Read Angguruk Yali 2 SAMUEL 12 Bible Online

2 SAMUEL 12 - Angguruk Yali bible

2 SAMUEL 12

¹Tibagma NINIKNI Allahn amingmingangge nabi Natan Daud ambeg monde fibagma libareg Daud fam ele uruk lit, ”O pumbuk misig fam ap piren welatusa. Welatuson itano misig tung ahun, misig anggengge elehon welatusa.

²Tung ahun inowen wam domba men wam sapi men anggolo foroho latisi.

³Anggengge elehon ino re we wam domba umalik heyon misig eneg ayeg waroho hilibahon foroho latfag. Wam ino fahet an nahaloho hag toho ulug suburu kuroho ik kubag misihon fam naruk lit ahoma walinggoho nohoruk lit foroho latfag. Ari roho turuk lit at umalikisi men ambiyeg weregman eneg wam ino su atfag.

⁴O misihim sambil ap pohon misig tung ahun ambeg watfag. Watfagma tung ahun inowen wam anden foroho lahiyon arimano ap pohon nambeg wahama nungge fahet isag itmin ulug indiyen umbat tibareg wam domba umalik heyon anggengge elehonen foroho latfahon we misig enehon ino wak libareg ap pohon ino fahet waroho esetfag,” ulug Natan inowen Daud hiyag itfag.

⁵Hiyag itfagma Dauren hol hibareg tung ahun ino fahet ahummu het-pet hibareg Natan fam ele uruk lit, ”NINIKNI Allah oluk werehon unuk fam ap alem siyahon tirisi ahun ari war amag!

⁶Anggengge elehon indi ha fug angge aren siyag ane tirisiyon fahet wam umalik heyon waroho esetisiyon ubalma wam uhan og uruhu,” ulug Dauren ibag.

⁷Ari ibagma Natan inowen Daud fam ele uruk lit, ”Hat aru fahet uruk lahi! Allah Israel ninap NINIKNIYEN ele urukon tu, ’Anden hat Saul inggikmuwen windat haptikikteg Israel inap fet enesug laruhun ulug ap suwon lahap haptikikon An tu welahi.

⁸Anden hikni Saul ibam olma werehon obog toho og hitikikmu uhesi oho hat hinggikmu atusareg wereg. Weregma Israel inap men Yehuda inap men obog toho hat hinggikmu wereg lamuhup ulug Anden emberikik. Og hitikik angge fahet haren we tot teg peruk lalen halug Anden mun angge man angge sebe roho og hum teg lale.

⁹Nungge fahet An nele sobir isaruk lit Anden siyag peruk lahiyon haren turuk lahen? Het ahun Uria ino ware fusukag perikinteg tog ambiyangma imbisik larikinmu Amon inaben ware feserusama Uria uhe ino hilarikin.

¹⁰Hilarikinon ari famen An apmayap naptikinmu hat humalikisiyen endebuhubonen endebuhubon oho tohen unusurukmen eneg welamuhup.

¹¹An HIKNI Allahn nele iminon tu holeg lamin: Hat hinggareg humalikisi feneyen Anden alem angginon hubam emberuk laruhuk. Anden hat huhesi aruma hat holohotman lisoho ap eke og uruhukmu unukoho ap ino men nohoruk lamuhup.

¹²Haren tirikinon ari hirako tirikin angge famen Anden Israel inap obog tohowen yet hawag ulug seleg toho tuhuk,’ uruk,” ulug hiyag itfag.

¹³Hiyag itfagma Daud inowen Natan fam, ”Anden NINIKNI Allah olohotma siyag ane tirikik,” ibag. Ari ibagma Natan inowen ele uruk lit, ”Haren siyag ane tirikinon NINIKNI Allahn elehap tehekma hat war aruhun fug.

¹⁴We haren tirikinon ari famen NINIKNI Allah indi siyahap tirikinmu hat hamloho indag hitisiyon ino eneg war aruhu,” ulug hiyag itfareg

¹⁵Natan ino ibam libag. Hiyap Urian lin tibahon ino Dauren wibagma malik indag itfahon ino NINIKNI Allahn watukmu ouk angginon ubam atfag.

¹⁶Ouk ubam atfagma Daud ino suburu na fug angge amloho fahet Allah fam heng turuk lit hupmu nohomin ulug we yuhun pilama yinggig latfag.

