Read Angguruk Yali KEJADIAN 50 Bible Online

KEJADIAN 50 - Angguruk Yali bible

KEJADIAN 50

¹War atfagma Yusuf ino ikni emberimu ying atfareg mako pug toho seneg lit uba yatuk latfag.

²Uba yatfareg nikni tot amusun toho foroho lamuhuken amben fano-fano angge ebene are rebelihip ulug ap warehon hal eneptuk inap hiyag isibag.

³Hiyag isibagma ap wareg iringguruk inaben turuk ane hikit toho iringgurukmen eneg hup teng misig nubam hilag nuwalen 40 atfag. Mesir inaben hup teng hinahan 70 fam Yakub fahet fong watuk latfag.

⁴Fong watuk latfagma Yusufen Mesir inap inikni otsi fam hiyag isaruk lit, ”An nikni war atukon horog teg li hiyag nutuk lit, ’An war aruhukmu nangginang o Kanaan werehon fam sal nabuhup perikik ambeg sal nabik lahunen hele tik-tem toho imihin,’ ulug hiyag nitisi. Hiyag nitisi ane hikit toho tuhukteg suhuloho waruhuken ninikni ap suwon inowen fano lawag imisiyen hiyag irik lalihip,” ulug hiyag isibagma libag.

⁶Hiyag irik libagma ap suwon inowen, ”Ikni fam sali irisi ane hikit toho salik lamisi ehek ulug hiyag irik lalihip,” ulug hiyag isibag ane ino Yusuf hiyag irik libag.

⁷Hiyag itfagma Yusuf ino uhe malik men owesi otsi men ori winon men ninikni saltul ulug laruk lit unumalikisi toron men enembohom men o Gosyen embeselug larukmu Mesir inap onowesi suwon-suwon men inikni otsi men ambiyeg laruk latfag.

⁹Kereta ap emberimu laharukmu wam kudan lisoho walug laruk angge arimano oho it men laruk lit asan hum toho laruk latfag.

¹⁰Kema laruk lit aben roti anggen al sahaltuk ambeg o Atad ik Yordan yali fil werehon horogma libareg Yusuf inowen, ”Fesi lahaboho wereg lit hunu sini yunggultuk lamuhuk,” ulug hiyag isibagma enele hum toho piya sini yunggultukmen eneg hup sabirenam welatfag.

¹¹O Atad inowen yunggultukmu yet isibareg o Kanaan inaben enele uruk lit, ”Mesir inaben enele hum toho piya sini yunggultuk,” uruk latfag ane hikit toho o ino Abel-Mizraim[56] suwaleg.

¹²Ari tibareg Yakub umalikisi arimanowen inikniyen hiyag isibag ane hikit toho

¹³inikni wareg ino walug o Kanaan libareg o Mamre yali fil Makhpela owikmu kilapfag. Owik ino kinang walinggoho werehonet Abraham inowen nuhe Sara salmin ambeg ulug Het ahun Efron fam onggo palfag ambeg ino

¹⁴Yusuf inowen ikni kilapfareg owesi otsi men, ap at men watfahon arimano obog toho o Mesir suhuloho libag.

¹⁵Yakub war atfagma Yusuf owesi arimanowen enele uruk lit, ”Niren Yusuf fam siyag ane turukukon fahet ayeg waroho nunusuhu ano?” uruk latfag.

¹⁶Ari ibareg ap eke hiyag utuk lit, ”Yusuf ambeg lamihinteg hiyag itmihinon tu, ’Ninikni war atukon horog tegma

¹⁷hiyag nisaruk lit, ’Honot Yusuf fam alem mondabi siyahon tirikibon ambolmayap tuhuwen heng tuhup,’ irisi. Ari fahet nit Allah ninikniyen wel turuk latisiyon amingmingangge welahereg siyag ane hubam turukukon apmayap timihinen heng haptuk lahe ehesa,’ imihin,” ulug monde fibagma libag. Libareg hiyag utukmu Yusufen hol hibareg uba yatuk latfag.

¹⁸Welatfareg Yusuf owesi arimanowen nir oho lul ulug onot ambeg libareg olohotma kinangma sahung atfareg, ”Nit hat hamingmingangge welahe,” ulug hiyag itfag.

¹⁹Hiyag itfagma Yusufen ele uruk lit, ”An Allah ibalma welam fug teg lahireg henekol toho welam fug!

²⁰Hiren an nuwabul perikip angge famen Allahn iren tulusa ane ari feneyen anden ap anggolo let enebuhuk perisi. Ap anggolo roho war amuhup tohon let enebuhuk perisi ane hikit toho ketiya teko larisi.

²¹Ari fahet henekol toho welam fug. Hit hunumalikisi men anden fet henesug laruhuk,” ulug hiyag isibag. Ari ulug ele fano roho hiyag isaruk lit owesi inindi yuwahap enepfag.

²²Yusuf ori men o Mesir weregman eneg indag tibag sali mo ilig am wirig am turukmu teng uhan 110 atfag.

²³Yusuf ino sabal atfareg amloho Efraimen umbusagsi indag eneptuk latfahon yet isaruk lit amloho wandabon Manasye inowen indag tibahon Makhir inowen endetfahon itano numalikisi yuhon hag toho wereg ulug fet enesug latfag.

²⁴Yusuf war atukon horog atfagma owesi hiyag isaruk lit, ”An war aruhukmu Allahn hit fet henesugmen eneg o aruwen hondog heneplug wilip aruhureg Abraham, Ishak, Yakub fam og hisahuk ulug sali imbibag ambeg ino hondoko hunumbahik lahu.

²⁵Hunumbahik lahu sambil an nuwag og naplug lahuben henele tik-tem toho ilihip,” ulug hiyag isibag.

²⁶Hiyag isibareg Yusuf ino indag tibag sali mo ilig am wirig am turukmu teng uhan 110 atfagma war atfag. War atfagma ebe amusun toho foroho lamuhuk ulug amben fano-fano angge ebene are ribareg peti e sali roho witfahon fam kilapfag.