Read Angguruk Yali KEJADIAN 45 Bible Online

KEJADIAN 45 - Angguruk Yali bible

KEJADIAN 45

¹Hiyag itfagma Yusuf indimuwen wenggeltuk ane at otsi Mesir inap onolohotma hirahuk fug teg lit an nowesi unubam honot welahi ulug fag toho hiyag isaminen Mesir ahun misig oho an niraham welatmisi fug ulug it unubam, ”An numbahalug wilip amek,” ulug hiyag isibagma Mesir inap obog toho wilip atfag.

²Wilip atfagma Yusuf inowen ele hum toho uba yatfag ane ino Mesir inap selma welatfahonen holtuk lit it onowe suwon ibamen oho holfag.

³Uba yatfareg Yusuf inowen owesi unubam, ”An Yusuf welahi,” ibag. Ibareg, ”Nit ninikni oluk wereg ano?” ulug kapal isibagma owesiyen at fahet enekolen enele ibag fug.

⁴Ibag fugmu Yusuf inowen, ”An niraham maniyek,” ulug hiyag isibag ane roho at iraham libagma aren nin ele uruk lit, ”An honot Yusuf hiren o Mesir walug lahup ulug ayeg waroho ap og isarikip nahun an tu welahi.

⁵Hiren an ayeg waroho ap og isarikip ane fahet hinindi anggin toho wenggel haruk lit henekol ha fug. Ap anggolo war amuhup tohon ulug anden let enebuhuken Allahn an hit henelukema tuma hondog naplug waharisi.

⁶Ap tuma werehon arimano suburu obok toho weregman eneg mo piren larisimu nin fobik yabuk wituk lit yatuk angge yahal ta fug angge weregman eneg mo fuwaben lahu.

⁷Larukmu hit obog toho war alep angge famen Allahn it onoluk welamuhuben let enebuhukteg fobik oho it unumalikisi endebuhubon men windat enebuhuk peruk lit an hit henelukema tuma hondog naplug waharisi.

⁸Hiren an tuma mon nabik waharikip fug angge famen Allahn an tuma mon nabik waharisi. Waharisireg Allah inowen an Mesir inap onowe suwon iraham unduhuk lit at ibam men o Mesir kinang obog toho men seneg laruhun ulug lahap naptisi.

⁹Ari roho tirisimu hit folo-folo ninikni ambeg lahupteg at hiyag utuk lit, ’Hat hamloho Yusuf inowen ele irisiyon tu: Allahn an o Mesir kinang obog toho seneg laruhun ulug unduhuk nubaharisi. Ari fahet we ketiya eneg an nambeg waruhun.

¹⁰Waharuk lit hat humalikisi humbusagsi hambohom kambing domba sapi hanggengge obog toho men walug waruhunteg an nibam horogma o Gosyen kinangma welaruhun.

¹¹Hat waruhunmu Mesir kinangma suburu obok toho weregman eneg mo fuwaben lahu. Larukmu hat humalikisi hambohom men siyag amuhup tohon ulug anden hat let haptuk laruhuk,’ ulug hiyag irik lahup.

¹²Ari ihiyon we tem toho Yusuf inowen ele urukmu hiren oho not Benyamin inowen oho kim neyehep.

¹³Ari fahet nit ninikni ambeg lahupteg an o Mesir kinangma fano roho welahi ane men mun ane man ane tuma yet haruk lahebon men hiyag irik lahupteg folo-folo nit ninikni an nambeg hondoholug wamuhup,” ulug hiyag isibag.

¹⁴Hiyag isibareg Yusuf inowen ot Benyamin mako pug toho hi ribareg it-it seneg lit enehiyehen uba yatfag.

¹⁵Uba yatfareg Yusuf inowen owesi obog toho mako pug toho hi ruruk lit uba yatuk latfag. Ari tibareg it-it enele uruk latfag.

¹⁶Yusuf owesi wahasa urukmu Mesir inap onowe suwon ibamen hol hibareg Mesir inap onowe otsi menen fano wahasa pibag.

¹⁷Pibareg ap suwon inowen Yusuf fam ele uruk lit, ”Hat howesi hiyag isamihinon tu: Hiren nungge-nungge walug lahup angge henembohom enemberimu imbik lahalihipteg o Kanaan kinangma lahup.

¹⁸Lahupteg nit ninikni men hit hunuhesi hunumalikisi men an nambeg hondog eneplug wamuhupmu anden o Mesir kinang fano anggolowon eneg og hisahuk. Og hisahuk ambeg wereg lit mun angge man angge si roho wilip atukon hiren naruk lamuhup imihin.

¹⁹Ari imihinteg nin hiyag isamihinon tu: Wam kudan lisoho walug laruk angge kereta piren hinahan walug lahupteg ninikni men hunuhesi hunumalikisi men kereta arimano fam hondog eneplug wamuhup.

²⁰Wamuhupteg o Mesir kinang tuman we fano-fano angge eneg hit ngi roho welamuhuben henenggengge embeselug wamuhubon fahet hinindi anggin toho wenggel hahup fug,” ibag ane hikit toho Yusuf inowen hiyag isibag.

²¹Hiyag isibag ane ari fahet Yakub umalikisiyen fano pibag. Pibagma ap suwon inowen hiyag itfag ane hikit toho Yusufen owesi arimano kereta men kalemma laruk lit suburu narukon men og isibag.

²²Og isibareg owesi wal taneg sum wan turukon fanowon misig-misig og isaruk lit we Benyamin eneg sum fuwaben men uang perak teng nanggoloben 300 men og itfag.

²³Og itfareg nungge-nungge o Mesir kinangma welatfag angge fanowon eneg wam keledai yuhambukon numen enemberimu imbik laharuk lit suburu men roti anggen olukon men wirahowon men ninikni kalemma waharuk lit narukon wam keledai heyon numen enemberimu imbik lahibareg wam aruma nit ninikni og umuhup ulug owesi og isibag.

²⁴Og isibareg, ”Kalemma laruk lit hit-hit yik abuk fug angge laruk lamuhup,” ulug hiyag isibagma Yusuf owesi libag.

²⁵O Mesir kinang embeselug libareg inikni Yakub ambeg o Kanaan kinangma libag.

²⁶Libareg inikni ubam enele uruk lit, ”Yusuf oluk wereg. At inowen Mesir kinang obog toho seneg lit wereg,” ulug hiyag itfag. Hiyag itfagma Yakub inowen un ane ehesa ulug enele holfag fug.

²⁷Enele holfag fugmu Yusufen ele uruk latfag ane obog toho Yakub umalikisiyen inikni hiyag itfag. Hiyag utukmu kereta Yusufen ninikni hondoholug wamuhuben walug lahup ibahon ino yet hibareg Yakub indi nin inahan atfag.

²⁸Inahan atfareg Yakub inowen ele uruk lit, ”Obog toho ehep. Namloho Yusuf ino oluk weregma an uwan war am fug lit at yet hahuken ambeg lahuk,” ibag.