¹⁷Likiya hupmu ari roho turuk latfagma ap suwon-suwon Daud ibam welatfahon arimano ambeg kibareg enele uruk lit, ”Pilama yinggig lahenma in amin,” uruk latfagma aren te nirim ibareg it men oho suburu ambiyeg nibag fug.

¹⁸It men ambiyeg suburu na fug angge weregman hup sabirenam atfagma malik ino war atfag. War atfagma Daud otsi arimano enekolen hamloho war aha ulug Daud hiyag itfag fug. It enele uruk lit, ”Malik ari oluk weregma niren hiyag utukmu holtuk latisi fug. Nangginoho hamloho war aha ulug hiyag umul? Inggarehen wat tahu rohon,” uruk latfag.

¹⁹Iren enele umung-umung atukmu yet isibareg namloho war ahama uruk ulug indimu oluk atfag. Indimu oluk atfagma otsi arimano unubam kapal isaruk lit, ”Namloho war ahama uruk lahep ano?” il larikim iren te, ”Yu,” ibag.

²⁰Yu ibagma Daud ino pilaman in atug ahap ik fam umarik libareg ahaluwe amben fanowon ebene are rebelug sum fanowon wan tibag. Wan tibareg Allah ibam kibareg sembahyang ibag. Sembahyang ibareg ibam suhuloho waharuk lit suburu roti og nimiyek ulug heng enepfagma og itfagma nibag.

²¹Suburu narukmu itano otsi arimanowen yet hibareg at ubam enele uruk lit, ”Haren turuk lahenon aru nangginoho turuk lahen? Hamloho oluk weregma suburu hunik uba yatuk latikin angge famen malik ari war ahama in ahenteg suburu naruk lahen!” ibag.

²²Ari ibagma aren te, ”Namloho oluk weregma anden perikikon te malik ari fano aruhuwen NIKNI Allahn indi niyahu ano eleg ano ulug wenggel haruk lit suburu na fug angge uba yatuk latikik.

²³Ketiya malik ari war ahama nungge fahet suburu hunik welatmin? Anden nin suhuloho olukap tihi ha fug teg lahi. An fobik at ambeg lahuk, at te suhuloho nambeg waruhu fug,” ibag.

²⁴Welatfareg Daud inowen uhe Batsyeba ahiyehap turuk lit iraham libareg at men nohibag. Ambiyeg nohoruk latfagma malik ahummu atfareg ap umalik indag tibagma Daud inowen unuk Salomo suwalfag. Malik ino NINIKNI Allahn indi haruk lit

²⁵Natan fam, ”Anden malik ari nindi reg lahireg unuk eke Yedija suwalik lamihin,” ulug hiyag itfag.[10]

²⁶Welatfagma Yoab inowen o Amon inap men tog aptuk lit inibam Raba kibareg ap suwon fahet hili roho imbibag ambeg ilmig tibag.

²⁷Ilmig tibareg Yoab inowen otsi Daud ambeg mon enebik watfagma hiyag utuk lit, ”Anden o Raba inap men tog aptuk lit inibam pumbukmu ik narukon hinangguruk ambeg ilmig tarikik.

²⁸Ilmig tarikikmu ketiya o Raba fima fil anden ilmig tarikik fug ambeg haren ilmig tuhunen hotsi inibam pok atuson wol enebuhunteg o ino kuhup. An o ino kuhukmu fobik unuk Yoab ibam suwaleg laruhu rohon hat tam kuhunteg ilmig tahun,” ulug Daud hiyag itfag.

²⁹Hiyag itfagma Dauren otsi obog toho wol enepfareg o Raba waling enebil kibareg ilmig tibag.

³⁰Ilmig tibareg o Raba inap onowe suwonen lahaptuk angge emas fam wirihon unggulmu wan teg latfahon ino wibareg at unggulmu wan teg latfag. Lahaptuk angge ino fam helep ayeg ili faya urukon eke topno roho weregma aben leg harukmu anggin 35 kilogram teg latfag. Ap suwonen lahaptuk angge ino hilibareg nin sebe roho o Raba inap enenggengge anggolo huhulangge hilibag.

³¹Arimano obog toho hilaruk lit o Raba inap ininggik lisoho hondog eneplug libareg helep kong turuk angge men wanggun ineyon men yaha fam yabuk wit nutuk lit o witukon fahet kinang huluwon wiratuk lamuhup ulug mingming eneptuk latfag. It arimano unubam turuk latfag hag toho Dauren Amon inap pumbuk obog toho unubam turuk latfag. Ari tibareg Daud otsi men o Yerusalem suhuloho watfag.