Read Angguruk Yali 2 SAMUEL 11 Bible Online

2 SAMUEL 11 - Angguruk Yali bible

2 SAMUEL 11

¹Mo wirig atfareg ilig atug heriyegma ap suwon-suwon tog abul ulug wilip atuk li Daud inowen Yoab men umaliki men Israel inap obog toho tog abik lalihip ulug mon enepfag. Mon enepfagma Amon inap o pin arap toho unusuruk lit o pumbuk Raba walinggoho kilabeg latfag. Daud amu eneg o Yerusalem welatfag.

²Misihim sambil hupmu Daud ino nohoruk latfag ambehen in atlug at ibam unggama lahibareg ungga ke la wam turuk lit yet harukmen hiyap tuhum fanowon eke ahap ik fam umatukmu yet hibag.

³Yet hibareg Daud inowen hiyap ari sa ulug kapal isa lalihip ulug otsi mon enepfagma ap enele uruk lit, ”Hiyap ari Eliam ahaloho Batsyeba, Het ahun Uria uhe wereg,” ibag.

⁴Ari ulug hiyag itfagma Daud inowen, ”Hiyap ari wak lalihip,” ulug otsi mon enepfagma hiyap ino Daud ambeg watfag. Watfagma Daud at men ambiyeg nohibag. Batsyeba mep eleg atfagma mep ket puhun tibibareg Daud men noholug ibam suhuloho libag.

⁵Libareg wereg lit hiyap ino malik ahummu atfagma an malik fet talug lahireg Daud hiyag irik lalihip ulug ap mon enepfag.

⁶Mon enepfagma Daud inowen otsi hiyag isaruk lit, ”Yoab ambeg lalihipteg Het ahun Uria ino an nambeg watmisi ehek ulug hiyag irik lalihip,” ibag. Hiyag irik libagma Yoab inowen Uria fam Daud ambeg lamihin ulug hiyag itfag.

⁷Hiyag itfagma Uria ino Daud ambeg watfagma Daud inowen, ”Nare, Yoab men hori sehen seneg inap men fano welahep ano? Fano tog aptuk lahep ano?” ulug Uria kapal hibag.

⁸Kapal hibareg, ”Hibam lamihinteg kel tamihin,” ulug hiyag itfagma Uria ino ap suwon ibamen wilip atug larukmu ap suwonen ahiyehap angge imbibagma at ombolim walug libag.

⁹Walug larukmen Uria ino ibam la fug angge nikni umalikisi min nohul ulug ap suwon ibam sokolma yinggig latfag.

¹⁰Yinggig latfagma Daud ap winonen hiyag utuk lit, ”Uria ino ibam laha fug,” ibagma Daud inowen Uria fam, ”Hat yatma larikinteg yoho eneg wahen angge re nungge fahet hibam lahen fug?” ibag.

¹¹Ari ibagma Uria inowen hebeloho Daud fam ele uruk lit, ”Peti elma Allah Wene Numen haharehon kilabeg angge men Israel inap men Yehuda inap men o saboma wereg. Nikni Yoab umalikisi men oho anggenma o sabo wiroho nohoruk. It ari roho weregma ke roho an nibam laminteg suburu men ik men naruk lit nuhe men nohoruk latmin? An men hat men nonoluk wereg lit ehenon ari tihi ha fug teg lahi,” ibag.

¹²Ibagma Daud inowen Uria fam, ”Yoho tuma welatmihin. Sono hat lamihin ulug hiyag huruhukmu lahun,” ulug hiyag itfagma Uria o Yerusalem welatfag. Noholug likiyamon

¹³Daud inowen an min suburu nulen ma ulug Uria wol tibareg ik olokon og itfagma Urian nibareg nenek turuk latfag. Hup atfagma Uria wilip atfareg ibam la fug angge nikni umalikisi men nohul ulug nohoruk ambeg kibareg nohibag.

¹⁴Noholug likiya re Daud inowen Yoab fahet suwesingga haharoho imbibareg Yoab ambeg walug lamihin ulug Uria og itfag.

¹⁵Daud inowen suwesingga ino fam haharoho imbibag ane tu, ”Tog sele-sele atuk ambeg olohotma lamihin ulug Uria hiyag itmihinteg Uria ino larukmu wabukag ulug at amu embeselug ambol fil arik watlihip!” ulug suwesingga fam Yoab hiyag itfag.

¹⁶Hiyag itfag ane roho Yoab inowen o pumbuk Raba walinggoho kilabeg lit itano ap seliyon onolokon wereg ambeg lamihin ulug Uria monde fibag.

¹⁷Monde fibagma o Raba inap o inowen wilip atfareg Yoab umalikisi unusul ulug tog aptuk lit Daud otsi winon unusuruk lit Het ahun Uria oho ware fisibag.

¹⁸Ware fisibagma Yoab inowen ap eke hiyag utuk lit, ”Tog abehe ane fahet Daud hiyag irik lamihin.

¹⁹Hiyag uruhunmu hol hahureg

²⁰olok hahu lit teg. Ap suwonen hat kapal hiyaruk lit, ’Nungge fahet hit tog abul ulug o pumbuk ino horogma larikip? Ap seliyon arimanowen elehet unggulmuwen tog pising tik wambik waharukon henepeleg atisi?

²¹Gideon amloho Abimelekh ino ware fisibag ane hit henepeleg? Hiyap misihen elehet unggulmuwen helep simbuk angginon hik isa wamburukmen Abimelekh ino o Tebes inowen war atfahon hit henepeleg? Nungge fahet hit elehet horogma ari larikip?’ ulug Daud inowen hat kapal hiyaruk halug haren te, ’Hat hamingmingangge Het ahun Uria ino oho ware feserusa,’ uhun,” ulug hiyag itfag.

²²Ari ulug hiyag itfagma ap monde fibahon ino Daud ambeg libareg Yoaben hiyag itfag ane roho hiyag itfag.

²³Daud hiyag utuk lit, ”Amon inap onolok anggolowen nit men wirim teg eleg lit o inowen wilip atusareg nit anggen keyen nunusik waharusa. Waharusama niret iret tog sele-sele atil hebeloho sok horogma larukmen

²⁴elehet unggulmu kahaleg latuson arimanowen nit nunubam tog pising tik wambik waharukmen hat ap suwon hamingmingangge winon unusuruk lit Uria ino oho ware feserusa,” ulug Daud hiyag itfag.

²⁵Ari ulug hiyag itfagma Daud inowen ap monde fibahon ubam ele uruk lit, ”Haren Yoab fam uruk lit, ’Unusurusa ane fahet hat hindi anggin toho wenggel ha fug! Tog ambiyangman ap tu imbisik, tu warik peruk eleg. Unusuruk ane hikit toho unusurusa. Ari fahet o pumbuk ari pin halog toho unusul ulug hinine roho tog abil kuhupteg harep pisako unusuhup!’ ulug Yoab indi ineyap tik lamihin,” ulug hiyag itfag.

²⁶Uria ware feserusa urukmu uhe Batsyeba inowen hol hibareg fong watuk latfag.

²⁷Fong watfareg weregma Daud inowen hiyap ino an nibam hondoholug watlihip ulug ap mon enepfag. Hondoholug watfagma hiyap ino Daud inowen hilibagma ap umalik indag itfag. Alem Dauren tibag ane ari NINIKNI Allahn mondabi siyag peruk ane tibag.