Read Angguruk Yali KEJADIAN 46 Bible Online

KEJADIAN 46 - Angguruk Yali bible

KEJADIAN 46

¹Welatfareg Yakub inowen aren angge obog toho hilibareg o Mesir lamin ulug o Bersyeba libareg Allah at ikni Ishaken wel turuk latfahon fahet wam waroho hubu lahapfag.

²Hubu lahapfareg hup atfagma Yakuben fulu roho yet harukmen Allahn ele uruk lit, ”Yakub, Yakub,” ibagma, ”Nikni, an tu welahi,” ibag.

³Ibagma Allahn, ”An Allah, hikni Ishaken wel naptuk latisiyon welahi. Mesir laruk ane fahet hakol ha fug! O Mesiren hat humbusagsi anggolowap tuhukmu o pumbuk humon welamuhup.

⁴An hat men ambiyeg o Mesir lahukteg fobik hat humbusagsi o tu suhuloho hondog eneplug waruhuk. Hat war atukmu hamloho Yusufen hale hubahaku,” ulug hiyag itfag.

⁵Hiyag itfagma Yakub umalikisi arimanowen inikni men unuhesi malik men kereta wam kudan lisoho walug laruk angge Mesir inap inikniyen monde fibahon ino fam lahap enepfareg

⁶enembohom men enenggengge o Kanaan wereg lit ininggikmu atfahon arimano obog toho wibareg o Mesir laruk latfag. Laruk lit Yakub umalikisi umbusagsi abet hiyabet obog toho og eneplug libag.

⁸Yakub umalikisi o Mesir watfahon men iren endetfahon men ununuk tuma haharoho imbibag. Yakub amloho wandabon Ruben welatfag.

⁹Ruben inowen Henokh, Palu, Hezron, Karmi men indag enepfag.

¹⁰Simeon inowen Yemuel, Yamin, Ohad, Yakhin, Zohar men indag enepfareg Kanaan hiyap eke hilibahon fam Saul indag tibag.

¹¹Lewi inowen Gerson, Kehat, Merari men indag enepfag.

¹²Yehuda inowen Er, Onan, Syela, Peres, Zerah men indag enepfag. Er men Onan men o Kanaan kinangma war atfag. Peres inowen Hezron men Hamul men indag enepfag.

¹³Isakhar inowen Tola, Pua, Ayub, Simron men indag enepfag.

¹⁴Zebulon inowen Sered, Elon, Yahleel men indag enepfag.

¹⁵It arimano obog toho Lea inowen Yakub o Padan-Aramen indag itfahon men ahaloho Dina men abet hiyabet enebe teng misigmen nubam hilag falfaliken 33 welatfag.

¹⁶Gad inowen Zifyon, Hagi, Syuni, Ezbon, Eri, Arodi, Areli men indag enepfag.

¹⁷Asyer inowen Yimna, Yiswa, Yiswi, Beria men ahaloho Serah men indag enepfag. Beria inowen Heber men Malkiel men indag enepfag.

¹⁸It arimano obog toho Lea amingmingangge ikniyen Laban inowen og itfahon Zilpa inowen Yakub indag itfahon enebe nisanggo fuman welatfag.

¹⁹Yakub uhe Rahel inowen Yusuf men Benyamin men indag enepfag.

²⁰Yusuf ino o Mesir kinangma wereg lit hal ahun imam o On welatfahon Potifera ahaloho Asnat hilibagma Manasye men Benyamin men Yusuf indag itfag.

²¹Benyamin inowen Bela, Bekher, Asbel, Gera, Naaman, Ehi, Ros, Mupim, Hupim, Ared men indag enepfag.

²²It arimano obog toho Rahel inowen Yakub indag itfahon enebe nunggul hiriken welatfag.

²³Dan inowen Husim indag tibag.

²⁴Naftali inowen Yahzeel, Guni, Yezer, Syilem men indag enepfag.

²⁵It arimano obog toho Rahel amingmingangge ikniyen Laban inowen og itfahon Bilha inowen Yakub indag itfahon enebe sabiren welatfag.

²⁶Yakub umalikisi unuhesi winag isa fug angge umalikisi men umbusagsi men enebe teng piren nubam hilag nisanggowen 60 og eneplug libag.

²⁷It men inikni Yakub men Yusuf umalikisi piren o Mesiren indag tibahonet angge mangno roho enebe teng piren nubam hilag nisanggo fimahen 70 welatfag.

²⁸O Mesir laruk lit Yakub inowen amloho Yehuda hiyag utuk lit, ”Hat tam atmihinteg, ’O Gosyen nonolohotma waruhu irisi,’ ulug Yusuf fam hiyag irik lamihin,” ulug monde fibag. Atam monde fibareg Yakub ino o Gosyen libareg weregma

²⁹Yusuf ino nikni olohotma lamin ulug kereta wam kudan lisoho walug laruk angge fam lahibareg ikni ambeg watfareg mako pug toho hi ruruk lit amusun toho uba yatuk latfag.

³⁰Uba yatukmu Yakuben Yusuf fam ele uruk lit, ”Anden hat yet hiyihireg namloho oluk wereg ulug nindi yuwag ahama fano war aruhuk,” ibag.

³¹Ibagma Yusufen owesi men ori winon men unubam ele uruk lit, ”An nikni ap suwon ambeg laminteg nikni umalikisi men o Kanaan werehon arimano waharusa ulug hiyag irik lamin.

³²At hiyag utuk lit, ’An nori arimano wam domba men sapi men fet enesug inap wereg lit enembohom men iren angge obog toho hilalug waharusa,’ ulug hiyag uruhuk.

³³An nikni ap suwon inowen hit wol henebuhureg hiren yabuk turuk lahep ane fahet kapal hisaruk halug

³⁴hiren hiyag utuk lit, ’Niniknisiyen wam endetuk latfag hag toho niren oho nenebe totman angge wam foroho ninap welahe,’ ulug hiyag umuhup. Hiyag umuhupmu aren o Gosyen kinang fam welamuhup ulug hiyag hisahu. Mesir inaben wam foroho inap men ambiyeg welam fug teg peruk ane Yusuf oluk teg lit ori unubam ari roho ibag.