Read Angguruk Yali 2 SAMUEL 16 Bible Online

2 SAMUEL 16 - Angguruk Yali bible

2 SAMUEL 16

¹Daud punu ino famen wamburukmen Saul umbusag Mefiboset amingmingangge Ziba ino roti wirahowon teng likinen 200, kue kismis kin altap hahon teng uhan 100, e anggen teng uhan, hele anggur ahaluwe kubag humon misig fam kilaboho werehon men wam keledai piren palimu walug Daud ambeg watfag.

²Watfagma ap suwon inowen Ziba fam kapal haruk lit, ”Nungge fahet aruma obog toho walug wahen?” ulug kapal hibagma Ziba inowen, ”Wam keledai aruma hat ap suwon huhesi malik men palimu lahalug larukon fahet walug wahi. Roti wirahowon men e anggen men tuma hotsi hat men welahebon aruman nawag ulug og isahun. Anggur ahaluwe aru leimu larukmu sat heneptuk halug nahup,” ulug hiyag itfag.

³Hiyag itfagma Daud inowen, ”Hat hikni Saul umbusag Mefiboset ino kema wereg?” ulug kapal hibagma Ziba inowen, ”O Yerusalem wereg. Aren te yabuk numbusag ap suwon Saulen seneg latisiyon ino yoho Israel inaben suhuloho an ninggikmu embelusa peruk,” ulug hiyag itfag.

⁴Hiyag itfagma ap suwon inowen, ”Ari roho halug mun angge man angge Mefiboset inowen tohon haren tohon atmisi,” ibagma Ziba inowen, ”Wah nikni, hat ap suwonen hindi nasug lit eneg welaruhun,” ibag.

⁵Ap suwon Daud ino o Bahurim larukmen Saul oriyon misig Gera amloho unuk te Simei o Bahurim inowen wilip atfareg Daud huluwap til horogma watfag.

⁶Ari til waharukmu Daud otsi men ebe foroho latfag inap sehen senehon arimano men Daud fuma-fuma fil laruk latfag angge famen Simei inowen Daud otsi men unusimin ulug helep hik-hak isil watfag.

⁷Simei inowen Daud huluwap turuk lit, ”Hat ap unusuruk hahun, mungguwat hahun, hebe lag!

⁸Saul ubalmangge aruhuk ulug at oriyon anggolo elehap eneptikinon ari fahet NINIKNI Allahn hebeloho alem siyahon hubam emberuk lit yabuk hat ap suwonen hinggikmu seneg latikinon ino taluk toho hamloho Absalom inggikmu emberisi. Haren ap unusuruk latikin ane ariyen ketiya re alem angginon hubam atisi,” ulug Daud huluwap turuk latfag.

⁹Huluwap turukmu hol hibareg hiyap Zeruya amloho Abisai inowen ap suwon fam ele uruk lit, ”Nikni, nungge fahet mene warehon aruwen hat ap suwon famen huluwap haptuk? Unggul kong tibisik lamihin ulug hiyag nimin,” ibag.

¹⁰Ibagma Daud inowen, ”Hit Zeruya umalikisi welahebon an men hit men il elehen an nubam ilihip fug. Fano huluwap nabukag. NINIKNI Allahn Simei fam, ’Daud ino huluwap tik lamihin,’ ulug hiyag itisi ane roho an huluwap naptuk halug ap san hebeloho nungge fahet ari roho huluwap turuk lahen ulug kapal ha reg?” ibag.

¹¹Ari ibareg Daud inowen Abisai men otsi obog toho unubam ele uruk lit, ”An namloho yuhonen oho nuwaruhuk ulug turuk angge re Benyamin ahun Simei aruwen fano siyahap napmisi. NINIKNI Allahn hiyag itisi ane roho huluwap nabukag. Hele imbisin uk fug!

¹²NIKNI Allahn siyag toho welahi ane aru yet niyahu halug yoho huluwap naptukon ari fahet hebeloho fanowon nubam tuhu ano,” ulug hiyag isibag.

¹³Hiyag isibagma fanggong pulmu weregma Daud otsi men fimag fil larukmu Simei ino fimag fil laruk lit huluwap til Daud fil helep men sabelep men hik-hak isil laruk latfag.

¹⁴Ari til laruk lit Daud men ap at men laruk latfahon arimano obog toho saren ik Yordan ayegma libareg kel taruk latfag.

¹⁵Absalom men Israel inap at ibilon obog toho o Yerusalem kurukmu Ahitofel atam Daud let turuk latfahon ino oho ambiyeg kibag.

¹⁶Arki ahun Daud are Husai ino Absalom ambeg libareg hiyag utuk lit, ”Hat ap suwon, halong toho, halong toho,” ulug hi ribag.

¹⁷Hi ribagma Absalom inowen Husai fam ele uruk lit, ”Hare Daud hindi reg latikinon embeserikinteg an nambeg wahen? Nungge fahet Daud larukmu ambiyeg larikin fug?” ibag.

¹⁸Ari ibagma Husai inowen, ”Eleg, larikik fug. NINIKNI Allah men Israel inap obog toho menen mumal haptusa angge re haren an ngi nasugmu an hat men ambiyeg welamuhuk.

¹⁹An ap sa amingmingangge aruhuk? Daud amloho amingmingangge aruhuk fug? Hat hikni amingmingangge welatikik hag toho hat hamingmingangge welaruhuk,” ulug hiyag itfag.

²⁰Ari ulug hiyag itfagma Absalom inowen Ahitofel fam ele uruk lit, ”Nanggintul ulug hiyag nisimin,” ulug hiyag itfag.

²¹Hiyag itfagma Ahitofel inowen hiyag utuk lit, ”Lamihinteg hikniyen uhesi winon nibam foroho lamuhup ulug embeselug larisiyon itano men ambiyeg noholihip. Ari timihinmu hikniyen hol hahureg hat fahet nirim peruk urukmu Israel inap obog tohowen hol hahupteg ap hibil atusa inap obog toho inindi wirik toho welamuhup,” ulug hiyag itfag.

²²Hiyag itfagma ap suwon wereg ibam ungga palimu o sabo wiri fibagma Absalom ino Israel inap obog tohowen yet niyawag ulug o sabo ino elma kibareg ikni uhesi itano men nohoruk latfag.

²³O itano li Ahitofel inowen komo uruk latfag ane ari fahet Allahn hiyag utuk ane hikit toho uruk ulug ap welatfahon arimanowen peruk latfag. Dauren oho Absalomen oho ari roho peruk latfag.