Read Angguruk Yali 2 SAMUEL 10 Bible Online

2 SAMUEL 10 - Angguruk Yali bible

2 SAMUEL 10

¹Welatfagma Amon inap onowe suwon Nahas war atfagma ubalmangge amloho Hanun ap suwon lahibag.

²Lahibagma Daud inowen ele uruk lit, ”Nahas inowen an fahet indi nasug latisi hag toho anden oho amloho Hanun fahet nindi reg laruhuk,” ibareg Daud inowen ikni war atisiyon fahet indi yuwahap tuhuben lalihip ulug otsi mon enepfagma o Amon kinangma libag.

³Libagma Amon inap onowesi arimanowen inikni Hanun fam enele uruk lit, ”Daud inowen Hanun ikni indi reg lit amloho fong watukon ino indi yuwahap tuhuk ulug otsi mon enebik waha peruk lahen? O pumbuk aru halog tuhuken aluwarik lahup ulug otsi mon enebik waha,” ulug hiyag itfag.

⁴Hiyag itfagma Hanun inowen Daud otsi arimano sen enepfareg panisung fima fil eneg pal eneptuk lit enesum wan teg latfahon eneho keyen kong toho hik isibareg hinibam lalihip ulug hiyag isibag.

⁵Ari tibag ane fahet aben Daud hiyag itfagma aren otsi winon unubam hiyag isaruk lit, ”Notsi arimano mondabi ininggaliyap eneptusama onolohotma lalihipteg hiyag isalihibon tu: Hit o Yerikho weregman eneg panisung nin wilip aruhumu hinibam suhuloho wamuhup,” ulug hiyag isibag.

⁶Ari tibagma Amon inaben Daud ubam amben siyahon turukuk ulug wenggel hibareg ap o kema-kema werehon ninibil arik wamuhuben enembeg lalihip ulug ap mon enepfagma Siria inap o Bet-Rehob men Zoba men welatfahon sehen senehon unuyug fam larukon teng-teng angge 20.000 men, o Maakha inap teng-teng angge 1.000 onowe suwon men, o Tob inap teng-teng angge 12.000 men Amon kinangma palu arik watfag.

⁷Palu arik waharusa urukmu Dauren hol hibareg Yoab men enehako roho turuk inap sehen senehon obog toho men tog abik lalihip ulug mon enepfagma libag.

⁸Libagma Amon inap arimano wilip atug o pumbuk Raba walinggoho elehet ohowon sok alukeman tog abul ulug luhal atukmu o Siria-Zoba inap, o Siria-Rehob inap men, Tob inap, Maakha inap enemumu anggenma unduhuk latfag.

⁹Ari roho Yoab aluke filet ambol filet unduhuk lit tog ubam pising usul ulug turukmu yet isibareg Yoaben otsi enehako roho turukon eneg en enepfareg iren Siria inap unusul ulug eneluke fil in arik libag.

¹⁰Laruk lit nonotsi winon haren milal eneptuk lit Amon inap men tog aplihip ulug ot Abisai hiyag itfag ane roho Amon inap eneluke fil in arik libag.

¹¹In arik larukmu Yoaben Abisai fam ele uruk lit, ”Siria inap aruman an apmayap naptukmu yet niyamihin halug an let nabik watmihin angge famen Amon inaben hat apmayap haptukmu yet hiyaminteg anden hat let habik watmin.

¹²Hakol ha fug! Ninine roho turuk lit nonori Israel ninap men ninibam Allahn ngi rehon arimano men fahet tog aptukmu NINIKNI Allahn fano perukon timisi,” ibag.

¹³Ari ibagma Yoab otsi menen Siria inap unusul ulug larukmu it arimano enekolen linggik-longgo ibag.

¹⁴Siria inap linggik-longgo urukmu Amon inaben yet isibareg ir oho Abisai olohotman linggik-longgo uruk lit inibam pumbukmu kibag. Kibagma Yoab inowen Amon inap waroho apmayap enebihi ulug otsi men suhuloho o Yerusalem watfag.

¹⁵Watfagma Israel inaben apmayap neneptusa ulug wenggel hibareg Siria inap obog toho palu atfag.

¹⁶Palu atfagma Hadadezer inowen nonori Siria inap ik Efrat fuma fil werehon arimano nit men ambiyeg tog abik lahuken hiyag isa lalihip ulug ap mon enepfagma libag. Hiyag isa libagma Siria inap arimano oho Hadadezer ot Sobakh inowen milal eneptuk lit nonori inibil arik lahuk ulug o Helam libag.

¹⁷Libag ane ari aben Daud hiyag itfagma Dauren Israel inap sehen senehon obog toho wol toho palu enepfareg it men ik Yordan paloho fuma fil nindig atlug o Helam larukmu Siria inaben tog abul ulug Daud otsi men eneluke fil luhal atfareg tog unubam pising tik libag.

¹⁸Pising tibagma Israel inaben hebeloho unusurukmu Siria inap enekolen linggik-longgo libag. Linggik-longgo urukmu Daud otsi menen wam kudan lisoho walug laruk angge kereta fam lahalug laruk inap teng pireneg fimahen 700 men unuyug fam larukon teng-teng angge 40.000 men unusuruk lit onowe Sobakh oho ware fisibagma war atfag.

¹⁹Israel inaben nit waroho apmayap neneptusa ulug Siria inap hun Hadadezer apma welatfahon arimanowen wenggel hibareg nenekolen fobik Amon inap let enebuhuk fug peruk lit Daud fam, ”Tog embeselug hat hapma welamuhuk,” ulug sali imbibag.