Read Angguruk Yali 2 SAMUEL 17 Bible Online

2 SAMUEL 17 - Angguruk Yali bible

2 SAMUEL 17

¹Welatfagma Ahitofel inowen Absalom fam ele uruk lit, ”Ap teng-teng angge teng nisanggowen 12.000 eneko og enepmihin ulug hiyag nimin. Og enepminteg yoho hubanggo wilip atlug Daud mutlug lamin.

²Daud saren ine eleg atmisireg weregma laminteg yuk wilipmin. Ap at men werehon obog toho enekolen linggik-longgo ulusama inikni eneg ware fesemin.

³Ari timinteg hiyap elenggen kurukon ahun ambeg waharuk hag toho otsi obog toho og eneplug suhuloho hambeg watmin. Ap misig eneg watmin peruk lahenma ap winon obog toho onoluk welamuhup,” ulug hiyag itfag.

⁴Hiyag itfagma Absalom men Israel inap onowesi menen fano ehen ibag.

⁵Ari ibagma Absalom inowen, ”Hun Husai inowen oho ele imisi ane holtulen wol tik aliyek!” ibag.

⁶Ari ibagma Husai ino ambeg watfagma Absalom inowen at ubam ele uruk lit, ”Ahitofel inowen ti roho hiyag nesehek. Hiyag nesehek ane roho tul ano? Fug halug te, haren oho hele hiyag nisamihin,” ulug hiyag itfag.

⁷Hiyag itfagma Husai inowen Absalom fam, ”Ahitofel inowen yoho hiyag hesehekon ari siyag,” il laruk lit,

⁸”Hikni men otsi men enekol eleg toho tog aptuk inap wereg angge re hat holuk. Olomene lekma werehon umalik longgo urukmu indi olok atuk hag toho inindimu olok toho tog abusa. Hikni tog aptuk ane oluk ahun werehen otsi men ambiyeg nohoruk eleg.

⁹At te ketiya owikmu ano winama ano hiraho lit wereg peruk lahi. Tog ak tulusa li hotsi winon pinggi unusulusa lit teg. Unusehesa urukon ap winonen hol hahup halug enele uruk lit, ’Absalom ibilon mulangge unusehesa,’ uhup.

¹⁰Ari uhupmu ap sa ambong se roho turukon olomene olokon inindi hag toho werehonen oho it unusehesa urukmu hol hahupteg inindi imbik wambuhup. Hikni ahako roho turuk ahun, otsi oho enekol eleg toho tog aptuk inap wereg angge re Israel inap obog toho onoluk.

¹¹Ari fahet anden ari roho komo haptuk lahi: Israel inap o Dan men o Bersyeba men kinang atogman atogma werehon obog toho nambeg luhal arik wamuhup ulug wol enepmihin. Yinggi ik ayegma mondeg hag toho luhal arik wamuhupmu hinggareg oho tog abik lahun.

¹²Hibilil kinangma wambik waharuk hag toho nit at welaruhu ambeg lahukteg sen hahukmu aret otsi ambiyeg werehonet ap misig oho wilip amuhup fug.

¹³At akolen o ekema lahu halug Israel inap obog tohowen o pumbuk ino hele fam walinggoho pug tebelug lisoho ikma hik isa lahupmu alinlan oho aben hahup fug,” ulug Absalom hiyag itfag.

¹⁴Hiyag itfagma Absalom ino men Israel inap obog toho menen, ”Hun Husai inowen fano roho ehekon palimu regma Ahitofel inowen ehekon apma reg,” ibag. NINIKNI Allahn te Absalom ubam alem siyahon umbuhuk ulug Ahitofel inowen fano roho hiyag itfag angge famen eleg amag pibag.

¹⁵Ari tibagma Husai inowen imam Zadok men Abyatar men unubam ele uruk lit, ”Ahitofel inowen ti roho Absalom men Israel inap onowesi men hiyag esehek angge famen anden ari roho hiyag isihi.

