Read Angguruk Yali KEJADIAN 49 Bible Online

KEJADIAN 49 - Angguruk Yali bible

KEJADIAN 49

¹Welatfareg Yakub inowen umalikisi wol enepfareg hiyag isaruk lit, ”Numalikisi, fobik hunubam atuk laruhu ane fahet hiyag hisaminen palu arik maniyek!

²An Yakub numalikisi welahebon, an hinikni Israelen nele iminon holtihiben maniyek!

³Ruben namloho, hat wandabon, an nebe kabini reg lit indag haptikikon nahaluwe tamon welahen. Hat hebe hine reg lit palimu welahen angge famen

⁴ik il kililoho larukon hag toho wereg lit anden nuheyap tarikik hiyap men nohoruk lit an nibalma siyahap tirikinmu hat tamon hag toho welaruhun fug.

⁵Hit Simeon men Lewi men ot owe welahebonen sehen seneg lit honolok ane eneg turuk lahep.

⁶Hiren nenele sahaltul ulug palu ruruk lahep ambeg laruk lahi fug. Hit hinindimu ahe laharuken ap unusuruk lit yuhun angge wam sapi unuyug siyahap tebeseruk latikip.

⁷Ap hinindi isa fug angge honolok ane unubam turuk latikibon fahet hit siyag amok! Anden Israel inap eneseheli ke linggik-longgo hunubahakuk.

⁸Yehuda, haren ap seliyon enenduhunmu sen enesug lahenon fahet horiyen onorohole han halukeman sahung atuk lit wel haptuk lamuhup.

⁹Olomene olokon singa kabiniyonen pak waroho nalug ibam watug ying atuk lit nohoruk hag toho hat weregma ap misihen oho elel habuk fug teg laruhu.

¹⁰Haren ap suwon rajan seneg uwanggun seneg laruhunmu haren ondohowonen endebuhubonen oho senegman eneg at hat palimu werehon ino waruhumu ap o pumbuk obog tohowen ele holtuk lamuhup.

¹¹At ino waruhumu mun angge man angge anggolo werehen ambohom keledai hele anggur anggen yihikon uwag fam ilili feruk laruhu. At inowen anggur ahaluwe fam asum umag taruk laruhu.

¹²Anggur ahaluwe anggolo naruken ilanggen wirik teg lit umbagpag turuk laruhu. Sapi ag humu eneg naruk lit ayeg fano roho yanggo reg eneg laruhu.

¹³Zebulon, hat ik saho ahik ayegma welaruhun ambeg kou ik ahum pali ke larukon kuk wilip am turuk lamuhup. Hat hangginang yat toho o Sidon fam hili wareg laruhu.

¹⁴Isakhar, wam keledai sum angginon ha rulug laruk lit kel tamin ulug nohoruk hag toho hat welaruhun.

¹⁵O ino mondabi fano rehen kel tamin puhun angge re aben mingming haptukmu sum angginon ha rulug larukmen eneg hambol simbuk aruhu.

¹⁶Dan, hat humalikisi arimano Israel inap sehelimu wereg lit ununggul unuk misig enemu welamuhupmu haren alem unubam weregma fano roho haltuk laruhun.

¹⁷Pisanggo olokonen kalemma sap teg lit wam kuda uyug anggulmu fato rurukmu ap kuda fam lahalug larukon ino ambol han mako wamburuk hag toho haren ap seliyon apmayap eneptuk laruhun.

¹⁸NIKNI Allah, Haren windat nabuhun ulug nangno hasug lahi.

¹⁹Gad, hanggengge hirag tul ulug aben hat huwabuk oho waharukmu haren hebeloho unusimin ulug yanggal eneptuk laruhun.

²⁰Asyer, hat hiyabukmu yatuk laruhun angge arimano fano-fano angge anggolo werehen ap suwon raja unubaher oho fanowon eneko emberuk laruhun.

²¹Naftali, hat wam rusa farema yuhun angge larukon hag toho wereg lit hele fano roho uruk ane holuk teg laruhun.

²²Yusuf, hele anggur ik elerukmu yatukmu wilip atuk lit inggiken helep lehet hililip turuk hag toho welaruhun.[55]

²³Ap seliyonen hat huwabul ulug mug hiyaruk lit tog fam sele haptuk lamuhup angge famen

²⁴hat hindi yuwag toho wereg lit hinggik fano rehen fuki roho tog fam unusuruk laruhun. An Yakub Nikni Allah ineyon helep owik hag toho wereg lit Israel ninap wanggi wat nenesuhon inowen hat hineyap haptuk laruhu.

²⁵Allah mondabi ineyon an hikniyen wel turuk lahiyon inowen hat let haptuk lit osit poholman pilap hirik waharuk lit kinang apman ik lahap hirik waharuk laruhu. Malik men wam men anggolo og hutuk laruhu.

²⁶Tom wal tilmu werehap tibahon arimano yat toho laharuk angge famen an Nikni Allahn og hutuk laruhu angge arimano anggolo rehen tom arimano men wirim teg laruhu fug. Hori enesehelimuwen hat hamu eneg Allahn mumal hasuhon welahenma Aren og hitmin perukon arimano hat hubam eneg atuk laruhu.

²⁷Benyamin, hat olomene olokon hag toho wereg lit ilingge ap unusuruk lit enengge huhul warukon arimano hubanggo fibir eneptuk laruhun,” ibag.

²⁸Obog toho ibag ane ari it enebe nisanggowen wal tanehen ondohowonen endebuhubon unubam teko laruk laruhu ane fahet hiyag isibareg Allah unuk fam hi enepfag.

²⁹Hi enepfareg Yakuben umalikisi hiyag isaruk lit, ”Niknisi tam larusama onombolim lamin halug it iniraham Kanaan kinangma o Mamre yali fil Makhpela owikmu sal nabik lahup. Owik ino men kinang walinggoho werehon men fahet Abraham inowen Het ahun Efron fam onggo palfareg ngi atfag ambeg ino

³¹uhe Sara men inggareg men amloho Ishak men uhe Ribka men sal enepfag. It iniraham anden Lea oho saltikik.

³²Kinang numbusahen onggo palfag ambeg ino an oho sal nabik lahup,” ulug hiyag isibareg

³³ying atuk lit war atfareg umbasi men mangno atfag.