Read Angguruk Yali 2 SAMUEL 1 Bible Online

2 SAMUEL 1 - Angguruk Yali bible

2 SAMUEL 1

¹Saul ware fisibareg weregma Daud inowen Amalek inap unusibareg suhuloho watfareg hup pirenam o Ziklag welatfag.

²Weregman o hinahaneg angge ap sehen senehon Saul min welatfahon misig indi siyahen asum kiririp teg angge fesi unggul ke lahabeg angge Daud ambeg watfag. Watfareg elenggen fam hur atlug Daud hi ribag.

³Hi ribagma Daud inowen, ”Keman waharuk lahen?” ulug kapal hibagma ap inowen, ”Ap seliyonen nunusuruken nit Israel ninaben o sabo witukuk ambehen wilip atikikteg wahi,” ibag.

⁴Ari ibagma Daud inowen, ”Turusa ane ari hiyag nimin,” ibagma ap inowen, ”Israel ninap tog aptuk ambehen nenekolen linggik-longgo urukmu anggolo nunusurusama war atusa. Saul men amloho Yonatan men oho unusurusama war atusa,” ulug hiyag itfag.

⁵Hiyag itfagma Daud inowen, ”Saul men amloho Yonatan men war atusa ane fahet nangginoho holuk atisi?” ulug kapal hibag.

⁶Kapal hibagma ap kabiniyon inowen, ”An tom Gilboa fam wereg lit yet harukmen ap seliyon kereta wam kudan lisoho walug laruk angge men wam kuda men fam laharusareg Saul wabul ulug mutug waharukmu Saul fit fam kinangma tomuk toho weregma yet harikik.

⁷Saulen hebeloho an yet niyaruk lit wol naptisimu anden te, ”Wo nikni,” irikik.

⁸Wo irikikmu aren, ”Hat sa?” ulug kapal niyarisimu, ”An Amalek nahun,” irikikmu

⁹aren te, ”War arik oho lit nahime eleg atuken nambeg watmihinteg nuwatmihin,” ulug hiyag nitisi.

¹⁰Hiyag nitisimu Saul nenek turuken mako wambimisireg war atmisi ulug nundama noluk atisimu iraham larikikteg ware feserikik. Ware feserikikteg ap suwonen lahaptuk angge unggulmu wan teg latisiyon men sohomangge inggikmuwon men warikikteg nikni hat hambeg walug wahi,” ibag.

¹¹Ari ulug hiyag itfagma Daud indi siyahen asum wan teg latfahon tararag isarikim itano ap at men ambiyeg welatfahon arimanowen oho enesum tararag isibag.

¹²Tararag isibareg Saul men amloho Yonatan men NINIKNI Allah umalikisi Israel inap men pinggi unusibahon fahet suburu na fug angge piya sini yiko uba yatuk lit weregman eneg mo ubuk ibag.

¹³Welatfareg Daud inowen ap ele walug watfahon ino fam kapal haruk lit, ”Hat hibam kema?” ibagma ap inowen, ”An ap pohon, Amalek nahun welahi,” ibagma

¹⁴Daud inowen, ”Saul NINIKNI Allahn mumaltisiyon famen nungge fahet hakol eleg toho ware feserikin?” ibag.

¹⁵Ari ibareg amingmingangge eke wol tibareg, ”Hun aru ware fesemihin,” ibagma pinggi ware fisibag.

¹⁶Hun ino war atikim itano Daud inowen at ubam ele uruk lit, ” ’Anden ap NINIKNI Allahn mumaltisiyon ino ware feserikik,’ ehen ane ari famen alem ari hinggareg hubamap tehenma war atmihin,” ibag.

¹⁷Saul men amloho Yonatan men ware fisibag ane fahet Daud inowen piya sini yunggultuk latfag.

¹⁸Yunggultuk lit Daud inowen, ”Sini uruk lahiyon aru[1] Yehuda inap hiyag isa lalihip,” ulug umalikisi hiyag isibag. Sini ino suwesingga unuk Yasar fam[2] tam haharoho imbibahon hikit toho tuma uruk lahe:

¹⁹”Israel hinap nori, hit hunumalikisi heneliliyangge welatuson arimano henentom fene ware feserusa. Yihi, ap enekol eleg toho turuk latuson arimano unusurusa.

²⁰Filistin inap eneholani enehiyeg toho yunggultuk lit ap enembilahap paleg elehon eneholani enele hemet toho uhup tohon o Gat men o Askelon men hiyag isa la fug!

²¹Tom Gilboa ino famen ap war atuken hibilil men osit men wambik waruhu fug. Ap enekol eleg toho turuk inap enehap mapmu eneptuk angge sabelepma hik isarusama Saulen ahap mapmu angge turuk latisiyon oho wam sei eleg atisi.

²²Yonatan ino o kema-kema tog aptuk lit ap unusurukmu war atuk latuson enemep tog ambiyangma tag teg latisi. Karog Saulen tohon inowen misihim oho ap inine roho turuk latuson unusuk fug angge welatisi fug.

²³Saul men Yonatan men fahet aben inindi enesug latusa. Onoluk wereg lit unubabut misig toho welatusa hag toho ketiya oho ambiyeg war atusa. It piren folo-folo laruk ane suwe ngilek laruk ane men wirim teg latisi fug. Olomene onolokon men it piren onolok welatuson men wirim teg eleg.

²⁴Israel hiyaben Saul fahet uba yatuk lamek! At inowen sum fanowon il hik tohon wan heneptuk lit heneliliyangge ili faya rurukon hunubam lahap heneptuk latisi.

²⁵Yihi, enekol eleg toho turuk latusa inap tog elman unusurusa. Yonatan ino henentom fam ware feserusa.

²⁶Yonatan nare, nindi reg latikikon, hindi anggen nasug latikinmu hat hubahet an nindi siyag aha. Hiyaben ap inindi enesug ane tot apma regma haren hindi nasug latikinon palimu welatisi.

²⁷Yihi, enehako roho turuk latusa inap unusurusama enesehen siyag atisi,” ulug Daud inowen yunggultuk latfag.