¹⁶Ari fahet folo-folo ap mon eneplihipmu Daud hiyag irik lalusa. Lalusareg hiyag utuk lit, ’Yoho hubanggo ik paluk fug angge tuma fil noholihip fug. Hat ap suwon hotsi ambiyeg laruk lahebon arimano men elehap henebuhup tohon o leimu lul ulug folo-folo ik fuma fil nindig atlihip,’ ulug Daud hiyag irik lalusa,” ulug hiyag isibag.

¹⁷Abyatar amloho Yonatan men Zadok amloho Ahimaas men nenebe yet nisahup tohon o Yerusalem kuk fug angge ik elerukmu o En-Rogel weregma amingmingangge hiyap ekeyen likiya hupmu Husai inowen uruk latfag ane hiyag isa waharuk latfagma it piren pikit Daud ambeg laruk lit hiyag utuk latfag.

¹⁸Ari turukmu malik ekeyen yet isibareg Absalom hiyag itfag. Hiyag itfagma Yonatan men Ahimaas men folo-folo ap misig ibam o Bahurim libag. Libareg o ino owahalma ik fahet kinang habulig ambeg hirag arik wambibag.

¹⁹Wambibagma o ngi ahun uheyen sum wibareg kinang habulig ambeg ambilikmu sale fibareg roti anggen pali ke hilili fibagma yet isa fug teg latfag.

²⁰Yet isa fug teg latfagma Absalom otsi itano hiyap ino ambeg libareg kapal haruk lit, ”Ahimaas men Yonatan men kema wereg?” ibagma, ”It te ik paloho lahasa,” ibag. Ari ibagma yami enebil larukmen eleg latfagma o Yerusalem suhuloho libag.

²¹Ap arimano libagma Yonatan men Ahimaas men itano kinang habulig ambehen lahik watfareg ap suwon Daud hiyag irik libag. Hiyag utuk lit, ”Ahitofel inowen hit hunubahet ti roho ehek angge re folo-folo in atlihipteg ik paloho lalihip,” ulug hiyag itfag.

²²Hiyag itfagma in atfareg Daud men otsi ambiyeg welatfahon obog toho men ik Yordan paloho nindig atfagma mo lahik watfag.

²³Ahitofel inowen Absalom hiyag itfahon ino holfag fugmu oluk atfareg Ahitofel inowen wam keledai palimu lahibareg ibam tam welatfag ambeg libag. Libareg ibam mun angge man angge uhe malik men haloho imbibareg hele fam inggarehen anggolop hol kete roho wat tibag. Wat tibagma ikni salfag ambeg ino sale fisibag.

²⁴Daud o Mahanaim larukmu itano Absalom men Israel inap ambiyeg welatfahon obog toho ik Yordan paloho libag.

²⁵(Itano li Absalom inowen sehen seneg inap milal eneptuk laruhun ulug Yoab ubalmangge hun Amasa unduhuk fibag. Amasa ikni o Ismael ahun Yitra, at isinga Abigal welatfag. Abigal ino hun Nahas ahaloho, Yoas isinga Zeruya ot welatfag.)

²⁶Ari roho weregma Absalom umalikisi Israel inap menen o sabo witfareg kinang Gilead fam welatfag.

²⁷Daud o Mahanaim libagma Amon inap wereg ambeg o Raba ahun Nahas amloho Sobi ino men, o Lodebar ahun Amiel amloho Makhir ino men, Gilead inap wereg ambeg o Rogelim ahun Barzilai ino menen

²⁸heniye nohoruk angge men kubag men suburu esetuk angge men suburu, hom, roti anggen, yasi, nali, sinali huluwon singon,

²⁹kin altap, wam amiyon hag angge, wam sapi ag owe arimano obog toho men wam domba oho Daud men otsi menen naruk lamuhup ulug enembeg walug watfag. Watfareg enele uruk lit, ”Ap aruma leimu waharuk lit suburu obok ik obok harusareg inine eleg atisimu walug wahe,” ibag.