Read Angguruk Yali KEJADIAN 6 Bible Online

KEJADIAN 6 - Angguruk Yali bible

KEJADIAN 6

¹Kinang atogman atogma ap anggolo atuk lit malik hiyap angge indag eneptuk latfagma

²Allah otsi poholmon arimanowen pen isarukmen hiyap arimano enebe tuhum fano roho welatfag. Welatfagma iren inindi perukon hilaruk latfag.

³Ari turuk latfagma NINIKNI Allahn ele uruk lit, ”Ap mondabi onoluk welamuhup tohon sat Anden og isaruk lahiyon it unubam amusun toho welaruhu fug. It ap kinangmon war atukon werehen it onoluk welamuhubon hili mo ilig am wirig am turukmu teng fuwaben 120 eneg welamuhup,” ibag.

⁴Allah otsi poholmon men hiyap arimano menen malik indag enepfahon arimano unubahare mondabi humon welatfag. Iren ondohowonen ondohowon oho ari hag toho welatfag. Indamet it arimano wereg lit enekol eleg toho enembong se roho turuken ununuk palimu roho welatfag.

⁵ NINIKNI Allahn yet isarukmen ap kinangmon inindimuwen siyag ane eneg anggolo wenggeltuk lit onolok ane til-wil larukmu yet isibag.

⁶Yet isibareg nungge fahet it wal eneptikikteg kinang tu fam welamuhup ulug hiyag isarikik pibareg indi siyag atfag. Nambiken tirikik ulug indimu ouk haruk lit, ”Ap Anden wal eneptikikon aruma men lebe ruruk angge kinangma werehon men pohol ke larukon men arimano obog toho Anden elehap enebuhuk,” ibag.

⁸We hun Nuh amu eneg NINIKNI Allahn indi haruk latfag.

⁹Hun Nuh inowen turuk latfag ane tu: At umalikisi ap angge hinahan itano ununuk Sem, Yafet, Ham indag enepfag. Ap kinangma welatfahon arimanowen siyag ane eneg turukmu hun Nuh amu eneg Allah men ininggik ahandip toho wereg lit siyag ane tuk fug angge fano roho welatfag angge famen

¹¹ap winon obog toho o kema-kema werehon arimanowen Allah olohotma onolok ane eneg turuk lit ap unusil laruk latfag.

¹²Allahn yet isarukmen iren tuk fug teg ane eneg turuk lit enemben siyag toho welatfag.

¹³Welatfagma Allahn Nuh fam ele uruk lit, ”Ap obog toho eleg amag ulug kong toho emberuk lahi. Iren onolok ane turukon kinang aru fam keleg tehen ap enebe men mun angge man angge obog toho elehap tuhuk.

¹⁴Ari fahet e ineyon fam kou ik ahum pali ke laruk angge eke wit taruk laruhun. Kou ino fam hili wal taneg wiruhunteg ik kuhu rohon ulug sel ke men undama le ke men somug fam topno rebehun.

¹⁵Kou ino wirimangge yat toho wirim tuhunon il teng numen 133 meter, ayuhuk fil wirim tuhunon il teng piren 22 meter, lahabeg wirim tuhunon il teng misig 13 meter wirim toho wiri fuhun.

¹⁶Ungga men ubahat men honggolegma tot kolo rebehun ambeg il misig wirim tuhun. Kou ino pali fil hinawi piren wiri fuhunteg kou ino umbantu fil sok eke yente fuhun.

¹⁷Sat wereg angge obog toho eleg amag ulug Anden ik humon yenggeltil laharuk lit hondo enebukag ulug monde fuhukmu obog toho war amuhup.

¹⁸We hat eneg windat habuhuk ulug sali hubam emberuk lahi. Ari fahet hat huhe humalikisi unuhesi men kou wiruhunon ino fam kuhup.

¹⁹Lebe ruruk angge kinangma werehon men pohol ke larukon men ir oho ambiyeg war amuhup tohon ununuk wal taneg werehon uhe ut ahun ut kou ino fam kilap enebuhun.

²¹Hit men lebe ruruk angge arimano menen naruk lamuhup angge anggolo kilabuhun,” ulug hiyag itfag ane hikit toho tibag.