Read Angguruk Yali KEJADIAN 9 Bible Online

KEJADIAN 9 - Angguruk Yali bible

KEJADIAN 9

¹Ari ibareg Allahn Nuh umalikisi men inineyap enepmin ulug hiyag isaruk lit, ”Hit famen ap anggolo endebuhubonen kinang aru keleg uhup.

²Lebe ruruk angge kinangma werehon men pohol ke larukon menen hit fahet enekol toho welamuhup. It obog toho hit hininggikmu welamuhup.

³Kinangman wilip atuk angge naruk lamuhup ulug Anden og hisarikik hag toho ketiya lebe ruruk angge arimano oho naruk lamuhuben hiyag hisaruk lahi.

⁴We mep fam himengge werehen lebe ruruk angge mebet angge naruk lamuhup fug.

⁵Ap men wam mene pisanggo menen ap eke watuk halug Anden ayeg waroho unusuhuk.

⁶Anden ap An nahuhe wirim toho wal eneptikik angge re ap san ap eke ware fusuhu halug at ino oho ap winonen wabuhup.

⁷Hit famen ap anggolo endebuhubon kinang atogman atogma keleg toho welamuhup,” ibag.

⁸Ari ibareg Allahn Nuh umalikisi men nin hiyag isaruk lit,

⁹”Ketiya hat men humalikisiyen endebuhubon men

¹⁰lebe ruruk angge kinangma werehonet pohol ke larukonet hit ambiyeg kou ino famen wilip ahebon hunubam sali embeminon tu:

¹¹Mun angge man angge sat werehon obog toho nin ik fam unusuhuk fug ulug sali tu emberuk lahi. Ik humon yenggeltil laharuk lit kinang aru nin eke siyahap tuhu fug.

¹²Anden hit men lebe ruruk angge arimano men hunubam sali emberuk lahiyon tu mondabi weregman eneg napeleg aruhu fug. Sali emberuk lahiyon tu fahet tem toho peruk lamuhuben enehangge

¹³An nasehen aru kaliye ahikal hag toho hina fam emberuk lahi.

¹⁴Anden hinan pohol hililip turuk li nasehen aru inam atuk halug

¹⁵Anden mun angge man angge sat werehon arimano ik fam unusuhuk fug ulug sali emberuk lahiyon tu fam wenggel haruk laruhuk.

¹⁶Kaliye ahikal inam atukmu Anden yet haruk lit hit men lebe ruruk angge kinangma werehon obog toho hunubam sali eleg am fug tehon emberuk lahiyon aru fahet noluk toho welaruhuk.

¹⁷Anden mun angge man angge sat werehon unubam sali emberuk lahiyon tu fahet tem toho peruk lamuhuben enehangge kaliye ahikal aru emberuk lahi,” ibag.

¹⁸Nuh umalikisi kou ino famen wilip atfahon itano ununuk Sem, Yafet, Ham wilip atfag. Ham amloho Kanaan welatfag.

¹⁹Nuh umalikisi hinahan itano ap kinangmon obog toho unumbasi atfag.

²⁰Nuh ino yabuk wituk ahun wereg lit anggur yabuk wituk ane aren ak tibag.

²¹Anggur yabuk wituk lit misihim sambil Nuh ino anggur ahaluwe olokon nibareg nenek turuk latfag. Nenek turuk lit asum wan teg latfahon nonggoloho hik isibareg abiye ibam o saboma nohoruk latfag.

²²Hun ino abiye nohorukmu Kanaan ikni Ham inowen yet hibareg ori piren unubam hiyag isa libag.

²³Hiyag isa libagma Sem men Yafet men itanowen sum eke wibareg unumaloma tuhuloho walug ninikni abiye weregma yet hahuk tohon ulug enembol han o ino kibareg inikni sum ino fam hililip tibibag.

²⁴Hililip tibibagma welatfareg Nuh ino indi yuwag atfagma in atuk lit Ham inowen nubam tuk fug ane tehek ulug indi anggar atfagma

²⁵ele uruk lit, ”Numbusag Kanaan siyag amag! At ori enemingmingangge toron welamag!

²⁶Namloho Sem IKNI Allah wel turuk lamuhup! Kanaan ino Sem amingmingangge welaruhu.

²⁷Allahn Yafet angginang hili yat toho hiyag uruhumu[11] aren ondohowonen endebuhubon arimano Sem umalikisi men ambiyeg welamuhup. Kanaan ino Yafet amingmingangge aruhu,” ibag.

²⁸Ik humon yenggeltil lahibag liyen mo ilig am wirig am turukmen teng nuwalen 350 atfagma Nuh ino mondabi sabal 950 tahun atfareg war atfag.