obok welaruhu li ap suburu oboken war amuhup tohon roti anggen andog toho emberuk lamuhubon arimano naruk lamuhup,” ulug hiyag itfag.

³⁷Yusufen hiyag itfag ane fahet Mesir inap inikni men otsi menen fano ehek pibareg

³⁸ap suwon inowen ele uruk lit, ”Notsi, Allah ahime fanowon hun aru fam werehen ap winon at hahon eke haruk lahi fug,” ulug hiyag isibag.

³⁹Hiyag isibareg Yusuf fam ele uruk lit, ”Alem ari obog toho Allahn hiyag hitisimu hat hindi anggat teg hag toho ap winon eke wereg eleg.

⁴⁰Ari fahet Mesir inap obog toho hat hapma wereg lit hele holtuk lamuhuben lahap hapmin. We an namu eneg hat palimu welaruhuk,” ulug hiyag itfag.

⁴¹Hiyag itfareg sehene enehangge ap suwonen wan turukon inggareg inggikmuwen ho roho Yusuf inggikmu kila feruk lit, ”Haren Mesir inap obog toho fet enesug laruhunen lahap haptuk lahi,” ulug hiyag itfareg sum fanowon ap suwonen wan turuk asum wan tibibareg aliliyangge emas fam wirihon anggolopma pug tibibag.

⁴²

⁴³Ari tibibareg kereta wam kudan lisoho walug laruk angge ap suwon inowen tohon pirenehon og itfareg otsi winon hiyag isaruk lit, ”Yusuf ino kereta fam lahalug larukmu hit olohotma laruk lit ap funggalma werehon unubam iming amek uruk lamuhup,” ulug hiyag isibag. Hiyag isibareg Yusuf fam ele uruk lit, ”An ap suwon raja mondabi palimu rehon weregma hat an niraham wereg lit Mesir inap obog toho fet enesug laruhun. Haren hiyag isa fugmu ap misig amuwen inggik men uyug men lebe ruhu fug,” ulug hiyag itfag.

⁴⁴

⁴⁵Hiyag itfareg Yusuf ino unuk keron Mesir inap enele roho Zafnat-Paaneah suwalfareg uhe Mesir inap unumbasi fahet hubu lahaptuk ahun Potifera o Heliopolis welatfahon ino ahaloho Asnat og itfag. Yusuf indag tibag sali mo ilig am wirig am turukmu teng misig nubam hilag hinahan 30 atfagma Mesir inap inikni let turuk ane yabuk ak tibag. Ak turuk lit ap suwon ibamen wilip atfareg o Mesir walinggoho pen isil laruk latfag.

⁴⁶

⁴⁷Ari tibagma suburu sig atukmu narukmen eneg mo sabiren ilig am wirig am turuk latfag.

⁴⁸Suburu sig atfagma naruk li itano Yusuf inowen roti anggen o pumbuk obog toho walinggoho paloho emberukon arimano o pumbuk wal-wal palu roho foroho latfag.

⁴⁹Roti anggen palu ruruk latfahon arimano ik yinggi saho ahik ayegma werehon mondeg hag atfagma Yusuf inowen winag haruk ane imbisibag.

⁵⁰Suburu obok uwan lahuk fugmu Yusuf uhe Asnat inowen malik ap angge piren indag enepfag.

⁵¹Indag enepfagma Yusufen ele uruk lit, ”Allahn let naptukmen eneg nikni umalikisi men, asengseng haruk latikik ane men napeleg atisi,” ulug amloho wandabon ino unuk Manasye[51] suwalfag.

⁵²Nin eke ele uruk lit, ”An o aru siyag toho weregman Allahn numalikisi og nitisi,” ulug malik pirenehon ino Efraim[52] suwalfag.

⁵³Mo sabiren fam Mesir inaben suburu sig naruk latfahon eleg atfagma

⁵⁴Yusufen tam ibag ane hikit toho suburu obok humon lahibagma weregman eneg mo sabiren ilig am wirig am turuk latfag. O pumbuk obog toho kinangma werehon suburu obok toho weregma we o Mesir pumbuk walinggoho welatfahonen eneg roti anggen palu roho imbibahon arimano foroho latfag.

⁵⁵Mesir inap arimano suburu oboken inikni ap suwon fam suburu og nisimin ulug heng turukmu ap suwon inowen hiyag isaruk lit, ”Yusuf ambeg lalihipteg aren hiyag hisamisi ane hikit toho tilihip,” ulug hiyag isaruk latfag.

⁵⁶Suburu obok ino hum anggolo atuk lit Mesir pumbuk obog toho hondo ribagma Yusuf inowen roti anggen o wal taneg kilapfag ibam arimano sok husibagma Mesir inaben onggo palik kuruk latfag.

⁵⁷Suburu obok ino kinang atogman atogma sahe ribagma ap kema-kema werehon arimanowen roti anggen onggo palik lul ulug Yusuf ambeg o Mesir waharuk latfag.