Read Angguruk Yali 2 SAMUEL 15 Bible Online

2 SAMUEL 15 - Angguruk Yali bible

2 SAMUEL 15

¹Welatfagma Absalom inowen kereta wam kudan lisoho walug laruk angge wibareg ap teng piren 50 at alukema larukon og enepfag.

²Og enepfareg Absalom ino eke sambil eke sambil likiyanet elehet o pumbuk walinggoho kilabehon sok elma in arik waharuk latfag. Absalom ke ilan fil unduhuk lit ap alem unubam welatfahon ap suwonen halukag ulug walug kimin ulug waharuk latfahon arimano wol eneplug it misig-misig kapal isaruk lit, ”Nori, hit o kema hinap waharuk lahep?” ulug kapal isarukmu iren te, ”An Israel ninap nununggul unuk ariyon-ariyon waharuk lahi,” uruk latfagma

³Absalom inowen ap ino ubam ele uruk lit, ”Alem hubam werehon ari fanik-fano walug wahen angge famen ap suwon iraham wereg inap arimano misihen oho holmisi fug,” ulug inindi kahal eneptuk latfag.

⁴Nin Absalomen ele uruk lit, ”Alem haltuk laruhuken an ap suwon lahap naplep fano. Ap unubam alem angginon seyon weregma an nambeg walug waharukmu anden fano roho hal hesele,” ulug hiyag isil laruk latfag.

⁵Ap sa at ambeg waharuk lit elenggen fam hur atlug hi ruruk latfagma Absalom inowen ap ino inggiken kinangman lisoho unduhuk felug mako pug toho hi ruruk latfag.

⁶Ari roho turuk lit ap alem unubam welatfahon ap suwon ambeg walug kimin ulug waharuk latfahon arimano obog toho Absalom inowen inindi og eneptuk latfag.

⁷Mo uhan libagma Absalom inowen Daud fam ele uruk lit, ”Anden NINIKNI Allah fam sali irikik ane hikit toho tuhuken o Hebron lamihin ulug hiyag nimin.

⁸An indam Siria kinang fam o Gesur welatikik li nele uruk lit, ’NIKNI Allahn an suhuloho o Yerusalem hondoko numbahik lahu halug anden o Hebron inowen At ubam sembahyang uhuk,’ ulug sali irikik,” ibag.

⁹Ari ibagma Dauren, ”Hindi se roho lamihin,” ulug hiyag itfag. Hiyag itfagma Absalom ino sum tug tibibareg wilip atug o Hebron libag.

¹⁰Absalom ino uwan la fug lit tam otsi hirako mon eneptuk lit, ”Israel inap ununggul unuk obog toho walinggoho wereg ke lalihipteg hiyag isaruk lit iren pinggong ele urukmu hol hahup halug Absalom o Hebron ap suwon lahakek ulug inine roho uruk lamuhuben hiyag isa lalihip,” ulug mon enepfag.

¹¹Mon enepfareg ap teng likinen 200 Absalomen wol enepfahon arimano indimuwen wenggel hibag ane enepeleg toho wereg lit at men ambiyeg laruk latfag.

¹²Absalom inowen Allah fahet wam waroho hubu lahapmin ulug turuk lit Gilo ahun Ahitofel Daud let turukon ino hondoholug watlihip ulug o Gilo ap mon enepfag. Ari roho turuk lit weregma ap anggolo Absalom ibil atuk lit Daud apmayap tuhuk pibag inap arimano inine atfag.

¹³Welatfagma ap ekeyen Daud fam ele uruk lit, ”Israel inap obog toho Absalom ibil atusa,” ulug hiyag itfag.

¹⁴Ari ulug hiyag itfagma Daud inowen amingmingangge at men o Yerusalem welatfahon arimano unubam ele uruk lit, ”Hun Absalomen nunusuhu rohon in atlihipteg o aru embeselug wilip amulen maniyek! Absalom inowen folo-folo mug neneplug siyahap nenebil waruhureg o pumbuk aru oho tog fam nunusuhu rohon folo-folo wilip amul,” ibag.

¹⁵Ibagma it arimanowen, ”Hat ninikniyen famen eneg. Hat hele eneg holtuk lamul,” ibag.

¹⁶Ari ibagma Daud inowen hiyap at men welatfahon enebe numen unubam hiyag isaruk lit, ”An nibam foroho lamuhuben welatlihip,” ulug hiyag isibareg uhesiyet maliket ibamen wilip atukmu

¹⁷otsi obog toho at men laruk latfag. Wilip atfareg o pumbuk ino atogma in arik libag.

¹⁸In arik libareg ap suwon amingmingangge arimano men at ebe foroho latfag inap sehen senehon arimano men Gat inap Daud o Gat libag li ariyen at men welatfahon teng falfalik fimahen 600 obog toho arimano inikni unduhukmu iraham keyen laruk latfag.

