Read Angguruk Yali 2 SAMUEL 14 Bible Online

2 SAMUEL 14 - Angguruk Yali bible

2 SAMUEL 14

¹Ap suwon Daud inowen amloho Absalom fahet indi ouk toho wenggel haruk ulug he Zeruya amloho Yoab ino oluk atfareg

²ap o Tekoa lalihip ulug mon enepfagma libareg hiyap indi anggat tehon eke hondoholug watfag. Watfagma Yoab inowen at ubam ele uruk lit, ”Fong watuk lit turuk hag toho fesi lahapmihin. Fesi lahapmihinteg e ahaluwe amben fanowon hebene are ra fug angge ap warehon fahet amusun toho uba yatukon hag toho timihin.

³Ari roho turuk lit ap suwon ambeg lamihinteg anden hiyag hitminon ubam imihin,” ibareg ari-ari imihin ulug milalfag.

⁴Milalfagma o Tekoa hiyap ino ap suwon ambeg libareg orohole han kinangma sahung atfareg ele uruk lit, ”Nikni hat ap suwon, an let napmihinen wahi!” ibag.

⁵Ibagma ap suwonen, ”Alem nungge fahet wahen?” ulug kapal hibagma hiyap inowen, ”An nahun war atisimu yuwog welahi.

⁶An hamingminganggeyen numalikisi ap angge piren indag tarikik. Misihim sambil it piren itanowen anggenma yik aptuk latusa. Yik aptukmu ap it sen eneptukon elehen namloho misihen are ware feserisi.

⁷Ware feserisimu ketiya an nori obog tohowen an nubam suwahal uruk lit, ’Hamlohowen are pinggi watisimu niren ayeg waroho ware fusulen wilip nisa ma!’ uruk. Ari urukmu anden namloho ino og isahuk halug iren ware feseruk lit an nubalmangge elehap tuhup tohon! Nubalmangge elehap turuk lit indok anggen anden tohon mondabi ware fusuhup. Ware fusuhupmu an nahun ubalmangge inowen umalikisi indag taruk elehen an nahun unuk eleg aruhu,” ulug hiyag itfag.

⁸Hiyag itfagma ap suwonen hiyap ino fam, ”Hibam lamihin! Alem ehenon ino anden haloho embemin,” ibag.

⁹Ibagma hiyap inowen ap suwon fam ele uruk lit, ”Ari ehen angge famen fobik iren an men nibam werehon men nunubam alem angginon umbuhupmu hat ap suwon hubam unggum umbuhup fug,” ulug hiyag itfag.

¹⁰Hiyag itfagma ap suwon inowen, ”Ap san hat hubam suwahal uhu halug an nambeg hondoholug waruhunmu at inowen fobik hat hele ying habuhu fug,” ibag.

¹¹Ibagma hiyap inowen, ”An namloho ware feserisiyon fahet ayeg waruhuk peruk ahun inowen an namloho pirenehon ino ware feseruk lit an mondabi siyahap nabuk nowen ulug hat ap suwonen HIKNI Allah olohotma hele tem toho imihin,” ibagma ap suwon inowen, ”NINIKNI Allah olukonen holegma nele tem toho iminon tu: Hamloho oruk unggulmu wilibihon misig oho heneko kinangma wambuhu fug,” ibag.

¹²Ibagma hiyap inowen, ”An hamingminganggeyen nele tot nikni hat ap suwon hubam iminen hiyag nimin!”, ibagma, ”In!” ibag.

¹³Ibagma hiyap inowen, ”An namloho fahet haren te ili wahuk ulug sali embehen angge famen hinggareg hamloho haren yanggaltikinon ino suhuloho watmihin ulug wol turuk lahen fug. Nikni hat ap suwon, an nubam sali embehenon ariyen hat hamloho fahet siyag peruk lahenon ino inam aha. Nungge fahet siyag ane anden fahe hiyag hirihiyon ino hag toho haren Allah umalikisi unubam tuhuk peruk lahen?

¹⁴Nit obog toho war amuhuk. Nit ik hililoho kinangma wamburuk lit longgo urukon hag toho welahe angge famen ap eke siyag amag ulug Allahn peruk eleg. Ari hag toho Allahn te aben yanggal eneptukon arimano fahet mondabi enemumu wereg lit An men hili roho welamuhup peruk eleg.

¹⁵Nikni hat ap suwon, an noriyen an nakolap naptusama anden wenggel haruk lit ap suwon ambeg lahukteg alem nubam werehon fahet hiyag uruhukmu holuhu ano ulug wenggel harikikteg wahi.

¹⁶Anden ihiyon hat ap suwonen hol halug an namloho ware fusuhuk peruk ahun inggikmuwen windat nuruhun. Ap inowen andet namlohowet kinang Allahn og nisarisiyon famen elehap nenebuhuk peruk.

¹⁷Ari perukmu anden wenggel haruk lit nikni ap suwonen ele hiyag nitmisimu an nindi yuwag aruhu ulug wenggel harikik. Nikni hat ap suwon Allah ot malaikat hag toho wereg lit tu fano tu siyag ulug holuk teg lahen. HIKNI Allah hat men welaruhu,” ulug hiyag itfag.

¹⁸Hiyag itfagma ap suwon inowen hiyap ino fam, ”Anden alem misig fahet kapal hiyaminmu hindimu werehon hirahuk fug angge fag toho hiyag nitmihin,” ibagma hiyap inowen, ”Nikni, hat hele imihin,” ibag.

¹⁹Ibagma ap suwon inowen, ”Hun Yoab inowen hat an nambeg mon habehek ano?” ulug kapal hibagma hiyap inowen, ”Nikni, hat holohotman we tem toho iminon tu: Haren kapal niyaruk lahenon fahet anden un ane uk fug angge fag toho hiyag hitmin. Tem toho hat hamingmingangge Yoab inowen an mon naptuk lit anden hiyag hirihiyon obog toho aren tam milal nabehek.

²⁰Yoab inowen alem werehon fano hal amag ulug ari obog toho ehek. Allah ot malaikat indi anggat toho wereg hag toho har oho hindi anggat toho wereg lit kinangma teko laruk ane obog toho holuk teg lahen,” ibag.

²¹Weregman ap suwon Daud inowen Yoab fam ele uruk lit, ”Haren nubam ehenon hikit toho timin. Lamihinteg namloho Absalom nambeg suhuloho hondoholug watmihin,” ulug hiyag itfag.

²²Hiyag itfareg Yoab ino kinangma orohole han samaleg lit Allahn indi hasug laruhu ulug ap suwon hi ribareg, ”Anden heng habihi ane hat nikniyen holehenon ari famen an fahet hindi nasug lahenon yoho noluk aha,” ibag.

²³Ari ibareg Yoab ino in atlug o Gesur libareg Absalom hondoholug o Yerusalem watfag.

²⁴Watfagma Daud inowen, ”Absalom ibam lamisi, an nambeg watmisi fug,” ibagma Absalom ap suwon ibam la fug angge at ibam tam welatfag ambeg libag.

²⁵Orohole fano ulug aben wel turuk latfag ahun Absalom hahon o Israel kinang fam winon eke welatfag fug. Uyug amloman oruk atogma siyag teg eleg angge welatfag.

²⁶Oruk anggolo reg lit angginen mo misig-misig fam kong turuk latfag. Oruk kong turuk latfahon ino anggin wirim haruk angge ap suwonen tohon fam emberukmu anggin te kilogram piren teg latfag.

²⁷Absalom inowen ap umalik hinahan hilani malik misig orohole fanowon unuk Tamar indag tibag.

²⁸Absalom ino ap suwon ambeg la fug angge o Yerusalem weregman eneg mo piren libag.

²⁹Libagma Absalom inowen ap eke Yoab ambeg monde feruk lit, ”Ap suwon Daud ambeg lamihin ulug hiyag itminen nambeg watmisi,” ulug monde fibag angge famen Yoab ino Absalom ambeg lamin fug ulug pok atfag. Pok atfagma inggik pireneg angge Yoab hondohik lamihin ulug ap monde fibagma Yoab ino watmin fug ulug pok atfag.

³⁰Inggik pirenam pok atfagma Absalom inowen amingmingangge unubam hiyag isaruk lit, ”Lalihipteg Yoab iyabuk an niyabuk iraham werehon roti anggen yaho ambeg ino harep pisarik lalihip,” ibag. Ari ibagma Absalom amingmingangge arimano libareg Yoab iyabuk ino harep pisaho fisibag.

³¹Harep pisaho fisibagma Yoab ino Absalom welatfag ambeg libareg hiyag utuk lit, ”Nungge fahet hat hamingmingangge arimanowen an niyabuk harep pisaho fesehesa?” ibag.

³²Ari ibagma Absalom inowen Yoab fam, ”Nungge fahet anden wol haptikikmu nambeg waharikin fug? Anden Daud ambeg lamihin ulug hiyag hitminen wol haptikik. Lamihinteg ap suwon fam hele uruk lit: Absalom ele ehek ane ari, ’Nungge fahet an o Gesuren waharikik? Lumu welale fano ehek,’ imihin. Ketiya an ap suwon olohotma watmin peruk lahi. Aren an fahet siyag ane tirisi peruk halug nuwabukag,” ulug hiyag itfag.

³³Hiyag itfagma Yoab ino ap suwon Daud ambeg libareg Absalomen ibag ane roho hiyag itfag. Hiyag itfagma Daud inowen Absalom wol tibagma Daud ambeg watfareg alukema kinangma orohole han sahung atfareg hi ribagma ap suwon inowen oho mako pug toho hi ribag.