¹⁹Larukmu itano Daud inowen o Gat inap onowe Itai fam hiyag utuk lit, ”Nungge fahet hat nit ninim waharuk lahen? Hat pog hahun hibamen hik hiyarusama waharikin angge re suhuloho lamihinteg ap suwon ket laharisiyon ino men welaruhun.

²⁰Hat sono eneg waharikin angge re o kema-kema lahuk ambeg napelegman noruk lamuhuken nangginoho anden og haptuk lahi. Lamihinteg hat hori oho og eneplug lamihin. Larukmu Allahn indi henesug lit let heneptuk laruhu!” ibag.

²¹Ari ibagma Itai inowen, ”Nikni ap suwon, hat holuk welaruhun ambeg war aruhun ambeg an hamingmingangge oho welaruhuk ulug NINIKNI Allah oluk werehon olohotman uruk lahi,” ibag.

²²Ari ibagma Daud inowen, ”Ari ehenma an niraham keyen lamihin,” ibag. Ibagma Itai ino otsi obog tohowet umalikisi at min welatfahon arimanowet Daud iraham keyen libag.

²³Ap obog toho ari roho larukmu ap hiyap o pumbuk ino fam welatfahon arimano obog toho enele yi hunu roho uba yatuk latfag. Uba yatukmu ap suwon ik Kidron paloho nindig atfareg o lei fil libag.

²⁴Laruk lit yet harukmen Allah amingmingangge imam Zadok men Abyatar men Lewi inap peti elma Allah Wene Numen haharehon kilabeg angge paya roho walug laruk inap men unduhukmu yet isibag. Peti ino kinangma imbibareg weregma ap obog toho o Yerusalemen wilip atuk lit peti ino pisan halug laruk latfag.

²⁵Laruk latfagma Daud inowen Zadok ubam ele uruk lit, ”Peti aru suhuloho o Yerusalem walug lalihip. NINIKNI Allahn indi nasug laruhu halug suhuloho o Yerusalem lamihin uhumu lahukteg peti aru o saboma foroho lahep ambeg nin ha lahuk angge famen

²⁶Allahn indi nasug laruhu fug halug Aren an nubam timin puhu ane fano nubam tuhu,” ibareg

²⁷nin Zadok fam ele uruk lit, ”Hat hamloho Ahimaas men Abyatar amloho Yonatan men hinindi se roho o Yerusalem suhuloho lalihip.

²⁸Lei fil lul ulug ik paloho laruk ambeg an weregma ap hiren wene Daud ambeg walug lamihin ulug monde fuhup ahun eke nambeg waruhu halug eneg lahuk,” ulug hiyag itfag.

²⁹Ari ulug hiyag itfagma Zadok men Abyatar menen peti ino nin o Yerusalem suhuloho walug watfareg welatfag.

³⁰Daud indi siyahen orohole sum fam hililip teg lit uyugmu kilaptukon eleg angge uba yatil punu zaitun fam laharuk latfag. Ap at men ambiyeg libahon arimano oho obog toho onorohole hililip teg lit uba yatil laharuk latfag.

³¹Ari roho laharukmu aben Daud hiyag utuk lit, ”Ahitofel oho Absalom ibil atusa inap enembeg kirisireg inim wereg,” ulug hiyag itfagma Daud inowen, ”NIKNI Allah, Ahitofel inowen Absalom hiyag utuk laruhu ane elehap tuhun,” ibag.

³²Daud ino Allah wel turuk ambeg punu ino unggulmu lahibareg weregma Daud are Husai Arki ahun ino asum tararag tohon wan teg lit kinang fesi unggulmu lahabeg angge ambeg watfag.

³³Watfagma Daud inowen at ubam ele uruk lit, ”Hat an men lul halug fobik kalemma laruk lit haren an nubam angginon umbuhun tohon an min lul fug angge famen

³⁴suhuloho o Yerusalem lamihinteg Absalom fam uruk lit, ’Nikni ap suwon, an hat hamingmingangge welaruhuken wahi. Atam hikni amingmingangge welatikik hag toho ketiya hat hamingmingangge welaruhuk,’ ulug hiyag irik lamihin halug Ahitofel inowen Daud siyahap tul ulug Absalom hiyag utuk ane eleg amag ulug hondo rik lamihin.

³⁵Hat imam Zadok men Abyatar men o Yerusalem welamuhup. Wereg lit ap suwon wereg ambehen turuk ane fahet urukmu hol isaruk laruhunon obog toho imam Zadok men Abyatar men hiyag isaruk laruhun.

³⁶It unumalikisi piren Ahimaas men Yonatan men iniknisi inim wereg angge re holuk toho. Holuhun ane arimano obog toho Daud hiyag irik lalihip ulug malik itano nambeg mon enebik waruhun,” ulug Husai hiyag itfag.

³⁷Hiyag itfareg weregma Absalom ino o Yerusalem kurukmu itano Daud are Husai oho kibag.